ބާލިން، ޖަރުމަނު (އޯގަސްޓު 23) - ހަނގުރާމަވެރި ބަޔަކާ ދެކޮޅަށް ކާބުލް އެއާޕޯޓުގައި ހަމަލާ ބަދަލުކުރުމުގެ ސަބަބުން ސެކިއުރިޓީ ގާޑަކު މަރުވެއްޖެ އެވެ.
މަރުވީ އަފްގާނިސްތާނުގެ ރައްޔިތެކެވެ. ހަނގުރާމަވެރިން ހަމަލާ ދޭން ފެށުމުން އެއާޕޯޓުގައި ތިބި އަފްގާނިސްތާނުގެ ސެކިއުރިޓީ ގާޑުން ރައްދުގައި ބަޑި ޖެހި އެވެ.
އެއާޕޯޓުގައި ތިބި އެމެރިކާ އަދި ޖަރުމަނު ސިފައިން ފަހުން ވަނީ އަފްގާން ގާޑުންނަށް އެހީތެރިވުމުގެ ގޮތުން ހަނގުރާމަވެރިންނާ ދެކޮޅަށް ބަޑި ޖަހާފަ އެވެ.
ޖަރުމަނު އަސްކަރިއްޔާ އިން ކުރި ޓްވީޓެއްގައި ބުނީ މިއަދު ފަތިހު ކާބުލް އެއާޕޯޓުގެ އުތުރު ގޭޓާ ދިމާލުން ހަމަލާ ބަދަލު ކުރުމުގެ ސަބަބުން އެކަކު މަރުވެ، ތިން މީހުން ޒަހަމްވި ކަމަށެވެ.
މިދިޔަ ހަފްތާގައި ތާލިބާނުން ވެރިކަމަށް އައުމުން އެތައް ހާސް ބަޔަކު ވަނީ ގައުމުން ފުރުމަށް ކާބުލް އެއާޕޯޓަށް ޖަމާވެފަ އެވެ.
މިހާތަނަށް އެމެރިކާގެ އެހީތެރިކަމާއެކު 17،000 މީހުން ފުރުވާލާފައި ވާއިރު، އޭގެ ތެރެއިން 2،500 މީހުންނަކީ އެމެރިކާ ރައްޔިތުންނެވެ.
ޖަރުމަނުން ވެސް ވަނީ އަސްކަރީ ފްލައިޓުތަކުގައި 2،500 އަށް ވުރެ ގިނަ މީހުން ގެންގޮސްފަ އެވެ. އިނގިރޭސި ވިލާތާއި ފްރާންސް އަދި ބެލްޖިއަމް ފަދަ ގައުމުތަކުން ވެސް އަންނަނީ ފްލައިޓުތަކުގައި މީހުން ގެންދިޔުމުގެ މަސައްކަތް ކުރަމުންނެވެ.
އެތައް ބަޔަކު ކާބުލް އެއާޕޯޓު ތެރޭގައި ތިބިއިރު، އެއާޕޯޓުގެ ބޭރުގައި ވެސް އެތައް ހާސް ބަޔަކު މަޑުކޮށްގެން އެބަ ތިއްބެވެ. ނަމަވެސް އެއާޕޯޓުގެ ގޭޓުތައް ކައިރީ "ނުރައްކާ" އެބަ އޮތް ކަމަށް އެމެރިކާ އިން ވަނީ އަންގާފަ އެވެ.
އެހެންވެ އަފްގާނިސްތާނުގައި ތިބި އެމެރިކާ ރައްޔިތުން އެއާޕޯޓަށް ނުދިޔުމަށް ވެސް އެންގި އެވެ. އެ މީހުންނަށް އަންގާފައި ވަނީ އެމެރިކާ ސަރުކާރުގެ އޮފިޝަލަކު ގުޅަން ދެން ތިބި ތަނެއްގައި މަޑު ކުރުމަށެވެ.
މިއަދު ކާބުލް އެއާޕޯޓުގައި ހަމަލާ ދިނީ ކޮން ގްރޫޕަކަށް ނިސްބަތްވާ ބަޔެއް ކަމެއް ސާފެއް ނޫނެވެ. ނަމަވެސް ތާލިބާނުންގެ ތެރެއިން ބައެއް ހަނގުރާމަވެރިން ލީޑަރުންގެ އެންގުމާ ހިލާފަށް ވަކިން ބަދަލު ހިފުމުގެ އަމަލުތައް ހިންގަމުންދާ ކަމަށް ތާލިބާނުން ވަނީ އެއްބަސްވެފަ އެވެ.
