ލިޒްބަން (އޮގަސްޓް 20) - ޔުއެފާ ކޮންފަރެންސް ލީގުގެ ޕްލޭއޮފްގައި ޕޯޗުގަލްގެ ޕަކޯސް ޑި ފެރެއިރާ އަތުން 1-0 އިން ޓޮޓެންހަމް ހޮޓްސްޕާސް ބަލިވިއިރު، އެ ޓީމަށް މިދިޔަ އަހަރު ކޯޗުކޮށްދިން ހޯސޭ މޮރީނިއޯގެ އިރުޝާދުގެ ދަށުން ރޯމާ ކުޅުނު ރަސްމީ ފުރަތަމަ މެޗުން ތުރުކީގެ ޓްރަބްޒޯންސްޕޯ އަތުން 2-1 އިން މޮޅުވެއްޖެ އެެވެ.
ކޮންފަރެންސް ލީގަކީ މި ސީޒަނުގައި ޔުއެފާ އިން މުޅިން އަލަށް ފެށި މުބާރާތެކެވެ. އެ މުބާރާތަކީ ޗެމްޕިއަންސް ލީގާއި ޔޫރޮޕާ ލީގަށް ފަހު ޔުއެފާގެ ތިން ވަަނަ ފަންތީގެ މުބާރާތެެވެ.
ޓޮޓެންހަމް އިން އެ ޓީމުގެ މުޅި ފުރަތަމަ އެގާރަ އަށް ބަދަލު ގެނެސްގެން ކުޅުނު ރޭގެ މެޗުގައި އެ ޓީމަށް ޕަކޯސްގެ ގޯލާ އަމާޒުކޮށް އެންމެ ހަމަލާއެއް ވެސް ފޮނުވާލެވިފައި ނުވެ އެވެ. މި މެޗުގައި ޕަކޯސްގެ ހަމައެކަނި ގޯލު ޖެހީ ލޫކަސް ސިލްވާ އެވެ.
ވުލްވްސްގެ އާ ކޯޗު ނޫނޯ އެސްޕިރީޓޯ ސަންޓޯގެ ކޯޗުކަމުގައި އެ ޓީމުން ނުކުތް ވާދަވެރި ފުރަތަމަ މެޗުގައި ޕްރިމިއާ ލީގުގައި ވަނީ 1-0 އިން މެންޗެސްޓާ ސިޓީ ބަލިކޮށްފަ އެވެ. ދެ ވަަނަ މެޗުން ރޭ ބަލިވިއިރު، ނޫނޯ ބުނީ ޕަކޯސް ކައިރީގައި ބޭނުންވި ގޮތަށް ނުކުޅެވުނު ކަމަށާއި އަމިއްލަ ދަނޑުގައި ކުޅޭ ދެ ވަނަ ލެގުގެ މެޗުން ނަތީޖާ އަނބުރާލެވޭނެ ކަމަށެވެ.
ޕޯޓޯ އާއި އިންޓަ މިލާން ގޮވައިގެން ޗެމްޕިއަންސް ލީގާއި މެންޗެސްޓާ ޔުނައިޓެޑަށް ޔޫރޮޕާ ލީގު ކާމިޔާބު ކޮށްދިން މޮރީނިއޯ ރޯމާއާ ހަވާލުވެ، އެ ޓީމުގެ ކަންކަން ބަދަލުކުރަން މަސައްކަތް ކުރަމުން އަންނައިރު، ޓްރަބްޒޯންސްޕޯ އަތުން ލިބުނީ މުހިއްމު މޮޅެކެވެ.
ކެޕްޓަން ލޮރެންޒޯ ޕެލެގްރީނީ ރޯމާ އަށް ލީޑުނަގައިދީފައިވަނިކޮށް ޓްރަބްޒޯންސްޕޯ އަށް އެއްވަރުކޮށްދިނީ އަންޑްރެއަސް ކޮނީލިއަސް އެވެ. ރޯމާ މޮޅުކޮށްދިން ގޯލު ޖެހީ އުޒްބެކިސްތާން ފޯވާޑް އެލްޑޯ ޝޮމުރޯޑޯފް އެވެ.
އިޓާލިއަން ލީގު މި ހަފްތާ ބަންދުގައި ފަށާއިރު ރޯމާ ކުޅޭނީ ފިއޮރެންޓީނާއާ އެވެ.
