ކޮޅުމަޑުލުގެ ހަތް ރަށަކަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ކުރެއްވި ދަތުރު މިރޭ ނިންމައިލެއްވިއިރު ދެން އޮތީ ރަށްރަށުން ރައީސްގެ ނޯޓުފޮތަށް އެރި މައްސަލަތަކާއި ކަންބޮޑުވުންތައް ހައްލުކުރުމުގެ ބުރަ މަސައްކަތް ކަމަށް އެމަނިކުފާނުގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވެއްޖެ އެވެ.
ރައީސްގެ ދަތުރުގައި ޒިޔާރަތްކުރެއްވީ ތ. އަތޮޅުގައި މީހުން ދިރިއުޅޭ 13 ރަށުގެ ތެރެއިން ތިމަރަފުށި، ކިނބިދޫ، ވޭމަންޑޫ، ވަންދޫ، އޮމަދޫ، ކަނޑޫދޫ އަދި ގާދިފުއްޓަށެވެ.
މަބްރޫކް މިރޭ ކުރެއްވި ޓްވީޓެއްގައި ވިދާޅުވީ މިއީ މާނަހުރި ތަޖުރިބާއެއް ކަމަށާއި އަދި ހަމަ އެހެންމެ މިއީ ކަންކަން ދަނެގަތުމަށް ލިބިވަޑައިގެންނެވި ފުރުސަތެއް ކަމަށެވެ.
"ކުރިއަށްދާން ބަލާއިރު، އަޅުގަނޑުމެން ދަތުރުކުރި ކޮޅުމަޑުލުގެ ހަތް ރަށުން ފާހަގަކުރެވުނު މައްސަލަތަކާއި ކަންބޮޑުވުންތައް ހައްލުކުރުމުގައި ދެން އޮތީ ބުރަ މަސައްކަތެއް،" މަބްރޫކް ވިދާޅުވި އެވެ.
ރައީސްގެ ހަ ވަނަ މަންޒިލެއްގެ ގޮތުގައި މިއަދު ކަނޑޫދޫ ކުރެއްވި ޒިޔާރަތުގައި އެ ރަށު ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމިޓީއާ އެކު ބޭއްވެވި ބައްދަލުވުމުގައި، މެމްބަރުން ވަނީ މިދިޔަ 15 އަހަރު ނުހިންގާ މަޝްރޫއު މި ސަރުކާރުން ހިންގަމުން އަންނަކަން ފާހަގަކޮށް ޝުކުރުއަދާކުރައްވައިފަ އެވެ. އެ ރަށުގައި މިހާރު ވެސް ނުވަ ވަރަކަށް ޕީއެސްއައިޕީ ޕްރޮޖެކްޓް އެކި މަރުހަލާތަކުގައި ކުރިޔަށް އެބަދެ އެވެ.
ރައީސް ވޭމަންޑޫ ސްކޫލުގެ ދަރިވަރަކާ ސަލާމްކުރައްވަނީ. --ފޮޓޯ: ރައީސް އޮފީސް
ރައީސް ވިދާޅުވީ އެ ރަށުގެ ފެނާއި ނަރުދަމާގެ ތަފްސީލީ ފަރުމާ ނިމިފައިވާކަމަށާއި، އިދާރީ އިމާރާތުގެ 90 އިންސައްތަ މަސައްކަތް ނިމިފައިވާކަމަށާއި އަދި މިހާރު މި މަޝްރޫއުގައި ކުރިޔަށްދަނީ ހޮޅިވަޅުލުމުގެ މަސައްކަތް ކަމަށެވެ. އަދި ބަނދަރުގައި މިހާރު ކުރިޔަށް ދަނީ އީއައިއޭ ހެދުމުގެ މަސައްކަތް ކަމަށާއި ސިއްހީ މަރުކަޒުގެ އަޕްގްރޭޑިން ގެ މަސައްކަތް އޮތީ ބަޔަކާ ހަވާލުކުރެވިފައިވާ ކަމަށާއި އަދި ރަށްގިރުމުގެ މައްސަލައިގައި ކަމާގުޅޭ މިނިސްޓްރީއިން ހަދަންޖެހޭ އެސެސްމަންޓް ހައްދަވާނެކަމުގެ މައުލޫމާތު ވެސް ރައީސް ދެއްވި އެވެ.
ރައީސް ވަނީ މި ދަތުރުގައި އެ ހަތް ރަށުގެ އާއްމުންނާއި ކައުންސިލް މެމްބަރުންނާއި މަސްވެރިންނާއި ވިޔަފާރިވެރިންނާއި ދަރިވަރުންނާއި ފުލުހުން އަދި ސިއްހީ ހިދުމަތްތެރިންނާ ބައްދަލުކުރައްވައި ކަންބޮޑުވުންތައް ވެސް އައްސަވައިފަ އެވެ.
މީގެ އިތުރުން އޮމަދޫ ބަނދަރު ހުޅުވައިދެއްވައި އަދި ތިމަރަފުށީގައި 100 ހައުސިން ޔުނިޓް އެޅުމުގެ މަސައްކަތް އިފްތިތާހުކޮށްދެއްވި އެވެ.
ރައީސްގެ މި ދަތުރުގައި ޖުމްލަކޮށް މަޝްވަރާކުރެވުނު ކަންކަންކަމުގެ ތެރޭގައި ކަނޑުތޮށި ހިމާޔަތްކުރުމާއި، ސިއްހީ ވަސީލަތްތައް ތަރައްގީކުރުމާއި، ޓޫރިޒަމް ތަރައްގީކުރުމާއި، ބަނދަރާއި މަގުތަކާއި ހައުސިން ޕްރޮޖެކްޓްތައް ހިންގުން ހިމެނެ އެވެ. މީގެ އިތުރުން ކުޅިވަރުގެ ވަސީލަތްތަކާއި ބެހޭގޮތުންނާއި ތާރީހީ ސަގާފީ ތަރިކަތައް ހިމާޔަތްކުރުމުގެ މަޝްވަރާތައް ވެސް ބޭއްވެވި އެވެ.
މީގެ އިތުރުން އެމްޑީޕީގެ އެންމެ އިސް ލީޑަރުގެ ހައިސިއްޔަތުން، އެ ޕާޓީގެ އާއްމު މެމްބަރުންނާ ވެސް ބައްދަލުކުރެއްވެވި އެވެ.
