އަފްގާނިސްތުގައި ދިރިއުޅެމުންދާ އަންހެނުންނާއި އަންހެން ކުދިންގެ ހައްގުތައް ރައްކާތެރިކުރުމަށް އެކަށީގެންވާ ގާނޫނީ ފިޔަވަޅުތަކެއް އަޅައިދިނުމަށް އަފްގާނިސްތާނަށް އުފަން އެމެރިކާގެ މަޝްހޫރު ވާހަަކަ ލިޔުންތެރިޔާ ޚާލިދް ހުސެއިނީ ގޮވާލައިފި އެވެ.
އަފްގާނިސްތާނުގެ ހާލަތު ފަސް މަންޒަރުން ފެންނަ ދެ ވާހަކަ ކަމަށްވާ "ކައިޓް ރަނާ" އަދި "އަ ތައުޒަން ސްޕްލެންޑިޑް ސަންސް" ލިޔެ އެ ވާހަކަތަކުގެ ޒަރިއްޔާ އިން ގައުމުގެ ހާލަތު ދުނިޔެ އަށް ކިޔައިދީފައިވާ ހުސެއިނީ ބުނީ "އަފްގާނިސްތާނުގެ ހާލަތާ މެދު ވަރަށް ކަންބޮޑުވެ ހިތާމަކުރާ" ކަމަށެވެ.
ތާލިބާނުން 20 އަހަރަށް ފަހު އަފްގާނިސްތާން ހިފާފައިވާއިރު ގިނަ ގައުމުތަކުންނާއި ޖަމިއްޔާ ޖަމާއަތްތަކުން އަންނަނީ އެގައުމުގެ އަންހެނުންގެ ހައްގުތައް ކަށަވަރުކުރުމަށް ބާރުއަޅާ ގޮވާލަމުންނެވެ. އެމެރިކާ ސިފައިން 2001 ވަނަ އަހަރު އަފްގާނިސްތާނަށް އަރައި އުފައްދައިދިން ސަރުކާރުން އަންހެނުންގެ ހައްގުތައް ކަށަވަރު ކުރުމުގައި ބޮޑެތި ކުރިއެރުންތަކެއް ހޯދާފައިވާކަން ފާހަގަކޮށް، އ.ދ ގެ ރެފިއުޖީންނާއި ގުޅޭ ހާއްސަ ކޮމިޝަން ޔޫއެންއެޗްސީއާރްގެ ގުޑްވިލް އެމްބެސެޑަރުކަން ވެސް ކޮށްފައިވާ ހުސެއިނީ ބުނީ މިއަދު އަނެއްކާ ވެސް ކުރީގެ ބިރުވެރިކަން އައިސްފައިވާކަމަށެވެ.
ތާލިބާނުން މީގެ ކުރިން އެ ގައުމުގައި ވެރިކަން ކުރިއިރު، ތައުލީމު ހާސިލްކުރުމުންނާއި ވަޒީފާއަދާކުރުމުގެ ހައްގުން އަންހެނުން މަހުރޫމުކުރި އެވެ. ވެރިކަން އަނބުރާ ހޯދުމަށްފަހު ތާލިބާނުން ގެންގުޅޭނެ ސިޔާސަތުތަކާބެހޭ ގޮތުން ވާހަކަ ދައްކަމުން އެޖަމާއަތުގެ ތަރުޖަމާން ޒަބީހުﷲ މުޖާހިދު ބުނެފައިވަނީ އިސްލާމް ދީނުގައި އަންހެނުންނަށް ދީފައިވާ ހައްގުތަކެއް އެޖަމާއަތުން އަފްގާން އަންހެނުންނަށް ކަށަވަރުކޮށްދޭނެ ކަމަށެވެ.
ސީބީއެސް އަށް ދިން ހާއްސަ އިންޓަވިއުއެއްގައި ހުސެއިނީ ސިފަކުރި ގޮތުގައި ތާލިބާނުންނަކީ އިސްލާމީ ހަރުކަށި ފިކުރަށް ތަބާވާ މީހުންނެވެ. މީގެ ސީދާ އަސަރު އެންމެ ބޮޑަށް ކުރި ބަޔަކީ އަންހެނުން ކަމަށާއި އަންހެނުން އޭރު ދިރިއުޅެމުންދިޔައީ އަމިއްލަ ފަސްގަނޑުގައި ގައިދީންގެ ގޮތުގައި ކަމަށް އޭނާ ބުންޏެވެ.
ސޯވިއެޓް ޔޫނިއަނުން 1979 ވަނަ އަހަރު އަފްގާނިސްތާން ހިފިއިރު ހުސެއިނީ ދިރިއުޅެމުން އައީ ފްރާންސުގެ ޕެރިރަށް ޕެރިހުގަ އެވެ. އޭނާގެ ބައްޕަ އަކީ ޕެރިހުގައި ހުންނަ އަފްގާނިސްތާން އެމްބަސީގެ މުވައްޒަފެކެވެ. ސޯވިއެޓުން އެރުމުން ހުސެއިނީގެ އާއިލާ އިން އެމެރިކާ އިން ސިޔާސީ ހިމާޔަތް ހޯދީ އެވެ. އެ ގައުމުގައި ކިޔަވައި އޭނާ ފުރަތަމަ މަސައްކަތްކުރީ އެތެރެހަށީގެ ޑޮކްޓަރެއްގެ ގޮތުގަ އެވެ. އެކަމަކު "ކައިޓް ރަނާ" ގެ ކާމިޔާބީއާ އެކު ފުލް ޓައިމް ލިޔުންތެރިޔަކަށްވީ އެވެ.
