ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އިންޒާރުދިން މީހަކު ހައްޔަރުކޮށްފި އެވެ.
ފުލުހުން ބުނި ގޮތުގައި 40 އަހަރުގެ އެމީހާ ހައްޔަރުކޮށްފައިވަނީ ރ. މީދޫންނެވެ.
އޭނާ ހައްޔަރުކޮށްފައިވަނީ ފޭސްބުކްގައި ކުރި ކޮމެންޓަކާ ގުޅިގެންނެވެ. އެ ކޮމެންޓްގައި ނަޝީދަށް ރައްދުކޮށް އޭނާ ބުނެފައިވަނީ "ދެން ރާއްޖެ އައިސްފި ނަމަ ބަދުރުގެ ދުވަހު އަބޫ ޖަހުލަށް ހެދި ގޮތް ހަދާނެ" ކަމަށެވެ.
ނަޝީދަށް އަމާޒުކޮށް އެމަނިކުފާނުގެ ގެކޮޅު ކައިރީގައި ބޮމެއް ގޮއްވާލާފައިވާއިރު، މިހާރު އެމަނިކުފާނު ހުންނެވީ ހަމަލާގައި ލިބުނު އަނިޔާތަކަށް ފަރުވާ ހޯއްދެވުމަށް އިނގިރޭސިވިލާތުގަ އެވެ.
އެ ހަމަލާގައި ބައިވެރިވި މީހުން ހައްޔަރުކޮށް، ރައްކާތެރިކަމުގެ ފިޔަވަޅުތައް އެޅުމުން ނޫނީ ރާއްޖެ ވަޑައިގަންނަވަން ޖެހިލުންވާ ކަމަށް ނަޝީދު ވަނީ ވިދާޅުވެފަ އެވެ.
އެމަނިކުފާނަށް އަމާޒުކުރި ހަމަލާއަށްފަހު، ފުލުހުން ވަނީ ސޯޝަލް މީޑިއާގައި ނަފުރަތު އުފައްދަން ދައްކާ ވާހަކަތައް ހުއްޓުވައި، ފިޔަވަޅު އެޅުމަށް ހާއްސަ މަސައްކަތްތަކެއް ފަށައިފަ އެވެ.
އެގޮތުން، ރައްޔިތުންގެ މަޖިލިސް ގޮއްވާލާނެ ކަމަށް ފޭސްބުކުގައި ބުނި ޒުވާނަކާއި އިންޑިއާ ހައިކޮމިޝަން ގޮއްވާލާނެ ކަމަށް ބުނި މީހަކު ވެސް މީގެކުރިން ހައްޔަރުކުރި އެވެ.
