ޖެނިން، ފަލަސްތީން (އޯގަސްޓު 16) - އިޒްރޭލުން ވެރިވެގަނެފައިވާ ހުޅަނގު އައްސޭރީގައި ހުންނަ ޖެނިން ރެފިއުޖީ ކޭމްޕުގައި އިޒްރޭލު ފުލުހުން ހަމަލާ ދިނުމުން ފަލަސްތީނުގެ ހަތަރު މީހަކު މަރުވެއްޖެ އެވެ.
އެ ހާދިސާ ހިނގީ ޔަހޫދީން އާބާދު ކުރުމާ ގުޅޭ ގޮތުން ހަމަނުޖެހުން އުފެދިފައި ވަނިކޮށް ހުޅަނގު އައްސޭރީގައި އޮޕަރޭޓު ކުރާ އިޒްރޭލުގެ ބޯޑަރު ފުލުހުން ޖެނިން ރެފިއުޖީ ކޭމްޕަށް ގޮސް "ޓެރަރިޒަމް" ގެ ތުހުމަތު ކުރެވޭ ފަލަސްތީނު މީހެއް ދިރިއުޅޭ ގެ ބަލައި ފާސްކުރަން ފެށުމުންނެވެ.
އިޒްރޭލުން ބުނީ އެ ތަނުގައި ތިބި ގިނަ ބަޔަކު އިޒްރޭލް ފުލުހުންނަށް އަމާޒުކޮށްފައި ބަޑި ޖެހި ކަމަށާއި ރައްދުގައި ފުލުހުން ވެސް ބަޑި ޖެހީ ކަމަށެވެ.
މިދިޔަ މޭ މަހުން ފެށިގެން ޖެނިން އާއި ބެއިތާ އަވަށުގައި ދަނީ ހަމަނުޖެހުން ހިނގަމުންނެވެ. އެއީ ގާނޫނާ ހިލާފަށް ޔަހޫދީން އެތަނުގައި ވަޒަންވެރިވެ ގެތައް އަޅަން ފެށުމުންނެވެ.
ފަލަސްތީނުގެ ހެލްތު މިނިސްޓްރީން ބުނީ ހޯމަ ދުވަހުގެ ހަމަނުޖެހުމުގައި އިޒްރޭލުން ބަޑި ޖެހުމުން ފަލަސްތީނުގެ ހަތަރު މީހަކު މަރުވި ކަމަށެވެ.
މަރުވި މީހުންނަކީ އުމުރުން 21 އަހަރުގެ ރައިދް އަބޫ ސެއިފް، އުމުރުން 19 އަހަރުގެ ސާލިހް އައްމާރް، އަމްޖަދް ހުސެއިނިއްޔާ އަދި ނޫރެއްދީން ޖައްރާރް އެވެ.
އަބޫ ސެއިފް އާއި އައްމާރްގެ ހަށިގަނޑު ޖެނިން ހޮސްޕިޓަލްގެ މޯޗަރީގައި އޮތް އިރު، އިޒްރޭލް ފުލުހުން ވަނީ އަނެއް ދެ މީހުންގެ ހަށިގަނޑު ގެންގޮސްފަ އެވެ.
ފަލަސްތީނުގެ ސަރުކާރުން ވަނީ އިޒްރޭލުން ތަކުރާރުކޮށް ހިންގާ ޖަރީމާތައް ކުށްވެރިކޮށް، ހަމަނުޖެހުން އުފެއްދުމަށް ހިތްވަރުދޭ ކަމަށް ތުހުމަތުކޮށްފަ އެވެ.
ހަމަނުޖެހުން އިތުރުވުން
ފާއިތުވި ހަފްތާތަކުގައި އިޒްރޭލް ފުލުހުންނާއި ފަލަސްތީން ރައްޔިތުންނާ ދެމެދު އުތުރު ހުޅަނގު އައްސޭރީގައި ގިނަ ކުރިމަތިލުންތަކެއް ވަނީ ހިނގަން ފަށާފަ އެވެ.
އެ ސަރަހައްދުގައި ހުންނަ ބެއިތާ އަވަށުގެ ރައްޔިތުން އަންނަނީ ޔަހޫދީން އާބާދު ކުރުމާ ދެކޮޅަށް ގަވާއިދުން އެއްވުންތައް ބާއްވަމުންނެވެ.
އެއްވުންތަކުގައި ހިނގާ ކުރިމަތިލުންތަކުގައި އިޒްރޭލް ފުލުހުން ހަމަލާ ދިނުމުން ފަލަސްތީނުގެ އެތައް ސަތޭކަ މީހުންނެއް މިހާތަނަށް މަރުވެފައި ވެ އެވެ.
ބެއިތާ އަވަށް ކައިރީގައި މިދިޔަ މޭ މަހު ޔަހޫދީން ވަޒަންވެރިވެ "އެވިއަތާ" ގެ ނަން ދީގެން ގެތަކެއް އަޅަން ފެށީ އިޒްރޭލުގެ ކަމާ ބެހޭ އިދާރާތަކުގެ ހުއްދަ ނުހޯދަ އެވެ.
މިދިޔަ ޖުލައި މަހު އެ ތަނުން ޔަހޫދީން ފޮނުވާލި ނަމަވެސް އިޒްރޭލް ސިފައިން އަދިވެސް އެ ތަނުގަައި އެބަ ތިއްބެވެ. އެ ތަނުގައި ޔަހޫދީން ގެތައް އެޅުމާ މެދު އިޒްރޭލުން އަދި ގޮތެއް ނުނިންމަ އެވެ.
ބެއިތާގެ ރައްޔިތުން ބުނެފައި ވަނީ އިޒްރޭލް ސިފައިން އެ ތަން ދޫކޮށްފައި ދަންދެން ހުއްޓާނުލައި އެއްވުންތައް ބާއްވާނެ ކަމަށެވެ.
އިޒްރޭލުން ފަލަސްތީނުގެ ހުޅަނގު އައްސޭރި ހިފީ 1967 ގެ "ހަ ދުވަހުގެ ހަނގުރާމަ" އަށް ފަހު އެވެ. އެ ތަނުގައި ހުރި ޔަހޫދީންގެ ހުރިހާ އިމާރާތަކީ ގާނޫނީ ހިލާފަށް ހަދާފައިވާ ތަންތަން ކަމަށް ބައިނަލްއަގްވާމީ މުޖުތަމައިން ގަބޫލުކުރެ އެވެ.
ހުޅަނގު އައްސޭރީގައި އިޒްރޭލުން ހެދި ސަރަހައްދުތަކުގައި ބައި މިލިއަނެއްހާ މީހުން އުޅޭ އިރު، 2.8 މިލިއަން ފަލަސްތީން ރައްޔިތުން ހުޅަނގު އައްސޭރީގެ އަވަށްތަކުގައި އުޅެ އެވެ.
