ވެރިކަން ހިންގުމުގެ ނިޒާމު އިސްލާހު ކުރުމަކީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ވައުދުފުޅެއްކަމުން، ވެރިކަން ހިންގުމުގެ ނިޒާމު ބަދަލު ކުރުމަށް ރައްޔިތުންގެ އާންމު ވޯޓަކަށް އަވަހަށް ދިޔުމަށް ގޮވާލާ ޕެޓިޝަނެއްގައި މިއަދު ސޮއިކުރަން ފަށައިފި އެވެ.
ގާނޫނީ ވަކީލު މުހައްމަދު ނިޝާން އިބްރާހިމް އިސްކޮށް ހުންނަވާ ތާއީދު ހޯދަން މަސައްކަތް ކުރާ އެ ޕެޓިޝަނުގައި ބުނެފައި ވަނީ ވެރިކަން ހިންގުމުގެ ނިޒާމު އިސްލާހު ކުރުމަކީ ރައީސް ސޯލިހުގެ ވައުދުފުޅެއްކަމުން އެ މަސައްކަތް ކުރުން އަވަސް ކުރަންޖެހޭ ކަމަށެވެ.
"އިއްޒަތްތެރި ރައީސުލްޖުމްހޫރިއްޔާ އެންމެފަހުން ވެސް ގައުމާ މުހާތަބުކޮށް އަދި އެތައް ފޯރަމެއްގައި އެންމެ ބޮޑު އިސްކަމެއް ދޭނީ ރިޔާސީ ވައުދުތައް ފުއްދުމަށް ކަމަށް ތަކުރާރުކޮށް ވިދާޅުވަމުން ގެންދަވާ،" އެ ޕެޓިޝަނުގައި ބުނެފައިވެ އެވެ.
އެ ޕެޓިޝަނުގައި ރައްޔިތުންގެ މަޖިލީހުގެ ބައެއް މެމްބަރުން ވެސް މިއަދު ސޮއި ކުރެއްވި އެވެ. އެގޮތުން މާފަންމު މެދު ދާއިރާގެ މެމްބަރު މުހައްމަދު ރަޝީދާއި ހެންވެއިރު އުތުރު ދާއިރާގެ މެމްބަރު އިބްރާހިމް މުއިއްޒު ހިމެނެ އެވެ.
ޕެޓިޝަނާ ގުޅޭ ގޮތުން ވާހަކަ ދެއްކެވި މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑޭ) ވިދާޅުވީ އެ ޕެޓިޝަން ހުށަހަޅަން ނިންމާފައި ވަނީ ރައީސް އިބްރާހިމް މުހައްމަދު ސޯލިހްގެ އިތުރުން ރައްޔިތުންގެ މަޖިލީހަށް ކަމަށެވެ. ރާއްޖޭގެ އެކި ކަންކޮޅުތަކުން ސޮއި ހޯދަނީ ބަރުލަމާނީ ނިޒާމަށް ހޭލުންތެރިކުރުވުމާ އެކުގައި ކަމަށް ވެސް ވިދާޅުވި އެވެ.
އޭނާ ވިދާޅުވި ގޮތުގައި އަމާޒަކީ 100 ދުވަސް ތެރޭގައި 100،000 ސޮއި ހަމަކުރުމެވެ.
"މީގައި ކުރިއަށް މިދަނީ ހަމައެކަނި ޕެޓިޝަނެއްގައި ސޮއިކުރުމެއް ނޫން. މި ޖީލަށް، ބަރުލަމާނީ ނިޒާމުގެ މައުލޫމާތު ދީ ހޭލުންތެރިކުރުވުން،" އޭނާ ވިދާޅުވި އެވެ.
ބޮންޑޭ ވިދާޅުވި ގޮތުގައި ރާއްޖެއަށް ބޭނުން ވަނީ ދުވަހުން ދުވަހަށް ސަރުކާރު ހިންގޭ ނިޒާމެކެވެ. ރައްޔިތުންގެ ވޯޓުން މިހާރު ގެނެސްފައި އޮތް ނިޒާމުގައި އެ މަގްސަދު ހާސިލްނުވާ ކަމުގެ ޝަކުވާ ރައްޔިތުންގެ މަޖިލީހަށް ހުށަހަޅާ ކަމަށް ވިދާޅުވި އެވެ.
އެ ޝަކުވާއަށް މަޖިލީހުން ހޯދާ ހައްލަކީ ގާނޫނެއް ފާސްކުރުން ކަމަށާއި ދެން ވެސް އެ ގާނޫނަށް ސަރުކާރުން އަމަލުކުރަމުން ނުދާ ކަމުގެ ތުހުމަތު ކުރެއްވި އެވެ. ހެއްކެއްގެ ގޮތުން ވިދާޅުވީ ގާނޫނުތަކުން ބާރުދޭން ޖެހޭ ގަވާއިދުތައް ނުހަދާ ކަމަށާއި އިންޓެލިޖެންސް މައުލޫމާތު އެއް މުއައްސަސާ އިން އަނެއް މުއައްސަސާއަށް ފޯރުކޮށްދިނުމުގައި ބާގަނޑެއް އޮތީ އެ ސަބަބާ ހެދި ކަމަށް ވިދާޅުވި އެވެ.
"އެ ބާގަނޑުގެ ތެރެއިން ނުކުމެ އެ ބޮން ގޮއްވާލީ. މިއީ މުޅި ގައުމަށް ދިމާވި ކަމެއް،" އޭނާ ވިދާޅުވި އެވެ.
ބޮންޑޭ ވިދާޅުވި ގޮތުގައި ރައްޔިތުންގެ މަޖިލީހުގެ 65 ގޮނޑި އެމްޑީޕީއަށް ކަށަވަރުކޮށްދީފައި އޮތަސް ސަރުކާރުގައި އެމްޑީޕީގެ ބައިވެރިވުން ކުޑަ އެވެ. ކޯލިޝަން ސަރުކާރުގައި އެމްޑީޕީއަކީ އޭނާ ދެކެވަޑައިގަންނަވާ ގޮތުގައި މައިނޯރިޓީ އެވެ. ސަރުކާރު ހިންގުމުގައި އެކަށީގެންވާ ގޮތެއްގައި ބަސް ބުނާނެ ޖާގަ ނުލިބެނީ އެހެންވެ ކަަމަށް ވިދާޅުވި އެވެ.
"ބަރުލަމާނީ ނިޒާމަކީ ވަރަށް ސްޕީޑު ބާރު ނިޒާމެއް. ދައުލަތަށް މިނިވަންކަން ލިބުނީ ބަރުލަމާނީގެ ބޮޑުވަޒީރަކު މި ރާއްޖޭގައި ހުންނަވައިގެން،" ބޮންޑޭ ވިދާޅުވި އެވެ.
ރާއްޖޭގައި ވެރިކަން ކުރާނެ ނިޒާމެއް ކަނޑައަޅަން 2007 ގައި ނެގި އިންތިހާބުގައި ގިނަ ރައްޔިތުން ވޯޓުދިނީ ރިޔާސީ ނިޒާމަށެވެ. އެއީ ސައްހަ 154،123 ވޯޓުގެ 62 ޕަސެންޓެވެ.
އެ ޕެޓިޝަންގައި ސޮއި ކުރުމުގެ މަސައްކަތް ފަށާފައި މި ވަނީ މި ހިނގާ ރިޔާސީ ދައުރުގެ މެދުތެރެއިން ނިޒާމުގެ ވޯޓަކަށް ގޮސް ބަރުލަމާނީ ނިޒާމަކަށް ވެރިކަން ހިންގުން ބަދަލު ކުރުމަށް ކުރީގެ ރައީސް މުހައްމަދު ގޮވާލައްވާފައި އޮއްވަ އެވެ.
ބަރުލަމާނީ ނިޒާމަށް ހިންގުން ބަދަލު ކުރުމަށް ގޮވާލެއްވުމަށްފަހު ނަޝީދު ވަނީ ރައީސް ސޯލިހާއެކު ސިޔާސީ ގޮތުން ހުންނެވެން ނެތްކަން ވެސް އިއުލާން ކުރައްވައިފަ އެވެ. އަދި އިދިކޮޅު ޕީޕީއެމް އަދި ކުރީގެ ރައީސް އަބްދުﷲ ޔާމީނާއެކު ކޯލިޝަނެއް ހެއްދެވުމަށް ބޭނުންވެވަޑައިގަންނަވާ ކަމަށް ވެސް ނަޝީދު ވަނީ ވިދާޅުވެފަ އެވެ.
ނިމިދިޔަ 2018 ވަނަ އަހަރުގެ ރިޔާސީ އިންތިހާބަށް މިހާރު ވެރިކަން ހިންގާ އެމްޑީޕީގެ ފަރާތުން ނެރުނު މެނިފެސްޓޯގައި ބުނެފައި ވަނީ ބޮޑުވަޒީރަކު ހުންނަވާ ގޮތަށް ވެރިކަން ހިންގުމުގެ ނިޒާމު އިސްލާހު ކުރާނެ ކަމަށެވެ.
"... ގާނޫނު އަސާސީ އިސްލާހު ކުރުމަށްފަހު އެކުލަވާލެވޭ ސަރުކާރުގައި ބޮޑުވަޒީރާއި އޭނާގެ ކެބިނެޓް އެކުލަވާލެވޭނީ މަޖްލިސް ތެރެއިން. މިހެން މި ބަދަލު ގެނައުމުން ސަރުކާރުގެ މަތިބަރުކަން މާބޮޑަށް ކުޑަ ކުރެވިގެންދާނެ،" އެ މެނިފެސްޓޯގައިވެ އެވެ.
އޭގެ އިތުރުން ކޯލިޝަން މެނިފެސްޓޯގައި ވެސް ވެރިކަން ހިންގުމުގެ ނިޒާމު އިސްލާހު ކުރުމުގެ ވާހަކަ ދައްކާފައިވެ އެވެ. އެގޮތުން "ރާއްޖޭގެ ވެރިކަން ހިންގުމުގެ ނިޒާމު ހަރުދަނާކުރުމަށްޓަކައި ގާނޫނު އަސާސީއަށް ގެންނަންޖެހޭ ބަދަލުތައް ގެނައުން" އެއީ ކުރާނެ މަސައްކަތެއްގެ ގޮތުގައި އެ މެނިފެސްޓޯގައި ލިޔެފައިވެ އެވެ.
