މެޑްރިޑް (އޮގަސްޓް 25) - ސްޕެއިނުގެ ގަދަބާރު ރެއާލް މެޑްރިޑުން ޕީއެސްޖީގެ ފްރާންސް ތަރި ކީލިއަން އެމްބާޕޭ ގަންނަން 188 މިލިއަން ޑޮލަރުގެ ބިޑެއް ހުށަހަޅައިފި އެވެ.
ޓްރާްންސްފާ މާކެޓް ބަންދުވަން ހަފްތާ އަކަށް ވުރެ ކުޑަ ދުވަސްކޮޅަކަށް ވެފައި ވަނިކޮށް ރެއާލުން އެމްބާޕޭ އަށް މި ވަރުގެ ބިޑެއް ކުރީ ޕީއެސްޖީގައި މަޑުނުކުރަން އެމްބާޕޭ ނިންމާފައިވާކަން އެ ކްލަބަށް އޭނާ އެންގުމުން ކަމަށް ފްރާންސްގެ މީޑިއާ ރިޕޯޓްތައް ބުނެފި އެވެ.
މީގެ ކުރިން ޕީއެސްޖީގެ ރައީސް ނާސިރު އެލް ހެއްލާފީ ވަނީ ތަކުރާރުކޮށް އެކި ނޫސްވެރިންގެ ބައްދަލުވުންތަކުގައި އެމްބާޕޭ ނުވިއްކާނެ ކަމަށް ވިދާޅުވެފަ އެވެ. އެކަމަކު، ޕީއެސްޖީން ހިލޭ ޓްރާންސްފާއެއްގައި ލިއޮނަލް މެސީ ގެނައި ފަހުން އެމްބާޕޭގެ މުސްތަގުބަލާ މެދު އޮތީ ވަރަށް ބޮޑަށް ސުވާލު އުފެދިފަ އެވެ.
އިޓަލީގެ މީޑިއާ ރިޕޯޓްތައް ބުނާގޮތުން މިދިޔަ ހަފްތާގައި އެމްބާޕޭ އާއި ޕީއެސްޖީގެ ރައީސް ހެއްލާފީ ވަނީ ބައްދަލުކޮށްފަ އެވެ. އެ ބައްދަލުވުމުގައި އެމްބާޕޭ ވަނީ އޭނާ ޕީއެސްޖީއާ އެކު ދެން އިތުރު ކޮންޓްރެކްޓެއްގައި ސޮއިނުކުރާނެ ކަމަށް ބުނެފަ އެވެ.
މިދިޔަ ސީޒަނުގައި ޕީއެސްޖީން އެމްބާޕޭ އަށް ހަތަރު އަހަރުގެ އެއްބަސްވުމެއް ހުށަހެޅި އެވެ. އެއީ އަހަރަކު 36 މިލިއަން ޔޫރޯ (43 މިލިއަން ޑޮލަރު) ލިބޭ ގޮތަށެވެ. އެކަމަކު, އެ ކޮންޓްރެކްޓްގައި ސޮއިކުރަން އެމްބާޕޭ ބޭނުމެއް ނުވި އެވެ.
އެމްބާޕޭ މި ވަގުތު ޕީއެސްޖީއާ އެކު ހުރީ އަންނަ އަހަރުގެ ޖޫންގެ ނިޔަލަށް މުއްދަ ހަމަވާ ކޮންޓްރެކްޓެއްގަ އެވެ. ފީފާ ގަވާއިދުގައިވާ ގޮތުން ކުޅުންތެރިއަކު ބޭނުންނަމަ ކޮންޓްރެކްޓް ހަމަވުމުގެ ހަ މަސް ކުރިން ކުޅުންތެރިއަކު ބޭނުންވާ ކްލަބަކަށް ޕްރީ އެގްރީމެންޓެއްގައި ސޮއިކުރެވޭނެ އެވެ. މާނަ އަކީ ޖެނުއަރީ މަހު އެމްބާޕޭ ބޭނުން ޓީމަކާ އެކު ސޮއިކުރެވޭނެ އެވެ. އެއީ ސީޒަން ނިންމާފައި އެ ޓީމަކާ ގުޅޭ ގޮތަށެވެ.
ރެއާލްގެ މި ބިޑާ އެކު ޕީއެސްޖީން އެމްބާޕޭ ވިއްކާލުމުގެ ފުރުސަތު ބޮޑެވެ. އެއީ އަންނަ އަހަރު ހިލޭ ޓްރާންސްފާއެއްގައި އޭނާ ގެއްލެން ބޭނުންނުވާނެތީ އެވެ. ފްރާންސްގެ މީޑިއާ ރިޕޯޓްތައް ބުނާގޮތުން އެމްބާޕޭ ވިއްކާލުމަށް ފަހު ޕީއެސްޖީން ގެންނަން ފާރަލާނީ އެވަޓަންގެ ބްރެޒިލް ފޯވާޑް ރިޗާލިސަން އެވެ.
ދާދި ފަހުން ރެއާލްގެ ކޯޗު ކާލޯ އަންޗެލޮޓީ ވަނީ އެމްބާޕޭ ރެއާލަށް ގެންނަން އުޅޭ ވާހަކަތަކާ ބެހޭ މައުލޫމާތެއް އޭނާ އަށް ލިބިފައިނުވާ ކަމަށް ބުނެފަ އެވެ.
ޕީއެސްޖީން އެންމެ ފުރަތަމަ އެމްބާޕޭ ގެނައީ 2017 ވަނަ އަހަރު ލޯން އެއްބަސްވުމެއްގެ ދަށުންނެވެ. އޭގެ އެއް އަހަރު ފަހުން ޕީއެސްޖީން ދާއިމީ ކޮންޓްރެކްޓެއްގައި އެމްބާޕޭ މަޑުކުރުވީ 226 މިލިއަން ޑޮލަރު މޮނާކޯ އަށް ދީފަ އެވެ.
އެމްބާޕޭ ވަނީ މިހާތަނަށް ޕީއެސްޖީ އަށް ކުޅުނު 174 މެޗުން 133 ގޯލު ޖަހައި 63 ގޯލު ޖަހަން ފުރުސަތު ތަނަވަސްކޮށްދީފަ އެވެ. ފްރާންސާ އެކު 2018 ވަނަ އަހަރުގެ ފީފާ ވޯލްޑް ކަޕް ކާމިޔާބުކުރި އެމްބާޕޭ ވަނީ މިހާތަނަށް ޕީއެސްޖީއާ އެކު ބޮޑު މުބާރާތްތަކުގެ ތެރެއިން 11 ތަށި އުފުލާލައިފަ އެވެ. އޭގެ ތެރޭގައި ތިން ފްރެންޗް ލީގު ތަށި ހިމެނެ އެވެ.
