މެޑްރިޑް (އޮގަސްޓް 25) - އެތުލެޓިކޯ މެޑްރިޑަށް ކުޅޭ ސްޕެއިންގެ ހުނަރުވެރި މިޑްފީލްޑަރު ސައުލް ނިގޭޒަށް ޗެލްސީ އާއި މެންޗެސްޓާ ޔުނައިޓެޑުން ޕްރޮޕޯސަލެއް ހުށަހަޅައިފި އެވެ.
ސްޕެއިނުގެ މީޑިއާ ރިޕޯޓްތައް ބުނާގޮތުން އަންނަ އަންގާރަ ދުވަހު ޓްރާންސްފާ މާކެޓް ބަންދުވުމުގެ ކުރިން ޔުނައިޓެޑާއި ޗެލްސީން ބޭނުންވަނީ ލޯން އެއްބަސްވުމެއްގެ ދަށުން ސައުލްގެ ސޮއި ހޯދާށެެވެ. އެއީ އެއް ސީޒަން ފަހުން ދާއިމީ ކޮންޓްރެކްޓެއްގައި ސައުލް ގަންނަ ގޮތަށެވެ. އެތުލެޓިކޯ އިން ސައުލް ވިއްކާލަން ކިޔާ އަގު މިހާރު އުޅެނީ 60 މިލިއަން ޑޮލަރުގަ އެވެ.
އެތުލެޓިކޯ އިން މި ފަހަރުގެ ޓްރާންސްފާ މާކެޓްގައި އުމުރުން 26 އަހަރުގެ ސައުލް އެ ޓީމު ދޫކޮށްދާނެ ކަމަށް ބަލައި ވަނީ އިޓަލީގެ އުދިނޭޒީ އަށް ކުޅޭ އާޖެންޓީނާ ގައުމީ ޓީމުގެ ރޮޑްރީގޯ ޑެ ޕޯލް ގެނެސްފަ އެވެ. ލަލީގާގެ އާ ސީޒަނުގައި އެތުލެޓިކޯ އިން ކުޅުނު ދެ މެޗުގައި ސައުލް ބޭނުންކޮށްފައިވަނީ އާންމުކޮށް އޭނާ ކުޅޭ މަގާމުގައެއް ނޫނެވެ. އެހެންވެ، ސައުލް ޓީމު ދޫކޮށްލުމުގެ ފުރުސަތު ބޮޑެވެ.
މި ސީޒަނުގައި އެތުލެޓިކޯގެ މެޗެއްގެ ތެރެއިން ސައުލް ބޯޅަ ހިފައިގެން.
ސައުލް އެތުލެޓިކޯ ދޫކޮށްލަން ބޭނުންވާ އެންމެ ބޮޑު ސަބަބަކީ ސްޕެއިން ގައުމީ ޓީމުން ގަވާއިދުން ޖާގަ ހޯދަން ބޭނުންވާތީ އެވެ. އެތުލެޓިކޯ އިން މިދިޔަ ސީޒަނުގައި ސްޕެނިޝް ލީގުގެ ޗެމްޕިއަންކަން ހޯދިއިރު، މޮޅު ކުޅުމެއް ދެއްކި ސައުލް އަށް ޔޫރޯގައި ވާދަކުރި ސްޕެއިން ސްކޮޑުން ފުރުސަތު ނުލިބެ އެވެ. އެހެންވެ، ސައުލް ބޭނުންވީ އިނގިރޭސި ޕްރިމިއާ ލީގުގެ ކްލަބަކަށް ކުޅެ ސްޕެއިން ޓީމުން ފުރުސަތު ހޯދުމަށެވެ.
ޔުނައިޓެޑާއި ޗެލްސީން ޓްރާންސްފާ މާކެޓް ބަންދުވުމުގެ ކުރިން އެ ޓީމަށް ކުޅޭ ބައެއް ކުޅުންތެރިން ވިއްކާލުމަށް ފަހު ކުރިއަށް އޮތް ދުވަސްތަކުގައި ސައުލް ހޯދަން ކުރާ މަސައްކަތް ވަރުގަދަ ކުރާނެ އެވެ.
ޗެލްސީގެ ކޯޗު ތޯމަސް ޓުޗެލް ވަނީ ވާތުފައިން ކުޅޭ ސެންޓްރަލް މިޑްފީލްޑަރެއް ބޭނުންވާކަން ކްލަބްގެ ބޯޑަށް އަންގައިފަ އެވެ. އެ ގޮތުން ޓުޗެލްގެ ޓެކްނިކަލް ސްޓާފުންނަށް އެންމެ ކަމުދިޔަ ކުޅުންތެރިއަކީ ސައުލް އެވެ. ޔުނައިޓެޑުން ފްރެޑާއި ނަމާންޏާ މަޓިޗް ކުޅޭތަނަށް ފެންވަރު ރަނގަޅު ސެންޓްރަލް މިޑްފީލްޑަރެއް ހޯދަން ކުރާ މަސައްކަތުގައި އެއް ވަނަ ޓާގެޓަކީ ސައުލް އެވެ. މީގެ ކުރިން ރެނެސްގެ އެޑުއާޑޯ ކަމަވިންގާ އަށް ޔުނައިޓެޑުން ފާރަލި ނަމަވެސް މިހާރު ވަނީ އެ މަސައްކަތް ހުއްޓާލައިފަ އެވެ.
އެތުލެޓިކޯގެ އެެކެޑަމީން ޕްރޮމޯޓްވި ސައުލް ސީނިއާ ޓީމަށް ފުރަަތަމަ މެޗު ކުޅުނީ އުމުރުން 17 އަހަރުގަ އެވެ. އެއީ 2012 ވަނަ އަހަރު ޔޫރޮޕާ ލީގު މެޗެއްގައި ބެސިކްޓާސްއާ ދެކޮޅަށެވެ. އެތުލެޓިކޯ އަށް މިހާތަނަށް ކުޅެދިން 339 މެޗުން ސައުލް ވަނީ 43 ގޯލު ޖަަހައި 20 ގޯލު ޖަަހަން ފުރުސަތު ތަނަވަސްކޮށްދީފަ އެެވެ. އޭނާ ވަނީ އެ ޓީމާ އެކު ހަ ތަށި އުފުލާލައިފަ އެވެ. އޭގެ ތެރޭގައި ސްޕެނިޝް ލީގު އެއް ފަހަރާއި ޔޫރޮޕާ ލީގު ދެ ފަހަރު ހިމެނެ އެވެ.
