ރަނގަޅު ސްކިން ކެއާ ރޫޓިންއެއްގެ ބިންގަލަކީ ހަމަގައިމުވެސް ކްލީންސާ އެވެ. ގިނަ ބަޔަކު ބުނާގޮތުގައި ރަނގަޅު ފޭސް ވޮޝްއެއް ނުވަތަ ކްލީންސާ އަކީ ސްކިން ކެއާއެއްގެ ޝޭމްޕޫ އެވެ. ޒަރޫރީ އެހެން ނަމަވެސް ގިނަ ފަހަރަށް ފަރުވާ ކުޑަ ކުރެވޭ އެއްޗެކެވެ.
ކްލީންސިން މިހާ މުހިންމުވާ ސަބަބުތައް ގިިނަ އެވެ. މިގޮތުން ރަނގަޅަށް މޫނު ސާފުނުކޮށްފިނަމަ ދެން މޫނުގައި ހާކާ ޕްރޮޑަކްޓްތަކުން އެކަށީގެންވާ އަސަރެއް ނުކުރާނެ އެވެ. މި ހިމަނާލަނީ މޫނު ދޮވުމުގައި އާންމުކޮށް ހެދޭ މިސްޓޭކްތަކެވެ.
ހަންގަނޑާ ނުގުޅޭ ފޯމިއުލާއެއް ބޭނުންކުރެވުން
ސްކިން ކެއާ ރޫޓިން އެއް ގެންގުޅުމުގެ އެންމެ ބޮޑު ބޭނުމަކީވެސް އެމީހެއްގެ ހަންގަނޑަށް ބޭނުންވާ ކަންކަން ފުރިހަމަ ކޮށްދިނުމެވެ. އެހެންކަމުން ކޮންމެ ކޮންމެ ފޭސް ވޮޝް ނުވަތަ ކްލީންސާ އަކީ އެންމެންގެ ހަންގަނޑާއި ގުޅޭ އަދި އެމީހަކު ހާސިލް ކުރަން ބޭނުންވާ ކަންކަން ފުރިހަމަ ކޮށްދޭނޭ ބާވަތަކަށް ނުވެދާނެ އެވެ. އެހެންކަމުން ފުރަތަމަ ކަމަކަށް އެމީހެއްގެ ހަމަކީ "ނޯމަލް", "އޮއިލީ" ނުވަތަ "ޑްރައި" ސްކިންއެއްތޯ ބަލައި ޔަގީންކޮށް އެމީހަކާއި ގުޅޭ ބާވަތެއްގެ ޕްރޮޑަކްޓެއް ހޯދުން މުހިންމުވެ.
މާ ބޮޑަށް ސްކްރަބް ކުރެވުން
މޫނަކީ ތެލީގެ ފުލެއް ނޫނެއް ނޫން ހެއްޔެވެ. އެހެންކަމުން ގައިގައި ހުރި ބާރެއް ލާފައި މޫނު ދޮވުމަކުން ވާނެ ފައިދާއެއް ނެތެވެ. މާ ބާރަށް މޫނު ދޮވުމުން ނުވަތަ "ސްކްރަބް" ކުރުމުން ހަންގަނޑުގެ އެންމެ ބޭރަށް ހުންނަ ފަށަލައަށް ގެއްލުންވާނެ އެވެ. އެހެންކަމުން މޫނު ދޮންނަންވީ ކުޑަ މަސާޖެއް ހެންނެވެ. މަޑު ޕްރެޝަރަކާއި އެކީ ލޯބިިންނެވެ. އަވަސް އަވަސް ކުރުމުގެ ބަދަލުގައި އޯގާތެރިކަމާއި މަޑުމައިތިރިކަން އިސްކުރާށެވެ. މި މުޅި ޕްރޮސެސްއަސް ގާތްގަނޑަކަށް 30 ސިކުންތާއި 60 ސިކުންތާއި ދެމެދުގެ ވަގުތުކޮޅެއް ނަގާނެ އެވެ.
މާ ބައިވަރު އެސިޑް ބޭނުންކުރުން
މިއީ ވަރަށް ބޮޑަށް ވިސްނާލަންޖެހޭ ކަމެކެވެ. ސްކިން ކެއާގައި ނަން ހުސްކޮށް އެކި ވައްތަރުތަކުގެ އެސިޑްގެ ބާވަތްތައް މިހާރު ހުރެ އެވެ. އެހެން ނަމަވެސް ފަހަރަކު އެސިޑްއެއް މަތިމައްޗަށް ހޭކުމުން އަނެއްކާވެސް ސްކިން އިރިޓޭޓްވުމުގެ ފުރުސަތު ބޮޑުވެ އެވެ. ހާއްސަކޮށް ސެންސިޓިވް ސްކިންއެއް ނަމަ މޫނު ރަތްވުމާއި ކުޑަ ދިލައެއް ހުރުން ފަަދަ މައްސަލަތައް ގިނަ އެވެ.
ހަމުގެ ޑޮކްޓަރުން ވިދާޅުވާ ގޮތުގައި އެމީހެއްގެ ރޫޓިންގައި އޭއެޗްއޭ ނުވަތަ ބީއެޗްއޭ ހިމެނޭނަމަ ކޮންމެވެސް އެއް ބާވަތެއްގެ އެސިޑެއް ހިމެނުމުން ފުދޭނެ އެވެ. އަދި ދެން ބޭނުންކުރާ ޕްރޮޑަކްޓް ތަކުގައި އެކްޓިވް އިންގްރިޑިއަންޓްސްތަކެއް ހިމެނުމަކީ މުހިންމުކަމެކެވެ. މިގޮތުން އެންމެ މުހިންމީ ސެރަމައިޑްސް ހިމެނުމެވެ. ސެރަމައިޑްސް އަކީ ގުދުރަތީގޮތުންވެސް ހަމުގައި ހިމެނޭ މާއްދާއެކެވެ. އަދި ސްކިން ބެރިއާގެ ފަންސާސް އިންސައްތަ އަކީ ސެރަމައިޑްސް އަށް ވާއިރު މީގެ ސަބަބުން ހަމުގެ ތެތްކަން ހިފަހައްޓައިދީ ނުރައްކާތެރި މާޢްދާތަކުން ދުރުކޮށްދޭނެ އެވެ.
ފުރަތަމަ މޭކަޕް ނުފޮހުން
މޫނު ދޮވުމުގައި ޑަބަލް ކްލީންސިން ޓްރެންޑްވެގެން އައީ މީގެ އަހަރުތަކެއް ކުރިންނެވެ. ޑަބަލް ކްލީންސިންއަކީ ފުރަތަމަ އޮއިލް ބޭސްޑް ކްލީންސާ އަކުން މޫނު ދޮވުމަށްފަހު ދެވަނަ ފަހަރަށް އާންމު އެހެން "ވޯޓާ-ބޭސްޑް" ކްލީންސާ އަކުން ދޮވުމެވެ. އޮއިލް ބޭސްޑް ކްލީންސާއަކުން ފުރަތަމަ ދޮވުމުގެ ބޭނުމަކީ މޫނުގައި ހުންނަ މޭކަޕް އާއި ސަންސްކްރީން ރަނގަޅަށް ފޮހެލުމެވެ. އަދި ދެވަނަ ކްލީންސާއިން ހަންގަނޑު ސާފުކޮށްދީ ތާޒާކޮށް އަދި ހައިޑްރޭޓް ކޮށްދެ އެވެ.
މިފަހަކަށްް އައިސް މި ދެކަންތައް އެއްފަހަރާ ކުރެވޭ ކްލީންސާތައްވެސް ވަނީ ތައާރަފްވެފަ އެވެ.
މާ ގިނައިން މޫނު ދޮވުން
ކޮންމެ ދުވަހަކު ހެނދުނު ހެނދުނާ މޫނު ދޮންނަން ކޮންމެހެން ޖެހޭބާ އެވެ؟ މިއީ މިފަހުން އެންމެ ބޮޑު ބަހުސްއެއް ކުރެވެމުންދާ އެއް ސުވާލެވެ. އެއްބައި މާހިރުން ބުނާގޮތުން ހެނދުނު މޫނު ދޮވުމަކީ ކޮންމެހެން ވެސް މުހިންމު ކަމެކެވެ. ސަބަބަކީ ނިދީގައި ބެކްޓީރިއާ އާލާވުމުގެ ފުރުސަތު އޮންނާތީ އެވެ. އަނެއް ބަޔަކު ބުނާގޮތުން ސްކިން ރިޕެއާ ވުމަށް ގިނަ ވަގުތު ދިނުމުގެ ގޮތުން ރަނގަޅީ ހެނދުނު މޫނު ނުދޮވުމެވެ. އެހެން ނަމަވެސް ގިނައިން ބިހި ފަޅާ، އޮއިލީ ސްކިންއެއް ނަމަ މޫނު ދޮވުމަކީ މުހިންމު ކަމެކެވެ.
