ތަރުޖަމާ: ޢަބްދުލްމުޢީދު ޙަސަން
އެއް ދުވަހަކު ޢުމަރުގެފާނު ރަށުތެރޭގެ ޙާލަތު ބައްލަވަމުން ވަޑައިގަންނަވަނިކޮށް، އެހެން ޖަމަލުތަކަށް ވުރެ ސަމައްތަރުހެޔޮ ޖަމަލެއް ފެނިވަޑައިގަތެވެ. ދެން އެކަލޭގެފާނު އެ ޖަމަލާބެހޭ ގޮތުން ސުވާލުކުރެއްވި އެވެ. އެތާނގައި ތިބި މީހުން އެކަލޭގެފާނުގެ އަރިއަހުގައި ދެންނެވި އެވެ.
"މިއީ ކަލޭގެފާނުގެ ދަރިކަލުން ޢަބްދުﷲ ބްނު ޢުމަރުގެ ޖަމަލެކެވެ."
ދެން ޢުމަރުގެފާނު، އެކަލޭގެފާނުގެ ދަރިކަލުން އެތަނަށް ހާޒިރުކޮށްދިނުމަށް އެދިވަޑައިގަތެވެ.
އެކަލޭގެފާނުގެ ދަރިކަލުން، ޢަބްދުﷲ ހާޒިރުވެވަޑައިގެންނެވުމުން، އެއްސެވި އެވެ.
"ދަރިކަލުންނޭވެ! މިއީ ކާކުގެ ޖަމަލެއްތޯ އެވެ؟ އެހެން ޖަމަލުތަކަށްވުރެ މި ޖަމަލު ސަމައްތަރުހެޔޮވީ ކީއްވެތޯ އެވެ؟"
ޢަބްދުﷲ ދެންނެވި އެވެ.
"މިއީ، ތިމަންކަލޭގެފާނުގެ ޖަމަލެކެވެ. ތިމަންކަލޭގެފާނު މި ޖަމަލު ބައްލަވައިގަތްއިރު، މިއީ ނިކަމެތި ޖަމަލެކެވެ. ދެން ތިމަންކަލޭގެފާނު، އެހެން މީހުން ފަދައިން މި ޖަމަލަށް ކާންދެއްވައި ބެލެހެއްޓެވީމެވެ. އެކަމުގެ ސަބަބުން މި ޖަމަލު ސަމައްތަރުހެޔޮވީ އެވެ. އަދި އެހެން މީހުން ފަދައިން މި ޖަމަލުން ވިޔަފާރިކުރައްވައި ނަފާ ހޯއްދަވަމެވެ."
ޢުމަރުގެފާނު ވިދާޅުވި އެވެ.
"މީހުންނަށް މި ޖަމަލު ފެނުމުން، އެ މީހުން ބުނެނޫޅޭތޯ އެވެ؟
މިއީ އަމީރުލްމުއުމިނީންގެ ދަރިކަލުންގެ ޖަމަލެކެވެ. މިއަށް ކާންދޭށެވެ!
މިއީ އަމީރުލްމުއުމިނީންގެ ދަރިކަލުންގެ ޖަމަލެކެވެ. މިއަށް ފެންދޭށެވެ!"
ޢަބްދުﷲ ދެންނެވި އެވެ.
"މި ޖަމަލު ފެނުމުން، މީހުން ޢަމަލުކޮށްއުޅެނީ ތިޔަ ވިދާޅުވި ފަދައިންނެވެ."
ޢުމަރުގެފާނު ވިދާޅުވި އެވެ.
"އޭ އަމީރުލްމުއުމިނީންގެ ދަރިކަލުންނޭވެ! މި ޖަމަލު ބައްލަވައިގަތުމަށްޓަކައި ދެއްވި އަގު، މި ޖަމަލުން ލިބިވަޑައިގެންނެވި ފައިދާގެ ތެރެއިން ނަންގަވާށެވެ! އެއަށްފަހު، ބާކީހުރި އެއްޗަކާއި އަދި މި ޖަމަލުން ވިޔަފާރިކުރައްވައިގެން ލިބިވަޑައިގަންނަވާ އާމުދަނީ، މުސްލިމުންގެ ބައިތުލްމާލަށް ދައްކަވާށެވެ! އެއީ، ރައްޔިތުންގެ އަތުން ލިބޭ ފައިދާ، ރައްޔިތުންނަށް ހޭދަކުރުމަށްޓަކަ އެވެ!"
