މިދިޔަ އަހަރުގެ ބިޒީ ޕެންޑެމިކްގެ މެދުން ފެށުނު ގަސް އިންދުމުގެ ފޯރިގަނޑުގެ ތެރޭގައި ރ.ވާދޫގެ އިމްރާން މުހައްމަދާއި އޭނާގެ ބޭބެ ނަޝީދު ބުރަކޮށް އުޅުނީ ހުސްކޮށްފައި އުކައިލާ ފަސް ލިޓަރުގެ ޕްލާސްޓިކް ފުޅި އެއްކޮށްގެން އެއިން ރިސައިކަލް ޕޮޓު ހެދުމުގަ އެވެ. ޕެންޑެމިކް ތެރޭގައި އޭގެ އެތައް ސަތޭކަ ޕޮޓެއް ހަދައިގެން އެ ދެ ބެއިން ވިއްކި އެވެ. އެކަމަކު އޭގެ މާ ކުރިން ފެށިގެން ވެސް އެކި ދުވަސްތަކާ ގުޅުވައިގެން ތަފާތު, ކަވި މަސައްކަތް މި ދެ ބެއިން ކުރަން ފަށައިފި އެވެ. ހޮބީއެއްގެ ގޮތުގަ އެވެ.
އިމްރާނަކީ އާކިޓެކްޓެކެވެ. އޭނާގެ ބޭބެއަކީ ވަޑާމުގެ މަސައްކަތް ކުރާ މީހެކެވެ. ލިބޭ ހުސް ވަގުތުތަކުގައި ތަފާތު ކޮމިޝަން މަސައްކަތްތަކާއި އެކި ކަހަލަ ކަވި ކްރާފްޓް ހެދުމަކީ އިމްރާނަށް އޭނާގެ ބޭބެ ފަރާތުން އުނގެނި ފަރިތަވި ކަމެކެވެ.
"ކައިވެނީގެ ރަން ހެދުމާއި ޑްރީމް ކެޗާ ކަހަލަ އެއްޗެހި ހަދަން ފެށިތާ ވެސް މިހާރު ވެދާނެ ފުދޭ ވަރަކަށް ދުވަސް. ދެން މިހާރު އެންމެ ކަވި އެއް މަސައްކަތަށް މި ކުރަނީ ފުރުޓް ކާވިން. ވަރަށް ޗެލެންޖިން ވަރަށް ޝައުގުވެރި ކަމެއް މިއީ ވެސް،" 31 އަހަރުގެ އިމްރާން އޭނާގެ ލިމިޓެއް ނެތް ކަވި ހޮބީތަކުގެ ވާހަކަ ފަށައިގަތީ މިހެންނެވެ.
"ކަވި މަސައްކަތެއް ވިއްޔާ އެ ދިމާލަކަށް ހިތް ދާނެ،"
ކަލިނަރީ ޓެކްނީކެއްގެ ގޮތުގައި ބޭނުންކުރާ ފުރުޓް އަދި ވެޖިޓަބަލް ކާވިން އަކީ ތައިލެންޑް، ޗައިނާ ޖަޕާން ފަދަ ގައުމުތަކުގައި ޒަމާން ވީ އާޓެކެވެ. މިއީ ކަވި، ގިނަ އިރު ހޭދަވާ މަސައްކަތެކެވެ.
އިމްރާން ބުނީ މީގެ އަހަރުތަކެއް ކުރިން ފްރުޓް ކާވް ކުރަން ދަސްކުރަން ފެށީ ޔޫޓިއުބް ބަލައިގެން ކަމަށެވެ. އޭގެ ފަހުން މަދު މަދުން ރައްޓެހިންނާއި އާއިލީ ކައިވެނި ތަކާއި ހަފްލާތަކަށް ސެޓިން ހަދައިދޭ ކަމަށެވެ.
ބަރަބޮލުގައި ކާވް ކޮށްގެން އިމްރާން ކޮށްފައިވާ މަސައްކަތެއް
ތަރުކާރީ އާއި މޭވާއިން އިން އިމްރާން ހަދާފައިވާ މާތަކެއް
"މިއީ ވެސް އަސްލު ބޭބެ އިންޓްރޮޑިއުސް ކޮށްދިން ކަމެއް. ދެން އަޅުގަނޑު ބަލަން ފެށީ މޮޅަށް މިކަން ކުރެވޭނެ ގޮތްތަކާއި ޓެކްނިކްތައް ޔޫޓިއުބް ބަލައިގެން. އެހާ ގިނައިން އަގު ނަގައިގެން މަސައްކަތްތަކެއް ވެސް އަދި ނުކުރެވޭ. މިހާތަނަށް ދިހަ ވެޑިން އަކަށް އަދި ފުރުޓް އާޓް ހަދައިދިނީ." އިމްރާން ބުންޏެވެ.
އިމްރާން ބުނީ ލިބޭ ހުސް ވަގުތު ތަކުގައި އެކި ކަހަލަ ހުނަރު ދަސްކުރުމުގެ ފައިދާ ގިނަ ކަމަށެވެ. ދޭތެރެއަކުން މަސައްކަތް ނެގިޔަސް ޑިމާންޑު އޮންނަ ކަމަށް ބުންޏެވެ.
ފުރުޓް ކާވް ކުރަން އިމްރާންގެ ދެބެއިން ޝައުގުވެރިވި ވަރުން އެކަމަށް ބޭނުންވާ އެކި ކަހަލަ ކަޓް ނެގޭ ޓޫލްތައް ވެސް މި ދެބެއިން ހެދީ އަމިއްލަ އަށެވެ. އާދައިގެ ވަޅި ގަނެގެން އެ ވަޅިތައް އެކި ޝޭޕް ތަކަށް ކަފައިގެން މަސައްކަތުގައި ބޭނުންކުރެ އެވެ.
ޕްރޮފެޝަންއެއްގެ ގޮތުގައި ނުކުރިޔަސް، މިހާރު އިމްރާން އަކީ "ބިގިނާ" ލެވެލް އެއް ނޫނެވެ. ފުރުޓެއް، ތަރުކާރީއެއްގައި ކޮންމެ ކަހަލަ ކުރެހުމެއް އަޅަން ޖެހުނަސް އެކަން ފަރިތަކޮށް ޔަގީންކޮށް ކުރެވޭނެ ކަމަށް އިމްރާން ބުންޏެވެ.
އިމްރާން ކަރާއެއްގައި ހެދި ފްލޯރަލް އާޓް ވޯކެއް: އޭނާ ބުނީ ފުރުޓް ތަކުގެ ތެރެއިން އެންމެ ފަސޭހައީ ކަރާގައި ކާވް ކުރަން ކަމަށް
"މި ފަހުން ސޯޝަލް މީޑިއާގައި ވައިރަލްވި ފްލޯރަލް ކާވިން އަކީ ރީތި މަސައްކަތެއް. އެކަމަކު އެއަށްވުރެ ކޮމްޕްލެކްސް މަސައްކަތް ވެސް ހުންނާނެ ކުރެވިފަ. މީގަ އަޅުގަނޑު ބުނެލަން ބޭނުންވަނީ، މިކަހަލަ މަސައްކަތްތަކަކީ ކޮންމެހެން މޮޅަށް ކުރަހަން އެނގޭތީ ކުރެވޭނެ ކަންތައްތަކެއް ނޫން. ކުރާ ހިތުން ކުރީމަ ދަސްވާ ކަމެއް،"
އިމްރާނަކީ ކަރުދާހުގައި ކުރަހަން ދަންނަ މީހެއް ނޫނެވެ. އެކަމަކު މޭވާ އެއްގައި ތަރުކާރީއެއްގައި ކުރަހަން ހިތު އަޅައިފި ނަމަ ކިތަންމެ ކަވި ކުރެހުމަކަސް އެކަން އޭނާ އަށް މިހާރު ކުރެވެ އެވެ.
