މީހުން ބިނާ ކުރުމަށްޓަކައި ސަރުކާރުން ކުރާ މަސައްކަތުގައި ހުރިހާ ބެލެނިވެރިން ވަރަށް ބޮޑަށް އެއްބާރުލުން ދެއްވުމަށް ރައީސް އިބްރާހިމް މުހައްމަދު ސޯލިހް މިއަދު ގޮވާލައްވައިފި އެވެ.
ނޭޝަނަލް ސްކިލްސް ޑިވެލޮޕްމެންޓް މާސްޓާ ޕްލޭންގެ ނަމުގައި ގައުމުގެ ތަރައްގީއަށް ބޭނުންވާ މީހުން ބިނާކުރުމަށް މިއަދު ފެށި ޕްލޭނުގެ އިފްތިތާހީ ރަސްމިއްޔާތުގައި ރައީސް ވިދާޅުވީ އެ ޕްލޭންގެ އަމާޒަކީ، ވަޒީފާތައް އަދާކުރާނެ ފަންނީ ހުނަރުވެރިން އުފެއްދުން ކަމަށެވެ. އެކަމުގެ ސަބަބުން ރަށްރަށުގެ ވަރަށް ގިނަ ބަޔަކަށް ވަޒީފާގެ ފުރުސަތު ލިބޭނެ ކަމަށާއި ހާއްސަކޮށް ރާއްޖޭގެ ވަޒީފާގެ ބާޒާރުގައި، އަންހެނުންނާއި ފިރިހެނުންގެ ފަރަގު ކުޑަވާނެ ކަމަށް ރައީސް ވިދާޅުވި އެވެ.
މިއީ ރާއްޖޭގެ އިގްތިސޯދީ ދާއިރާއަށް، ނުވަތަ ވަޒީފާގެ ބާޒާރަށް އެންމެ ބޮޑަށް މީހުން ބޭނުންވެފައިވާ ދާއިރާތަކުން، ހުނަރުވެރި މަސައްކަތްތެރިން އުފެއްދުމަށް އަމާޒުކޮށްގެން، މާސްޓާ ޕްލޭނެއް އެކުލަވައިލި ފުރަތަމަ ފަހަރެވެ.
ރައީސް ވިދާޅުވީ މީގެ ސަބަބުން ރާއްޖޭގެ ތަރައްގީގައި ދެޖިންސުގެ ޒުވާނުންގެ ހިއްސާ ވަރަށް ބޮޑަށް އިތުރުވެގެންދާނެ ކަމަށާއި ޕްލޭން އެކުލަވައިލާފައި ވަނީ، ކުރިއަށް އޮތް ފަސް އަހަރަށް އަމާޒުކޮށްގެން ކަމަށެވެ.
ރައީސް ވިދާޅުވީ ރާއްޖޭގެ ވަޒީފާގެ ބާޒާރަށް އެންމެ ބޮޑަށް މީހުން ބޭނުންވެފައިވާ ހުރިހާ ދާއިރާތަކާއި، ރާއްޖޭގެ މީހުން ތަމްރީނު ކުރަމުން އަންނަ ދާއިރާތަކާ ދެމެދު އޮތް ހުސްކަން، އެ ޕްލޭންގެ އެހީގައި ކުޑަކުރެވިގެންދާނެ ކަމަށެވެ..
"ސަރުކާރުގެ ޕްލޭން އެކުލަވާލާފައި ވަނީ، ކުރު މުއްދަތުގައި ހާސިލުކުރާނެ ކަންތައްތަކާއި، ދިގު މުއްދަތުގައި ކުރާނެ ކަންތައްތަކެއް ހިމަނައިގެން. އޭގެ ތެރެއިން އެންމެ މުހިންމު އެއްކަމަކީ، މީހުން ބިނާކުރުމުގެ މަސައްކަތް ލާމަރުކަޒުކޮށް، ރާއްޖޭގެ އެކި ހިސާބުތަކުގައި ޓިވެޓު ސެންޓަރުތަކެއް ގާއިމުކުރުން،" ކަމަށް ރައީސް ވިދާޅުވި އެވެ.
އެ ޕްލޭނަކީ ގައުމަށް ވަރަަށް މުހިންމު މަސައްކަތެއް ކަމަށައި އެކަމުގެ ސަބަބުން ނުކުންނާނެ ނަތީޖާ ރާއްޖޭގެ ހުރިހާ އަތޮޅުތަކުންވެސް ފެންނާނެ ކަން ރައީސް ފާހަގަ ކުރެއްވި އެވެ.
ރައީސް ވިދާޅުވީ އެ ޕްލޭންގެ މަގްސަދަކީ ރާއްޖޭގައި ތިބި ފަންނީ މަސައްކަތަށް ހުނަރުވެރި ޒުވާނުންނަށް ބޭނުންވަނީ އެ ޒުވާނުންގެ ކިބައިގައި ހުރި ހުނަރުވެރިކަމާއި ފަންނުވެރިކަން ތަރައްގީކޮށް، ހަޔާތުގެ އަމަލީ މައިދާނުގައި، އޭގެ ބޭނުން ހިފޭނެ މަގު ތަނަވަސްކޮށްދިނުން ކަމަށެވެ.
"ސަރުކާރުން މިކުރާ މަސައްކަތުގައި ހުރިހާ ބެލެނިވެރިން ވަރަށް ފުރިހަމަ އެއްބާރުލުމެއް ދެއްވުމަށް އަޅުގަނޑު ގޮވާލަން. ސަރުކާރުން ފަހިކޮށްދޭ މިފަދަ ފުރުސަތުތަކުގެ ބޭނުން ހިފައި، ޒުވާނުންގެ ކިބައިގައި ހުރި ހުނަރާއި ފަންނު ކުރިއަރުވައި ތަރައްގީކުރަން ޖެހޭ،" ރައީސް ވިދާޅުވި އެވެ.
