ކުރީގެ ޖެންޑާ މިނިސްޓަރު ޝިދާތާ ޝަރީފް އަދާލަތު ޕާޓީން ވަކިވެ، މޯލްޑިވްސް ނެޝަނަލް ޕާޓީ (އެމްއެންޕީ) އާ ގުޅެން ނިންމައިފި އެވެ.
ސަރުކާރު ކޯލިޝަންގައި ހިމެނޭ އަދާލަތު ޕާޓީން ވަކިވާން ނިންމި ސަބަބެއް ކަމަށް ޝިދާތާ ވިދާޅުވީ ސިޔާސީ ގޮތުން އިތުރު ހަރުފަތްތަކަކަށް ދިއުމަށް ފިޔަވަޅުތަކެއް އަޅަން ޖެހޭތީ އެވެ. އަދާލަތު ޕާޓީން އޭނާއަށް ދެއްވި ފުރުސަތަށް ޝިދާތާ ވަނީ ޝުކުރު އަދާކުރައްވައިފަ އެވެ.
އެމްއެންޕީއާއެކު ސިޔާސީ ގޮތުން ރައްޔިތުންގެ ހައްގުގައި ގިނަ މަސައްކަތްތަކެއް ކުރެއްވޭނެ ކަމަށް އުއްމީދު ކުރައްވާ ކަމަށް ޝިދާތާ ވިދާޅުވި އެވެ.
"އަޅުގަނޑު މިފަދަ ނިންމުމަކާއި ހަމައަށް އައުމުގައި އެއްވެސް ފަރާތަކަށް އެއްވެސް ހިތްބުރަކަމެއް ނެތް. ސިޔާސީ ގޮތުން ކަޑައްތުކުރި ގޮންޖެހުންތަކާއި ހިތްނުތަނަވަސްކަން އެއީ އަޅުގަނޑަށް ލިބުނު މުހިންމު ތަޖުރިބާއެއް،" ޝިދާތާ މިއަދު ނެރުއްވި ބަޔާނެއްގައިވެ އެވެ.
މިސަރުކާރުގެ ފުރަތަމަ ޖެންޑާ މިނިސްޓަރު ޝިދާތާ މަގާމުން އިސްތިއުފާ ދެއްވީ މިދިޔަ އަހަރުގެ ފެބްރުއަރީ ހަ ވަނަ ދުވަހު އެވެ. އޭނާ އިސްތިއުފާ ދެއްވީ ކުޑަ ކުދިންނާ ގުޅޭ ގިނަ މައްސަލަތަކުގައި އިހުމާލިވި ކަމަށް ބުނެ ރައްޔިތުންގެ މަޖިލީހުގައި އެމްޑީޕީގެ ގިނަ މެންބަރުން އޭނާގެ އިސްތިއުފާ ދެއްވުމަށް ގޮވާލާފައި ވަނިކޮށެވެ.
ދަނގެތީ ދާއިރާގެ މެމްބަރު މުހައްމަދު ނާޒިމް އިސްކޮށް ހުންނަވައިގެން އުފައްދަވާ އެމްއެންޕީއަށް މެމްބަރުން ހަމަ ކުރުމަށް ގިނަ މަސައްކަތްތަކެއް ދަނީ ކުރަމުންނެވެ.
