ރިސޯޓް ތަރައްގީކުރަން އެންމެ ފަހުން ހުޅުވާލި ރަށްތަކަށް ހުށަހަޅާފައިވާ ބިޑުތައް އިވެލުއޭޓް ކުރުމުގެ މަސައްކަތް ނިންމައި އަންނަ ހަފުތާގެ ތެރޭގައި އެ ރަށްތައް ހަވާލުކުރެވޭނެ ކަމަށް ޓޫރިޒަމް މިނިސްޓްރީން މިއަދު ބުނެފި އެވެ.
މި ރަށްތަކަކީ ރިސޯޓް ތަރައްގީކުރަން ރަށްތައް ދޫކުރުމުގެ ދެވަނަ މަރުހަލާގެ ދަށުން 16 ރިސޯޓެއް ހަދަން ބިޑަށްލީ 23 ރަށެވެ. މި އަދަދަށް ރަށްތައް ދޫކުރަން ހުޅުވާލި ނަމަވެސް، އިންވެސްޓަރުން ޝައުގުވެރިކަން ފާޅުކުރީ އޭގެ ތެރެއިން ހަތް ރަށެއް ތަރައްގީކުރާށެވެ. އަދި ބާކީ ހުރި ރަށްތަކަށް އެއްވެސް ބިޑެއް ލިބިފައެއް ނުވެ އެވެ.
މި ރަށްތައް ހަވާލުކުރުމަށް ޓޫރިޒަމް މިނިސްޓްރީން ކުރަމުންގެންދާ މަސައްކަތާ ގުޅިގެން އެ މިނިސްޓްރީގެ ޑެޕިއުޓީ މިނިސްޓަރު އަސްއަދު ރިޒާ "އަދަދު"އަށް ވިދާޅުވީ، މިހާރު ބިޑް އިވެލުއޭޝަންގެ މަސައްކަތް ނިމުމަކާ ގާތް ވެއްޖެ ކަމަށެވެ. އަދި މި ހަފުތާގެ ތެރޭގައި ހުރިހާ މަސައްކަތެއް ނިންމާ، ބިޑު ކާމިޔާބު ކުރި ފަރާތްތަކަށް އަންނަ ހަފުތާގެ ތެރޭގައި ރަށްތައް ހަވާލުކުރެވޭނެ ކަމަށް އޭނާ ބުންޏެވެ.
މިފަހަރު ދޫކުރާ ރަށްތަކަކީ ފަހުގެ ތާރީހެއްގައި ރާއްޖެއިން އެންމެ ހެޔޮ އަގުގައި ދޫކުރާ ރަށްތަކެވެ. އެގޮތުން މި ރަށްތައް ދޫކުރަން ހުށައެޅި ލީސް އެކުއިޒިޝަން ކޮސްޓުން 30 ޕަސެންޓުގެ ޑިސްކައުންޓެއް ދިނެވެ. ޓޫރިޒަމުން އޭރު ބުނީ ރަށްތަކުގެ އަގު ހެޔޮކުރީ ކޮވިޑާ ގުޅިގެން އިންވެސްޓަރުންނަށް ދިމާވެފައިވާ ފައިނޭންސިން މައްސަލަތަކަށް ރިއާޔަތްކޮށް، އިންވެސްޓަރުންގެ ޝައުގުވެރިކަން އިތުރު ކުރުމަށް ކަމަށެވެ.
އަގު ކުޑަ ކުރި ނަމަވެސް ރަށްތަކަށް ބިޑު ހުށައެޅި ބައެއް ފަރާތްތަކުން ކަނޑައަޅާފައިވާ ލީޒް އެކުއިޒިޝަން އަގުގެ 140 ޕަސެންޓު ބޮޑު އަގެއް ހުށައަޅާފައިވާ ކަމަށް ޓޫރިޒަމުން ވަނީ ބުނެފަ އެވެ.
ރިސޯޓް ހަދަން ރަށްތައް ކުއްޔަށް ދޫކުރުމަކީ، މި އަހަރުގެ ބަޖެޓުގައި އާމްދަނީ ހޯދަން ހުށައެޅި ކަންކަމުގެ ތެރޭގައި ހިމެނޭ ކަމެކެވެ. އަދި ބަޖެޓު ކުރި އިރު ރިސޯޓްތައް ދޫކޮށްގެން 17.4 މިލިއަން ރުފިޔާ ލިބޭނެ ކަމަށް ލަފާކުރި އެވެ. ނަމަވެސް އަގު ކުޑަކުރުމުން އެ އަދަދު 12 މިލިއަން ޑޮލަރަށް ތިރިވި އެވެ. ލިބިފައިވާ ބިޑުތަކަށް ބަލާއިރު، މީގެ ދެބައިކުޅަ އެއްބައި ލިބުން ވެސް ނާދިރެވެ.
