ބެއިޖިން، ޗައިނާ (އޯގަސްޓު 16) - ތާލިބާނުން އަފްގާނިސްތާނުގެ ކޮންޓްރޯލް ހޯދާފައި ވަނިކޮށް، އެ ގައުމާ އެކު އޮތް "އެކުވެރިކަމުގެ ބަދަހި ގުޅުން" ވަރުގަދަ ކުރަން ތައްޔާރު ކަމަށް ޗައިނާ އިން ބުނެފި އެވެ.
މިދިޔަ މޭ މަހުން ފެށިގެން އެމެރިކާ ސިފައިން އަފްގާނިސްތާނުން ފައިބަން ފެށުމުން ޗައިނާ އިން ވަނީ ނުރަސްމީކޮށް ތާލިބާނުންނާ އެކު ގުޅުން ރަނގަޅު ކުރަން ފަށާފަ އެވެ.
ޗައިނާ އާއި އަފްގާނިސްތާނު ގުޅޭ ބޯޑަރަކީ 76 ކިލޯމީޓަރު ދިގު ބޯޑަރެކެވެ.
ޗައިނާގެ އުއިގާ ދަރިކޮޅުގެ މުސްލިމުން އަފްގާނިސްތާނަށް އެތެރެވެ، ހަނގުރާމައިގެ ތަމްރީން ހޯދައި، ޗައިނާގައި ޓެރަރިސްޓް އަމަލުތައް ހިންގުމުގެ ބިރު ޗައިނާ ސަރުކާރަށް އޮވެ އެވެ.
ނަމަވެސް ތާލިބާނުންގެ އިސް ވަފުދެއް މިދިޔަ މަހު ޗައިނާ ފޮރިން މިނިސްޓަރު ވާންގް ޔީ އާ ބައްދަލުކުރުމަށް ފަހު ބުނީ ހަނގުރާމަވެރިން ތަމްރީން ކުރާ މަރުކަޒަކަށް އަފްގާނިސްތާނު ނުހަދާނެ ކަމަށެވެ.
އޭގެ ބަދަލުގައި ޗައިނާއިން ވަނީ އަފްގާނިސްތާނު އަލުން ބިނާ ކުރަން އިގްތިސާދީ އެހީ އާއި އިންވެސްޓްމަންޓް ފުރުސަތުތައް ފަހިކޮށްދޭނެ ކަމަށް ބުނެފަ އެވެ.
ހޯމަ ދުވަހު ޗައިނާއިން ބުނީ އަފްގާނިސްތާނާ އެކު އޮތް ގުޅުން ބަދަހި ކުރުން ލިބުނު ފުރުސަތަށް "މަރުހަބާ" ކިޔާ ކަމަށެވެ.
"ޗައިނާއާ އެކު ރަނގަޅު ގުޅުމެއް ބާއްވަން ބޭނުންވާ ކަން ތާލިބާނުން ވަނީ ތަކުރާރުކޮށް ހާމަކޮށްފައި. އަފްގާނިސްތާނު އަލުން ބިނާ ކުރުމާއި ތަރައްގީ ކުރުމުގައި ޗައިނާގެ ބައިވެރިވުމަށް އެ މީހުން މަރުހަބާ ކިޔާ،" ފޮރިން މިނިސްޓްރީގެ ތަރުޖަމާނު ހުއާ ޗުންޔިންގް ވިދާޅުވި އެވެ.
"އަޅުގަނޑުމެން މި ކަމަށް މަރުހަބާ ކިޔަން. އަފްގާނިސްތާނުގެ ކުރިމަގާ މެދު ގޮތް ނިންމުމުގެ މިނިވަންކަން އަފްގާން ރައްޔިތުންނަށް ލިބިގެންވާކަން ޗައިނާއިން ބަލައިގަނެ، އެކަމަށް އިހްތިރާމް ކުރަން."
ހުއާ ތާލިބާނުންނަށް ގޮވާލެއްވީ ސުލްހަވެރިކަމާ އެކު ބާރުތައް ބަދަލުކޮށް، "ހުޅުވާލެވިފައިވާ ގިނަ މީހުންގެ ބައިވެރިވުން ހިމެނޭ އިސްލާމީ ސަރުކާރެއް" ގާއިމް ކުރަން ފުރުސަތު ދޭނެ ކަމަށް ވީ ވައުދު ފުއްދުމަށެވެ.
އަފްގާނިސްތާނުގެ ހާލަތު ގޯސްވަމުން ދާތީ ޗައިނާ ރައްޔިތުން އަނބުރާ ގެންގޮސްފައިވީ ނަމަވެސް ކާބުލްގައި ހުންނަ ޗައިނާ އެމްބަސީ ބަންދުކޮށްފައެއް ނުވެ އެވެ.
އަފްގާނިސްތާނުގައި މި ވަގުތު ތިބި މަދު އަދަދެއްގެ ޗައިނާ ރައްޔިތުންނަށް އަންގާފައި ވަނީ ހާލަތު ރަނގަޅަށް މޮނީޓާކޮށް، ގެއިން ނުނިކުމެ ތިބުމަށެވެ.
