ގާޒާ ސިޓީ، ފަލަސްތީން (އޯގަސްޓު 23) - ހޯމަ ދުވަހުން ފެށިގެން ގާޒާގެ ރަފާހް ބޯޑަރު ބަންދު ކުރާނެ ކަމަށް މިސްރުން ހަމާސް އަށް އަންގައިފި އެވެ.
"އަޅުގަނޑުމެންނަށް މިސްރުގެ ކަމާ ބެހޭ އިދާރާތަކުން އެންގީ ރަފާހް ބޯޑަރު ދެ ސަރަހައްދުން ވެސް ހޯމަ ދުވަހުން ފެށިގެން ބަންދުވާނެ ކަމަށް،" ގާޒާގެ އިންޓީރިއާ މިނިސްޓްރީގެ ތަރުޖަމާނު އިޔާދު އަލް ބޮޒޮމް ނެރުއްވި ބަޔާނެއްގައި ވިދާޅުވި އެވެ.
މިސްރުގެ ސަލާމަތީ އޮފިޝަލުން ވަނީ އޭއެފްޕީ އަށް އެކަން ކަށަވަރުކޮށްދީފަ އެވެ. ވަކި މުއްދަތެއް ނެތް ގޮތަށް ބޯޑަރު ބަންދު ކުރަން ނިންމި ސަބަބެއް ހާމައެއް ނުކުރެ އެވެ.
ގާޒާގެ ވަށައިގެންވާ ބޯޑަރުގައި ހިމެނޭ ރަފާހް ފިޔަވައި އެހެން ހުރިހާ ސަރަހައްދެއް ކޮންޓްރޯލް ކުރަނީ އިޒްރޭލުންނެވެ. މިސްރުން ކޮންޓްރޯލް ކުރާ ރަފާހް ސަރަހައްދުން މިދިޔަ މޭ މަހު ހުޅުވާލަން ނިންމީ ގާޒާ އަށް އެހީ ފޯރުކޮށްދިނުމަށާއި އަނިޔާވެފައިވާ މީހުންނަށް ފަރުވާ ދިނުމަށް މިސްރުގެ ހޮސްޕިޓަލްތަކަށް ގެންދިޔުމަށެވެ.
މިދިޔަ މޭ މަހު ހަމާސް އާއި އިޒްރޭލާ ދެމެދު 11 ދުވަސް ވަންދެން ހަމަލާ ބަދަލު ކުރުމުން 260 ފަލަސްތީން ރައްޔިތުން މަރުވެ އެތައް ހާސް ބަޔަކަށް އަނިޔާވި އެވެ. އެ ހަމަނުޖެހުމަށް ފަހު މިސްރުން ވަނީ ގާޒާ އަލުން ބިނާ ކުރަން 500 މިލިއަން ޑޮލަރު ދޭނެ ކަމަށް ބުނެފަ އެވެ.
އެ ފަހަރުގެ ހަމަނުޖެހުން ނިމުމަކަށް އައީ މިސްރު މެދުވެރިވެގެން އިޒްރޭލާއި ހަމާސްއާ ދެމެދު އެއްބަސްވުމަކަށް އައުމުންނެވެ.
ރަފާހް ބޯޑަރު ބަންދު ކުރަން މިސްރުން ނިންމާފައި ވާއިރު، ފާއިތުވި ހަފްތާ ބަންދުގައި އިރުމަރީ ގާޒާގެ ބޯޑަރުގައި އިޒްރޭލް ފުލުހުންނާއި ފަލަސްތީނު ރައްޔިތުންނާ ދެމެދު ވަނީ ބޮޑު ކުރިމަތިލުންތަކެއް ހިނގާފަ އެވެ. މިއީ މޭ މަހަށް ފަހު ގާޒާގައި ހިނގި އެންމެ ބޮޑު ހަމަނުޖެހުމެވެ.
