މިއުނިކް (އޮގަސްޓް 21) - ދާދި ފަހުން ޖަރުމަނުގައި ފެންބޮޑުވުމުގެ ހާދިސާގެ ތެރެއިން ހާލުގައި ޖެހުނު މީހުންނަށް އެހީވުމުގެ ގޮތުން ޗެލްސީ އަށް ކުޅޭ ޖަރުމަނުގެ މިޑްފީލްޑަރު ކައި ހަވާޓްޒް ހާއްސަ ޑިޒައިނެއްގެ 100 ބޫޓު ވިއްކަން ނިންމައިފި އެވެ.
ޖަރުމަނުގައި ހިނގި ފެންބޮޑުވުމުގެ ހާދިސާގައި 180 މީހުން މަރުވިއިރު، އެތައް ބަޔެއް ބިކަވެ، ހާލު ޖެހުނެވެ. ފެންބޮޑުވުމުގެ ހާދިސާގައި އެންމެ ބޮޑަށް އަސަރުކުރީ ހަވާޓްޒް އުފަންވި އާކެން ސިޓީ ހިމެނޭ ސަރަަހައްދާ އެކު ނޯތުރެއިން-ވެސްޓަފާލަން އަށެެވެ.
ޗެލްސީ އަށް މިދިޔަ މެއި މަހު ޗެމްޕިއަންސް ލީގު ކާމިޔާބު ކޮށްދިން ގޯލު ޖެހި ހަވާޓްޒް، 22، ވަނީ ހާލުގައި ޖެހުނު މީހުންނަށް އެހިވާން ޖަރުމަނު ރެޑް ކްރެސެންޓަށް 240،000 ޑޮލަރު ދީފަ އެވެ. މީގެ އިތުރުން 100 ބޫޓު ވިއްކާ ކެމްޕެއިން އިޝްތިހާރު ކުރުމުގެ ގޮތުން މާދަމާރޭ، އިނގިރޭސި ޕްރިމިއާ ލީގުގައި ޗެލްސީ އާއި އާސެނަލް ކުޅޭ މެޗުގައި ހާވާޓްޒް ބޭނުންކުރާނީ އެ ހާއްސަ ބޫޓެވެ.
އެ ބޫޓު ޑިޒައިން ކޮށްފައިވަނީ ނޯތުރެއިން-ވެސްޓަފާލަންގެ ދިދައިގެ ކުލަތައް ހިމެނޭ ގޮތަށެވެ. އެއީ ފެއްސާއި ރަތާއި ހުދު ކުލައިންނެވެ.
ހަވާޓްޒް ބުނީ މި ބޫޓު ގަންނަން ޖެހޭ ސަބަބަކީ ފެންބޮޑުވުމުގެ ހާދިސާގައި ހުރިހާ އެއްޗެއް ގެއްލުނު މީހުންނަށް އެހީތެރިވެ، މި ކަމުގައި ބައިވެރިވިކަމުގެ ނިޝާނެއް އަތުގައި ރައްކާކުރުމުގެ ގޮތުން ކަމަށެވެ.
"އަހަރެންގެ އާއިލާ ދިރިއުޅެނީ އެ ތަނުގައި. މި ދިމާވި ހާދިސާއަށް ފަހު ގިނަ ބަޔަކު ވަންނާނެ ގެޔެއް ނެތް. އެ ތަނުގައި އެބައުޅޭ ނިދާލާނެ ތަނެއް. ގޭގައި ކަރަންޓެއް ނެތް، ލާނެ އަންނައުނެއް، ކާނެ އެއްޗެއް ނެތް. މިއީ އެ މީހުންނަށް ދީލަތި އެހީތެރިކަމެއް ފޯރުކޮށްދޭންވީ ވަގުތު،" ޖަރުމަނު ގައުމީ ޓީމަށް ވެސް ކުޅެމުން އަންނަ ހަވާޓްޒް ބުންޏެވެ.
ބަޔާ ލެވަކޫސަން ދޫކޮށް މިދިޔަ އަހަރު 95 މިލިއަން ޑޮލަރަށް ޗެލްސީ އަށް ބަދަލުވި ހަވާޓްޒް ބުނީ އޭނާ މި ފެށި ކެމްޕެއިންގެ ތެރެއިން މޫސުމަށް އަންނަ ބަދަލުތަކުގެ އަސަރު ކުޑަކުރަން ހިންގޭ އެކި ޕްރޮގްރާމްތަކަށް ވެސް ފުރުސަތު އެބައޮތް ކަމަށެވެ. އަދި މުސްތަގުބަލުގައި މި ފަދަ ކަންކަމުގައި އޭނާގެ އެހީތެރިކަން ލިބޭނެ ކަމަށް ހާވާޓްޒް ވަނީ ބުނެފަ އެވެ.
