ތެހްރާން، އިރާން (އޯގަސްޓު 18) - ޔުރޭނިއަމް މުއްސަނދި ކުރުން އަވަސް ކުރެވޭނެ ގޮތެއް އިރާނުން ހޯދާފައިވާ ކަމަށް އދ. ގެ ރިޕޯޓަކުން ބުނެފައި ވަނިކޮށް، އެކަން ކުރަނީ ސުލްހަވެރި ބޭނުންތަކަށް ކަމަށް އިރާނުން ބުނެފި އެވެ.
އިންޓަނޭޝަނަލް އެޓޮމިކް އެނާޖީ އޭޖެންސީ (އައިއޭއީއޭ) ގެ ޑިރެކްޓަރު ރަފައެލް ގްރޮސީ މެމްބަރު ގައުމުތަކަށް އެންގެވި ގޮތުގައި ނަތާންޒް ނިއުކްލިއާ ފެސިލިޓީގައި ހަކުވިކަމާ އެކު ޔުރޭނިއަމް މުއްސަނދި ކުރެވޭނެ ގޮތް ވަނީ ހަދައިފަ އެވެ.
"އިރާނުގެ ހުރިހާ ނިއުކްލިއާ ޕްރޮގްރާމަކާއި ހަރަކާތެއް ވެސް ހިންގަނީ ނަން ޕްރޮލިފެރޭޝަން ޓްރީޓީ އާ އެއް ގޮތަށް،" އިރާނުގެ ފޮރިން މިނިސްޓްރީގެ ތަރުޖަމާނު ސައީދު ކާތިބްޒާދޭ ނެރުއްވި ބަޔާނެއްގައި ވިދާޅުވި އެވެ.
މިދިޔަ ހޮނިހިރު ދުވަހު އައިއޭއީއޭ އިން ބުނީ 60 ޕަސެންޓަށް ޔުރޭނިއަމް މުއްސަނދި ކުރެވޭނެ ގޮތެއް ނަތާންޒް ފެސިލިޓީގައި ގާއިމްކުރީ ދެ ސެންޓްރިފިއުޖްގެ އެހީގައި ކަމަށެވެ.
އިރާނުން މިދިޔަ އޭޕްރިލް މަހުން ފެށިގެން 60 ޕަސެންޓަށް ޔުރޭނިއަމް މުއްސަނދު ކުރަމުން ދިޔަ ނަމަވެސް، އޭރު ބޭނުން ކުރީ އެންމެ ސެންޓްރިފިއުޖެކެވެ.
އިރާނުގެ ނިއުކްލިއާ ޕްރޮގްރާމްގެ މަސައްކަތްތައް އަލުން ހަލުވިކުރީ އެކަމާ ގުޅޭ އެއްބަސްވުމަށް އަމަލު ނުކުރާނެ ކަމަށް އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ސަރުކާރުން 2019 ވަނަ އަހަރު އިއުލާނު ކުރުމުންނެވެ.
ޖޮއިންޓް ކޮމްޕްރިހެންސިވް ޕްލޭން އޮފް އެކްޝަންގެ ނަމުން 2015 ވަނަ އަހަރު އެކުލަވާލި އެއްބަސްވުމުގެ ދަށުން އިރާނުގެ ނިއުކްލިއާ ޕްރޮގްރާމްގެ މަސައްކަތްތައް މަޑު ޖައްސާލުމުން، އެ ގައުމާ ދެކޮޅަށް އަޅާފައިވާ ދަތި ކުރުމުގެ ފިޔަވަޅުތައް އުވާލަން ނިންމި އެވެ.
ނަމަވެސް އެމެރިކާ އިން އެއްބަސްވުމަށް އަމަލު ނުކުރާނެ ކަމަށް ބުނެ، އަލުން ދަތި ކުރުމުގެ ފިޔަވަޅުތައް ތަންފީޒު ކުރަން ފެށި އެވެ.
އެ އެއްބަސްވުން އަލުން ތަންފީޒު ކުރުމުގެ ގޮތުން އިރާނާއި ދުނިޔޭގެ ބާރުގަދަ ގައުމުތަކާ ދެމެދު މިދިޔަ އޭޕްރިލް މަހުން ފެށިގެން ހަ ފަހަރެއްގެ މަތިން ވަނީ މަޝްވަރާތައް ބާއްވާފަ އެވެ.
ބައްދަލުވުންތަކުގައި އެމެރިކާ އިން ވެސް ނުސީދާކޮށް ބައިވެރިވެ އެވެ. މަޝްވަރާގެ އެންމެ ފަހުގެ ބައްދަލުވުން ބޭއްވީ ޖޫން 20 ގަ އެވެ. އިތުރު ބައްދަލުވުމެއް ބާއްވާނެ ތާރީހެއް އިއުލާނުކޮށްފައި ނުވާއިރު، މަޝްވަރާތަކުން މާ ބޮޑު ކުރިއެރުމެއް ލިބޭ ކަމަކަށް ނުފެނެ އެވެ.
