ނިދާ ގަޑީގައި މަންމަ ކިޔައިދޭ ތަފާތު ރީތި ވާހަކަތަކާއި، ނާނާ ތަކަކީ ތާ އަބަދުވެސް ހަނދާން ހުންނަހާ ލޯބި އަދި ހާއްސަ އެއްޗެހިތަކެކެވެ. ކޮންމެހެން އެ ވާހަކަތަކާއި ނާނާ ތަކަކީ މާ މޮޅު އަދި އަދަބީ ގޮތުން ވަރުގަދަ އެއްޗިއްސަށް ވެގެނެއްނޫނެވެ. އެ ވަގުތު ކޮޅުގެ ހާއްސަ ކަމުންނެވެ. އެ އުފާވެރި އިހުސާސުތަކުގެ ސަބަބުންނެވެ. ޒަމާނީ ކުރިއެރުންތަކާއި އެކު މިއަދު އެނގޭ އެންމެ ބޮޑު ހަގީގަތަކީ އޭރުއްސުރެ މައިންބަފައިން މި ކިޔައިދޭ "ބެޑް ޓައިމް ސްޓްރީސް" އަކީ ހަމައެކަނި ފޫހިފިލުވުމަށް ކުރާ ކަމަކަށްވުރެ އެދެވޭ ބޮޑެތި އަސަރުތަކެއް ދަރިންނަށް ކުރާ ކަމެއް ކަމަށެވެ.
ދަރިފުޅުގެ ސިކުނޑި ތަރައްގީ ކުރުމަށް އެހީވެދޭ
ފަހުގެ ދިރާސާތައް ދައްކާގޮތުން ކުޑަކުދިންނަށް ވާހަކަ ކިޔައިދިނުމަކީ އެކުދިންގެ ސިކުނޑީގެ މެންޓަލް އިމޭޖަރީ އާއި ނެރޭޓިވް ކޮމްޕްރިހެންޝަން ރަނގަޅުވުމަށް މަގުފަހިކޮށްދޭ ކަމެކެވެ. އެހެންކަމުން ނިދާ ގަޑީގައި ކިޔައިދޭ އެކި ވާހަކަތަކުން ދަރިންނަށް އަމިއްލައަށް އެކި ކަންކަން ތަސައްވަރުކުރަން ދަސްވެ ދޭހަވާ މިންވަރުވެސް އިތުރުވަމުންދާނެ އެވެ. ވާހަކަ ކިޔައިދޭން ފަށަން ވަކި އުމުރެއް ނެތެވެ. އެންމެ ޅައުމުރުއްސުރެ ދަރިންނާއި ވާހަކަ ދައްކައި، އަޑުއިވޭ ވަރަށް ބާރަށް އެއްޗެހި ކިޔައިދިނުމަކީ ބަހަށް ކުދިން އަހުލުވެރިވެ، ބަސްމޮށުންތެރިކަން ކުރިއަރާނެ ކަމެކެވެ.
"ސްޓްރެސް" ދަށް ކޮށްދޭ!
އަހަރެމެން ބޮޑު މީހުން ފަދައިން ވާހަކަ ކިޔުމަކީ ކުޑަކުދިންގެ ސްޓްރެސް ވެސް ދަށްކޮށްދޭ ކަމެކެވެ. ވާހަކަ ކިޔުމަކީ ކުރިން ތިމާގެ ސިކުނޑި ދަތުރުކޮށްފައި ނުވާ ފަދަ ތަފާތު މިސްރާބުތަކަށް ތިމާ ގެންގޮސްދޭ އެޑްވެންޗަރަސް ދަތުރަކަށްވާއިރު ކުޑަ ކުއްޖަކަށް މިކަން ޝައުގުވެރި ނުވާންވީ ސަބަބެއް ނެތެވެ. ވާހަކަ ކިޔުމުން ބޮޑެތި މީހުންގެ ވެސް ނުތަނަވަސްކަމާއި ހާސްކަން ފިލައި ގޮސް، ހަށިގަނޑުގެ މަސްތައް ރިލެކްސް ކުރުވަ އެވެ. އެހެންކަމުން ލޯބިވާ މަންމަ އާއި ބައްޕަ ގައިގައި ބައްދާލައިން އިނދެ ހިޔާލީ ވާހަކައެއް އަޑުއަހާލުމުން ތުއްތު ދަރިފުޅަށް ވާނެ އަރާމާއި ލިބޭނެ ހިތްހަމަޖެހުން އަމިއްލަ އަށް ވިސްނާލާށެވެ.
ބަސްމޮށުންތެރިކަން އިތުރަށް ރަނގަޅުކޮށްދޭ!
ކޮންމެ މީހަކަށްވެސް އެމީހަކަށް އެނގޭ އަދި ގުޅޭ ވާހަކައެއް ދެއްކުމުން ނިކަން ބައިވެރިވެލާ އެ ވާހަކަ އަޑުއަހާ ހިތްވޭ ނޫން ހެއްޔެވެ؟ އަލަށް ވާހަކަދައްކާ ކަންކަން ދަސްކުރާ އުމުރުފުރައިގެ ކުދިންނަށް ވާހަކަ ކިޔައިދިނުމަކީ، ގިނަގިނައިން ވާހަކަ ދައްކަން ހިތްވަރުލިބި، މުވާސަލާތުކުރަން ދަސްވާނެ ކަމެކެވެ. އެހެންކަމުން ވާހަކަ ކިޔައިދޭ ގަޑީގައި އެކި އެކި އަޑުއަޑު ލައްވައިގެން ވީހާވެސް އެކުދިން ޝައުގުވެރިކުރުވާ އަދި ކުދިންނާއި ސުވާލުކޮށް ޚިޔާލު ބަދަލުކުރުމަކީ މިކަމުގެ ފައިދާ ހަގީގަތުގައިވެސް ކުރާނެ ކަމަކަށްވާނެ އެވެ.
ލޮޖިކް ސްކިލްސް އިތުރުވޭ!
އާންމުކޮށް ކުދިންނަށް ވާހަކަ ކިޔައިދޭ މީހެއްނަމަ ފާހަގަ ވާނެ އެއްކަމަކީ ކުދިންނަކީ އެއް ވާހަކައެއް ތަކުރާރުކޮށް ކިޔުމަށް ލޯބިކުރާ ބައެއްކަމެވެ. ބައެއް ފަހަރު ހަފްތާއެއް ވަންދެން ވެސް އެއް ފޮތެއް ނޫނީ އެއް ވާހަކައެއް އެއްގޮތަކަށް ކިޔައިދޭން ޖެހިދާނެ އެވެ. އަދި މިހެން ކިޔައިދޭނަމަ ފާހަގަވާނެ އެއްކަމަކީ ކުދިންނަށް އެ ފޮތުގައި ވާގޮތް ނިކަން ފުރިހަމަ އަށް ލަފްޒުން ލަފްޒަށް ދަސްވެފައިވާ ކަމެވެ. އަދި އެވާހަކައިގައި ދެން ވާނެ ގޮތްވެސް އެއްވެސް އޮޅުމަކާ ނުލައި އެކުދިންނަށް ބުނަން އެނގޭނެ އެވެ. މިއީ ކުދިންގެ ލޮޖިކް ސްކިލްސް ތަރައްގީވުމަށް ލިބޭ ވަރަށް ބޮޑު އެހީއެކެވެ. މަދަރުސީ ހަޔާތް ފެށި، ހިސާބުގެ އެކި ސުވާލުތައް ހަދަން ޖެހުމުން އަދި ކްރިޓިކަލް ތިންކިން ބޭނުންކުރަންޖެހުމުން މީގެ ފައިދާ ފެންނާނެ އެވެ.
ފޮތް ކިޔުމަށް ލޯބި ޖެހޭ!
ކޮންމެެއަކަސް ފޮތް ކިއުމަކީ ހަމަ ޔަގީނުންވެސް ކޮންމެ ބެލެނިވެރިއަކުވެސް އެމީހެއްގެ ދަރިއެއްގެ ކިބައިގައި ހަރުލައްވަން ބޭނުންވާނެ އާދައެކެވެ. މިކަން ކުރަން ބޭނުންވާނަމަ މަސައްކަތް ފަށައިގަންނަންވީ ކުއްޖާގެ އެންމެ ޅައުމުރުގަ އެވެ. އަދި ނިދާ ގަޑީގައި ކިޔައިދޭ ވާހަކަތަކަކީ ކުދިން ފޮތް ކިޔުމަށް ޝައުގުވެރިކޮށްދީ އެކަމުގެ އާދަ ހަރުލެއްވުމަށް ކުރެވޭނެ އެންމެ ފަސޭހަ އަދި އެންމެ މުހިންމު ކަމެވެ.
