ކުރީގެ ރައީސް މުހައްމަދު ނަޝީދު އަވަހާރަކޮށްލަން ދިން ބޮމުގެ ހަމަލާ ތަހުގީގު ކުރުމަށްފަހު ރައްޔިތުންގެ މަޖިލީހުގެ ސަލާމަތާ ކަންތައްތަކާ ބެހޭ ކޮމެޓީން ނެރުނު ރިޕޯޓުގައި ދީފައިވާ ރިކޮމެންޑޭޝަންތަކުގެ ތެރެއިން 38 ކަމަކަށް މިހާރު ވެސް އަމަލު ކުރަމުން އަންނަ ކަމަށް ބުނި ނަމަވެސް, އެއީ ކޮން ކަންތައްތަކެއް ކަމެއް ރައީސް އޮފީހުން ހާމައެއް ނުކުރި އެވެ.
ރައީސް އޮފީހުން މިދިޔަ ބުރާސްފަތި ދުވަހު ބުނެފައި ވަނީ މަޖިލީހުގެ އިންކުއަރީ ކޮމެޓީން ނެރެފައިވާ ރިޕޯޓުގައި ބަޔާންކޮށްފައިވާ 45 ރިކޮމެންޑޭޝަންގެ ތެރެއިން 38 ކަމަކީ "މިހާރު ވެސް ފެށިގެން ކުރިއަށްދާ މަސައްކަތް" ކަމަށެވެ.
ސަރުކާރުން އަމަލު ކުރަމުންދާ ރިކޮމެންޑޭޝަންތައް އޮޅުންފިލުވުމަށް މި ނޫހުން ތިން ދުވަހުގެ މަތިން ރައީސް އޮފީހުގެ ތަރުޖަމާނު މަބްރޫކް އަޒީޒަށް ވަނީ ގުޅައިފަ އެވެ. ނަމަވެސް، މިހާތަނަށް އެކަން ހާމައެއް ނުކުރައްވަ އެވެ.
އިންކުއަރީ ރިޕޯޓުގެ ރިކޮމެންޑޭޝަންތަކަށް އަމަލު ކުރުމާ ގުޅޭ ގޮތުން ރައީސް އިބްރާހިމް މުހައްމަދު ސޯލިހު ވަނީ ނެޝަނަލް ސެކިއުރިޓީ ކައުންސިލާ ބުރާސްފަތި ދުވަހު ބައްދަލު ކުރައްވައިފަ އެވެ.
"ރިޕޯޓުގައި ފާހަގަކޮށްފައިވާ އިތުރު ކަންކަމަށް އަމަލުކުރަން ފެށުމާ ގުޅޭ ގޮތުން ވެސް މިއަދުގެ ބައްދަލުވުމުގައި ރައީސުލްޖުމްހޫރިއްޔާ ވަނީ އެންއެސްސީ މެންބަރުންނާ މަޝްވަރާކުރައްވާފައި،" ބައްދަލުވުމަށްފަހު ނޫސްތަކަށް ދިން ބަޔާނެއްގައި ރައީސް އޮފީހުން ބުނެފައިވެ އެވެ.
މަޖިލީހުން ނެރުނު އިންކުއަރީ ރިޕޯޓުގައި ރައީސް ނަޝީދަށް ދޭންޖެހޭ ސެކިއުރިޓީ ދިނުމުގައި ހުރި ބައިވަރު މައްސަލަތައް ފާހަގަކޮށް ޑިފެންސް މިނިސްޓަރު މާރިޔާ އާއި ޗީފް އޮފް ޑިފެންސް ފޯސް މޭޖާ ޖެނެރަލް އަބްދުﷲ ޝަމާލް ފުރިހަމައަށް ޒިންމާއަދާކުރައްވާފައިނުވާކަން ފާހަގަކޮށްފައިވެ އެވެ.
އިންކުއަރީ ރިޕޯޓުގައި ދީފައިވާ 45 ރެކޮމެންޑޭޝަން ތެރޭގައި ހިމެނެނީ ހަރުކަށި ފިކުރާ ދެކޮޅަށް މަސައްކަތް ކުރުމަށް ދީފައިވާ 29 ރެކޮމެންޑޭޝަނަކާއި ނަޝީދުގެ ސެކިއުރިޓީއާ ގުޅޭ 10 ރިކޮމެންޑޭޝަނަކާއި ފައިނޭންޝަލް އިންޓެލިޖެންސާ ގުޅޭ ހަ ރެކޮމެންޑޭޝަނެކެވެ.
ހަރުކަށި ފިކުރާ ދެކޮޅަށް މަސައްކަތް ކުރުމަށް ދީފައި ހުރި ރިކޮމެންޑޭޝަންސްގެ ތެރޭގައި ސިއްރު މައުލޫމާތު ބަދަލު ކުރެވޭނެ ވަރުގަދަ ނިޒާމެއް ގާއިމް ކުރުމާއި ނެޝަނަލް އިންޓެލިޖެންސްއާ ގުޅޭ ގާނޫނެއް އެކުލަވާލުމާއި ކައުންޓާ ޓެރަރިޒަމަށް ވަކި ބަޖެޓެއް ކަނޑައެޅުން ހިމެނެ އެވެ.
ނަޝީދުގެ ސެކިއުރިޓީއާ ގުޅޭ ގޮތުން ދީފައިވާ ރެކޮމެންޑޭޝަންތަކުގެ ތެރޭގައި އެމަނިކުފާނުގެ ގެކޮޅުގެ ސެކިއުރިޓީ ހަތިޔާރާއެކު 24 ގަޑިއިރު ބެލުމާއި އާމާޑް ކާރުކޮޅެއްގައި ނަޝީދު އެއް ތަނުން އަނެއް ތަނަށް ގެންދިއުމާއި ސެކިއުރިޓީ ޓީމު ވެޓު ކުރުމާއި ސެކިއުރިޓީ ޓީމަށް ގަވާއިދުން ރިފްރެޝް ކުރުމުގެ ކޯސްތައް ހިންގުން ހިމެނެ އެވެ.
