ސޯޝަލް މީޑިއާ ފަދަ މުއާސަލާތީ ވަސީލަތަކުން އިސްލާމްދީނަށް ފުރައްސާރަކުރުން ވެސް ކުށަކަށް ހަދަން ގާނޫނުލްއުގޫބާތު އިސްލާހުކުރާ ބިލު ރައްޔިތުންގެ މަޖިލީހަށް މިއަދު ހުށަހަޅައި، އިބްތިދާއީ ބަހުސް ފަށައިފި އެވެ.
ސަރުކާރުގެ ފަރާތުން ތުޅާދޫ ދާއިރާގެ މެމްބަރު ހިސާން ހުސެއިން ހުށަހެޅުއްވި ބިލުގައި ވަނީ ގާނޫނުލްއުގޫބާތުގެ 617ވަނަ މާއްދާއަށް އަކުރެއް އިތުރު ކުރުމަށެވެ.
އެ ބިލު މަޖިލީހަށް މިއަދު ހުށަހަޅައި ދެއްވަމުން ހިސާން ވިދާޅުވީ ރައްޖެއަކީ އިސްލާމީ ގައުމެއް ކަމަށާއި މުޅި ދައުލަތް ތަރުތީބުވެ ބައްޓަންކުރަންވާނީ އިސްލާމީ އުސޫލުތަކުގެ މައްޗަށް ކަމަށް ގާނޫނުއަސާސީގެ އެކި މާއްދާތަކުން ކަނޑައަޅާފައިވާ ކަމަށެވެ.
"އިސްލާމްދީން މަތިވެރިކޮށް، ރާއްޖޭގެ އިސްލާމީ ވެށި ހިމާޔަތްކޮށް އިސްލާމީ ސަގާފަތު ވަނީ ގާނޫނުއަސާސީގައި ބިންވަޅު ނަގާފައި. އެއީ ދުސްތޫރީ ގޮތުން ކަނޑައެޅިފައި ހުރި އަސާސްތަކެއް. ބަދަލުނުކުރެވޭނެ ހަގީގަތްތަކެއް،" ހިސާން ވިދާޅުވި އެވެ.
އެގޮތުން، ގާނޫނުއަސާސީން ލިބިދީފައިވާ ހިޔާލުފާޅު ކުރުމުގެ މިނިވަންކަމުގެ ވެސް އިމެއް އޮންނަ ކަމަށާއި، އިސްލާމްދީނުގެ އަސްލަކާ ހިލާފުނުވާ ގޮތެއްގެ މަތީން މެނުވީ ހިޔާލުފާޅުނުކުރެވޭނެ ގޮތަށް ދުސްތޫރީ ގޮތުން ކަނޑައަޅާފައިވާ ކަމަށެވެ.
titledesc
މި ބިލާ އެކު އެފަދަ ކަންކަން ޖިނާއީ ކުށެއް ކަމުގައި ކަނޑައަޅައި، އެފަދަ ކަންކަން ތަހުގީގުކޮށް އެފަދަ ކަންކަން ކުރާ މީހުންގެ މައްޗަށް ދައުވާކޮށް އަދަބު ދެވޭ ގޮތަށް މިބިލުން ނިޒާމެއް އެކަށައަޅާ ކަމަށް ހިސާން ވިދާޅުވި އެވެ.
މި ބިލު ހުށަހަޅާފައިވަނީ ދީނާ ގުޅުވައި މުސްލިމަކު ކާފަރެއްގެ ގޮތުގައި ސިފަކުރުން ޖިނާއީ ކުށަކަށް ހަދަން މިދިޔަ ދައުރުގައި ހިސާން ހުށަހެޅުއްވި ބިލަށް ބޮޑެތި ފާޑުކިޔުންތައް އަމާޒުވެ، އެ ބިލުގެ މަސައްކަތް މަޖިލީހުގައި ހުއްޓިފައިވަނިކޮށެވެ.
ގާނޫނުލްއުގޫބާތުގެ 617 ވަނަ މާއްދާ މިހާރު އޮތް ގޮތް
އެ މާއްދާގައި ބުނެފައިވާ ގޮތުން، މުއާސަލާތީ ވަސީލަތެއް ބޭނުންކޮށްގެން ނުވަތަ އާންމުންގެ ކުރިމަތީގައި، އިސްލާމްދީނަށް ތައުހީނުކުރުމުގެ ނިޔަތުގައި އިސްލާމްދީނަށް ފާޑުކިޔައި، ދީނީ ތަގްރީރުކުރުމަކީ ކުށެކެވެ.
އިސްލާމްދީނަށް ތައުހީނުކުރުމުގެ ނިޔަތުގައި އިސްލާމްދީނަށް ފާޑުކިޔައި، އެކިއެކި ލިޔުންތައް ތައްޔާރުކުރުމާއި، ބެހުމާއި، ވިއްކުމާއި، އުފެއްދުމަކީ ވެސް ކުށެކެވެ.
އޭގެ އިތުރުން، އަޅުކަންކުރަން ގެންގުޅޭ ބުދު އުފެއްދުން ނުވަތަ އަތުގައި ބެހެއްޓުން ނުވަތަ ގެންގުޅުން، ނުވަތަ ދިނުން ނުވަތަ ވިއްކުން ނުވަތަ ފެތުރުން ނުވަތަ ރާއްޖެއަށް ގެނައުމަކީ ވެސް އެ މާއްދާގައިވާ ގޮތުން ކުށެކެވެ.
މާއްދާގައިވާ ގޮތުން، ދިވެހި ރައްޔިތުންގެ ދީނީ އެއްބައިވަންތަކަން ނަގާލުމަށް މަސައްކަތް ކުރުމާއި، މީހުންގެ މެދުގައި ދީނީގޮތުން ބައިބައިވުން އުފެދޭ ބާވަތުގެ ވާހަކަ ދެއްކުމާއި، އެފަދަ ގޮތްގޮތަށް އަމަލުކުރުމަކީ ވެސް ކުށެވެ.
މި މާއްދާގައި ހިމެނޭ ކުށްތަކަކީ، ޖުނަހްގެ އެއްވަނަ ދަރަޖައިގެ ކުށެކެވެ. މާނައަކީ، އެ ކުށުގެ އަދަބުގެ ގޮތުގައި އެއް އަހަރު ދުވަހަށްވުރެ ދިގުނޫން މުއްދަތަކަށް ޖަލަށްލެވުމެވެ. ނުވަތަ ބޮޑު އަދަދަކުން ޖޫރިމަނާ ކުރުމެވެ.
ގާނޫނުލްއުގޫބާތަށް 2015 ވަނަ އަހަރުގެ ޖުލައި މަހުން ފެށިގެން އަމަލު ކުރަމުން އަންނައިރު، މިހާތަނަށް މި މާއްދާގެ ދަށުން މީހަކަށް ކުށެއް ސާބިތުވި ކަމެއް ނުވަތަ މާއްދާގެ ދަށުން އެއްވެސް ދައުވާއެއް އުފުލި ކަމެއް އެނގިފައެއް ނެތެވެ.
