ޖިއްދާ، ސައުދީ އަރަބިއްޔާ (އޯގަސްޓު 22) - ޓެރަރިސްޓު ޖަމާއަތްތަކަށް މިނިވަންކަމާ އެކު އުޅެވޭނެ ތަނަކަށް އަފްގާނިސްތާނު އަލުން ވެދާނެ ކަމުގެ އިންޒާރު އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) އިން ބުނެފި އެވެ.
އޯއައިސީން ބުނީ "ސުލްހަ އާއި ހަމަޖެހުމާއި، ގައުމީ އެއްބައިވަންތަކަމުގެ" މުހިއްމުކަން ފާހަގަކުރަން އަފްގާނިސްތާނަށް ހާއްސަ މަންދޫބުން ކަނޑައަޅާނެ ކަމަށެވެ.
އޯއައިސީ ފަދަ ގިނަ ގައުމުތައް ހިމެނޭ ބައިނަލްއަގްވާމީ އެހެން ޖަމިއްޔާތަކުން ވެސް ވަނީ އަފްގާނިސްތާނުގެ ހާލަތާ ގުޅޭ ގޮތުން މަޝްވަރާ ކުރަން ނިންމާފަ އެވެ. އެގޮތުން އެންމެ މުއްސަނދި ގައުމުތަށް ހިމެނޭ ޖީ7 ގެ ބައްދަލުވުމެއް މި ހަފްތާގައި އޮންނާނެ އެވެ.
މީގެ ކުރިން 1996 އިން 2001 އަށް ތާލިބާނުން ވެރިކަން ކުރިއިރު އަލް ގައިދާ ޓެރަރިސްޓު ޖަމާއަތުން އަފްގާނިސްތާނުގައި އުޅުމުގެ ފުރުސަތު ދިނެވެ. އެހެންކަމުން މީގެ ހަފްތާއެއް ކުރިން އަލުން ވެރިކަމަށް އައި ތާލިބާނުން, ޓެރަރިސްޓު ގްރޫޕުތައް އުޅުމުގެ ފުރުސަތު ދިނުމުގެ ބިރު ވަނީ ހީވެފަ އެވެ.
އޯއައިސީން ނެރުނު ބަޔާނެއްގައި ބުނީ ޓެރަރިސްޓުންގެ ޕްލެޓްފޯމެއްގެ ގޮތުގައި ދެން ދުވަހަކު ވެސް އަފްގާނިސްތާން ބޭނުން ނުކުރެވޭނެ ކަން ކަށަވަރު ކުރުމަށް އަފްގާނިސްތާނުގެ އާ ސަރުކާރާއި ބައިނަލްއަގްވާމީ މުޖުތަމައު މަސައްކަތް ކުރަން ޖެހޭނެ ކަމަށެވެ.
އޭގެ އިތުރުން އަފްގާނިސްތާނުގެ ރައްޔިތުންނަށް ކުރިމަތިވެފައިވާ ބަނޑުހައި ހޫނުކަމުގެ މައްސަލަ އާއި ގިނަ ރައްޔިތުން ރެފިއުޖީންނަށް ވެފައިވާ މައްސަލައާ މެދު ވެސް އޯއައިސީން ކަންބޮޑުވުން ފާޅުކުރި އެވެ.
އޯއައިސީގެ މެމްބަރު ގައުމުތަކާއި އިސްލާމީ މާލީ އިދާރާތަކާއި ބައިވެރިންނަށް ގޮވާލާފައި ވަނީ އެންމެ މުހިއްމު ދާއިރާތައް ފާހަގަކޮށް އެ ދާއިރާތަކުން އަވަސް އެހީ އަފްގާން ރައްޔިތުންނަށް ފޯރުކޮށްދިނުމަށެވެ.
އޯއައިސީ އަކީ 57 މެމްބަރު ގައުމު ހިމެނޭ ބައިނަލްއަގްވާމީ ޖަމިއްޔާ އެކެވެ. ނަވާސަ ސަތޭކަ ހަތްދިހަ ހަ ވަނަ އަހަރުން ފެށިގެން ދިވެހިރާއްޖެއަކީ އެ ޖަމިއްޔާގެ މެމްބަރެކެވެ.
