ނަފްސާނީ ދުޅަހެޔޮކަމުގެ ދާއިރާއިން މާސްޓާސް ފެންވަރުގެ 30 ސްކޮލަޝިޕަށް ހުޅުވާލަން ނިންމާފައިވާކަން ރައީސް އިބްރާހިމް މުހައްމަދު ސޯލިހް އިއުލާން ކުރައްވައިފި އެވެ.
ނޭޝަނަލް ސްކިލްސް ޑިވެލޮޕްމެންޓް މާސްޓާސް ޕްލޭންގެ ނަމުގައި ގައުމުގެ ތަރައްގީއަށް ބޭނުންވާ މީހުން ބިނާކުރުމަށް މިއަދު ފެށި ޕްލޭނުގެ އިފްތިތާހީ ރަސްމިއްޔާތުގައި ވާހަކަ ދައްކަވަމުން ރައީސް ވިދާޅުވީ އިގްތިސޯދީ ގޮތުންނާއި، އިޖުތިމާއީ ގޮތުން ރާއްޖެއަށް އަންނަ ބަދަލުތަކަށް ބަލާއިރު، މީހުން ބިނާކުރަންޖެހޭ ވަރަށް ގިނަ ދާއިރާތައް ހުރި ކަމަށެވެ.
އޭގެ ތެރެއިންވެސް މެންޓަލް ހެލްތުގެ ދާއިރާއަކީ ވަރަށް ހާއްސަ އިސްކަމެއްދީގެން މީހުން ބިނާކުރަން ޖެހިފައިވާ ދާއިރާއެއްކަން ރައީސް ފާހަގަ ކުރެއްވި އެވެ.
"މެންޓަލް ހެލްތުގެ ދާއިރާއިން، ކްލިނިކަލް ސައިކޮލޮޖީ އާއި، ޕްރޮފެޝަނަލް ކައުންސެލިންގް އަދި އެޑިކްޝަން ސްޓަޑީޒްގެ ސްކޮލާޝިޕްތައް ހިމެނޭގޮތަށް މާސްޓާސް ފެންވަރުގެ 30 ސްކޮލާޝިޕްގެ ފުރުސަތު ސަރުކާރުން ވަރަށް އަވަހަށް ހުޅުވައިލާނަން،"
ރައީސް ވިދާޅުވީ މީހުން ބިނާކުރުމަކީ ގައުމުގެ ކުރިމަގަށްޓަކައި ރައްކާކުރެވޭ ވަރަށް އަގުބޮޑު ރައުސްމާލެއް ކަމަށެވެ. އެކަމަށްޓަކައި ސަރުކާރުން ކުރާ މަސައްކަތުގައި ހުރިހާ ބެލެނިވެރިން އެއްބާރުލުން ދިނުމަށް ރައިސް ވަނީ ގޮވާލައްވައިފަ އެވެ.
ރާއްޖޭގެ ވަޒީފާގެ ބާޒާރަށް ދިމާވެފައިވާ ގިނަ ގޮންޖެހުންތަކަކަށް، މިއަދު އިފްތިތާހް ކުރި ޕްލޭނަށް އަމަލުކުރަން ފެށުމުން ހައްލެއް ލިބިގެންދާނެ ކަމަށް ރައީސް ވިދާޅުވި އެވެ.
ރާއްޖޭގައި މީހުން ބިނާކުރުމުގެ މަސައްކަތް އަބަދުވެސް ކުރެ އެވެ. އެކަމަކު ރާއްޖޭގެ އިގްތިސާދީ ދާއިރާއަށް، ނުވަތަ ވަޒީފާގެ ބާޒާރަށް އެންމެ ބޮޑަށް މީހުން ބޭނުންވެފައިވާ ދާއިރާތަކުން ހުނަރުވެރި މަސައްކަތްތެރިން އުފެއްދުމަށް އަމާޒުކޮށްގެން މީގެ ކުރިން މިފަދަ މަސައްކަތެއް ކޮށްފައި ނުވާކަން ރައީސް ފާހަގަކުރެއްވި އެވެ.
