ޓިއުރިން (އޮގަސްޓް 23) - އިޓާލިއަން ލީގުގައި ރޭ ފަހު ވަގުތު ކްރިސްޓިއާނޯ ރޮނާލްޑޯ ޔުވެންޓަސް މޮޅުކޮށްދޭން ޖެހި ގޯލު ބަލައިނުގަންނަން ނިންމިއިރު، ލީގުގެ އާ ސީޒަނުގައި ޔުވެންޓަސް ކުޅުނު ފުރަތަމަ މެޗުން އުދިނޭޒީއާ 2-2 އިން އެއްވަރުވެއްޖެ އެވެ.
ބަދަލު ކުޅުންތެރިއެއްގެ ގޮތުގައި ކުޅެން އަރައި މެޗުގެ ނަތީޖާ 2-2 އިން އެއްވަރުވެފައި އޮއްވައި ރޮނާލްޑޯ ވަނީ އިތުރު ވަގުތުގައި ގޯލު ޖަހައިފަ އެވެ. ގޯލު ޖެހުމަށް ފަހު އުފާފާޅުކުރުމުގެ ގޮތުން ރޮނާލްޑޯ ވަނީ ޖޯޒީ ބާލައިފަ އެވެ. އެހެންވެ، ރޮނާލްޑޯ އަށް ރީނދޫ ކާޑެއް ދެއްކި އެވެ. އަދި ފަހުން ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު ރެފްރީ ނިންމީ އެއީ ގޯލެއް ނޫން ކަމަށެވެ. އެ ގޯލު ބަލައިނުގަންނަން ނިންމުމުން ޔުވެންޓަސް އިން ހިތްހަމަ ނުޖެހުން ފާޅުކުރި އެވެ.
ރޭގެ މެޗަށް ޔުވެންޓަސް ނުކުތީ ރޮނާލްޑޯ ބެންޗުގައި ބައިންދައިގެންނެވެ. މީޑިއާގައި އަޑުފެތުރުނު ގޮތުގައި ރޮނާލްޑޯ މެޗުގައި ނުފަށަން ނިންމީ އޭނާގެ މުސްތަގުބަލާ މެދު ގޮތެއް ނިންމަން ކްލަބަށް އެންގުމަށް ފަހު އެވެ. އެކަމަކު، މެޗަށް ފަހު ޔުވެންޓަސްގެ ކޯޗު މެސިމޯ އަލެގްރީ ވަނީ އެ ވާހަކަތައް ދޮގުކޮށްފަ އެވެ.
އުދިނޭޒީ ދަނޑުގައި ކުޅުނު މެޗުގެ ފުރަތަމަ 23 މިނިޓް ތެރޭ ޔުވެންޓަސް އިން ދެ ގޯލުގެ ލީޑެއް ނެގި އެވެ. ފުރަތަމަ ގޯލު ޖެހީ ޕައޮލޯ ޑިބާލާ އެވެ. އަދި ފަހުން ހުއާން ކުއަޑްރާޑޯ އެ ޓީމަަށް ލީޑުފުޅާކޮށްދިނެވެ. ކުއަޑްރާޑޯގެ ގޯލަށް ފުރުސަތު ތަނަވަސްކޮށްދިނީ ޑިބާލާ އެވެ.
އަމިއްލަ ދަނޑުގައި ކުޅުނު އުދިނޭޒީ އެއްވަރުކުރީ ދެ ވަނަ ހާފުގައި ދެ ގޯލު ޖަހައިގެންނެވެ. ފުރަތަމަ ގޯލު މެޗުގެ 51 ވަނަ މިނިޓްގައި ޕެނަލްޓީ އަކުން ޖެހީ ކުރިން ޔުވެންޓަސް އަށް ކުޅުނު ރޮބާޓޯ ޕެރޭރާ އަދި މެޗު ނިމެން ހަތް މިނިޓަށް ވެފައި ވަނިކޮށް އުދިނޭޒީ އަށް އެއްވަރުކޮށްދިނީ ސްޕެއިންގެ ވިންގް ޖެރާޑް ޑެލޮފޭއު އެވެ.
ހޯސޭ މޮރީނިއޯގެ ކޯޗުކަމުގައި ކުޅޭ ރޯމާ ވަނީ ލީގުގެ ފުރަތަަމަ މެޗުން ފިއޮރެންޓީނާގެ މައްޗަށް 3-1 އިން ކުރިހޯދައިފަ އެވެ. މި މެޗުގައި ފިއޮރެންޓީނާ އަށް މައްސަލަ ދިމާވީ މެޗު ފެށިގެން 17 މިނިޓް ތެރޭ އެ ޓީމުގެ ގޯލްކީޕަރު ބާޓްލޮމިއޭ ޑަރްގޯސްކީ އަށް ރަތް ކާޑު ދެއްކުމުންނެވެ.
މެޗުގައި ރޯމާ އިން ޖެހި ތިން ގޯލުގެ ތެރެއިން ދެ ގޯލު ހުނަރުވެރި މިޑްފީލްޑަރު ޖޯޑަން ވެރެޓޫޓް އެވެ. އަނެއް ގޯލު ޖެހީ ހެންރިކް މިކިތާރްޔަން އެވެ. ދާދި ފަހުން ޗެލްސީ ދޫކޮށް ރޯމާ އަށް ބަދަލުވި ޓެމީ އަބްރަހަމް ވަނީ ދެ ގޯލު ޖަހަން ފުރުސަތު ތަނަަވަސްކޮށްދީފަ އެވެ. ފިއޮރެންޓީނާގެ ހަމައެކަނި ގޯލު ޖެހީ ނިކޯލާ މިލެންކޮވިޗް އެވެ.
ރޯމާ ވެސް މެޗު ނިންމާލީ ކުޅުންތެރިއަކު މަދުކޮށެވެ. އެއީ މެޗުގެ 52 ވަނަ މިނިޓްގައި ނިކޯލޯ ޒަނިއޯލޯ އަށް ދެ ވަނަ ރީނދޫ ކާޑާ އެކު ރަތް ކާޑު ދެއްކުމުންނެވެ.
ލީގުގައި ރޭ ނަޕޯލީ ކުޅުނު މެޗުން ވަނީ 2-0 އިން ވެނެޒިއާ ބަލިކޮށްފަ އެވެ. ނަޕޯލީގެ ގޯލުތައް ޖެހީ ލޮރެންޒޯ އިންސީނިއޭ އާއި އެލްޔިފް އެލްމާސް އެވެ. މިއީ ނަޕޯލީގެ އާ ކޯޗު ލޫޝިއާނޯ ސްޕަލޭޓީ އަށް ރަނގަޅު ފެށުމެކެވެ.
