ގާޒާ ސިޓީ، ފަލަސްތީން (އޯގަސްޓު 22) - ގާޒާގެ ބޯޑަރު ސަރަހައްދުގައި ފަލަސްތީނު މީހުންނާއި އިޒްރޭލް ފުލުހުންނާ ދެމެދު ހޮނިހިރު ދުވަހު ހިނގި ހަމަނުޖެހުމަށް ފަހު އިޒްރޭލުން ގާޒާ އަށް ހަމަލާ ދީފި އެވެ.
އިއްޔެ ހިނގި ހަމަނުޖެހުމުގައި ގިނަ ބަޔަކަށް އަނިޔާވި އެވެ. އިޒްރޭލުގެ ފުލުހަކާއި ފަލަސްތީނުގެ 13 އަހަރުގެ ފިރިހެން ކުއްޖަކަށް ވަނީ ސީރިއަސް ޒަހަމްތަކެއް ލިބިފަ އެވެ.
ހަމަނުޖެހުން ހިނގީ ގާޒާ ވަށައިގެން އިޒްރޭލުން ރާނާފައިވާ ބޯޑަރު ފާރުގެ މަތިން އަރަން ފަލަސްތީނުގެ ގިނަ ބަޔަކު މަސައްކަތް ކުރުމުންނެވެ. އިޒްރޭލް ފުލުހުން ބަޑި ޖަހަން ފެށުމުން ފަލަސްތީން މީހުން ވަނީ އަލިފާން ބޯޅަ އުކާފަ އެވެ.
އިޒްރޭލް ފުލުހުންގެ ކޮމިޝަނަރު ކޯބީ ޝަބްތައި ވިދާޅުވީ "އިޒްރޭލަށް ގެއްލުން ދޭން އުޅޭ ނަމަ ހަރުކަށި ފިޔަވަޅު އަޅާނެ" ކަމަށެވެ. ޑިފެންސް މިނިސްޓަރު ބެނީ ގާންޓްޒް ވިދާޅުވީ "މިއީ ސީރިއަސް ހާދިސާއެއް ކަމަށާއި ރައްދު ވެސް ސީރިއަސް ވާނެ" ކަމަށެވެ.
ގާންޓްޒް އެހެން ވިދާޅުވިތާ ކުޑައިރުކޮޅެއް ފަހުން އިޒްރޭލުން ވަނީ ގާޒާ އަށް ވައިގެ މަގުން ތިން ހަމަލާ ފޮނުވާފަ އެވެ. އެ ހަމަލާތަކުގައި މީހަކު މަރުވިކަމުގެ ރިޕޯޓު މިހާތަނަށް ލިބިފައެއް ނުވެ އެވެ.
ހޮނިހިރު ދުވަހު ހަމަނުޖެހުން ހިނގީ ގާޒާގައި ވެރިކަން ކުރާ ހަމާސް އިން ރޭވި މުޒާހަރާއެއް ހޫނުވެގެންނެވެ. އެއީ އަލް އަގްސާ މިސްކިތުގައި ހުޅުޖެހި ހާދިސާއަށް 52 އަހަރު ފުރުން ފާހަގަކުރަން ބޭއްވި މުޒާހަރާ އެކެވެ.
އިއްޔެގެ ހަމަނުޖެހުމަކީ މިދިޔަ މެއި މަހު އިޒްރޭލާއި ހަމާސްއާ ދެމެދު ހަމަލާ ބަދަލު ކުރުން ހުއްޓާލަން އެއްބަސްވި ފަހުން ގާޒާގައި ހިނގި އެންމެ ބޮޑު ހަމަނުޖެހުމެވެ.
މެއި މަހު 11 ދުވަސް ވަންދެން ހަމަލާ ބަދަލު ކުރުމުގެ ސަބަބުން ފަލަސްތީނުގެ 260 މީހުންނާއި އިޒްރޭލުގެ 13 މީހުން މަރުވި އެވެ. އެ ފަހަރު ވެސް ހަމާސް އިން ހަމަލާ ދިނީ އިޒްރޭލް ފުލުހުން އަގްސާ މިސްކިތް ސަރަހައްދުގައި ފަލަސްތީން ރައްޔިތުންނާ ދެކޮޅު އަމަލު ހިންގުމުންނެވެ.
