ޖޫސީ ޕެކެޓަކާއި، އެޕޯލޯ ކޭކަކުން އިންޓަވަލް ގަޑީގެ އުފާވެރި ހަނދާންތައް އާވާނެ އެތައް ބަޔަކު ތިބޭނެކަން ޔަގީނެވެ. އެހެންނަމަވެސް މިއަދު އެއީ ހަމަ އެކަނި މާޒީ އެވެ. ތައްޔާރީ ކާނާތަކާއި، ހަކުރުން ފުރިފައިވީ އެކި ބުއިންތަކުގެ ނުރައްކާތެރިކަމާއި ގެއްލުން ވިސްނި ދުޅަހެޔޮ މުސްތަގުބަލަކަށް މިސްރާބު ޖަހާފައިވާ އާއިލާތައް މިއަދު އަހަރެމެންގެ ތެރޭގައި ވަރަށް ގިނަ އެވެ. އާ އުންމީދުތަކާއި ހުވަފެންތަކަށް މަރުހަބާކިޔަމުން ދިރާސީ އަހަރު ފެށިތާ ހަފްތާއެއްވެފައި ވާއިރު، އިންސްޓަގްރާމުގައި އެންމެ "ހިޓުވި" އިންޓަވަލް އަކީ ފޮނިތޮށިއެމްވީ ގެ ފައުންޑާ އައިމިނަތު ރުޚުސާ (ތޫތަ) އޭނާގެ ދަރިފުޅަށް ތައްޔާރުކުރާ ލަންޗް ބޮކްސް އެވެ.
ތޫތަގެ އަމިއްލަ ބްރޭންޑް ފޮނިތޮށިއެމްވީގެ އިންސްޓަގްރާމް އެކައުންޓުން ތޫތަގެ ބަދިގޭގެ މަންޒަރުތައް އޭނާގެ ފޮލޯވަރުންނާއި ހިއްސާކުރުމަކީ ކޮންމެ ދުވަހެއްގެ އާދަ އަކަށްވީނަމަވެސް، ސްކޫލްގެ ފުރަތަމަ ދުވަހު ދޮށީ ދަރިފުޅުގެ ލަންޗްބޮކްސް ތައްޔާރުކުރަމުން ނެގި ފޮޓޯއަކީ އެހާ މަގުބޫލުވާނޭ އެއްޗެއް ކަމަކަށް އޭނާ ކުޑަކޮށްވެސް ހިއެއް ނުކުރެ އެވެ.
"ވަކި މާ ބޮޑު އެއްޗެއް އެކްސްޕެކްޓް ކޮށްގެނެއް ނޫން އެދުވަހު ހަމަ ދަރިފުޅުގެ ލަންޗްބޮކްސް ތައްޔާރުކޮށްފައި އަޕްލޯޑްކޮށްލީ. އެކަމަކު މުޅި ޑީއެމް އޮތީ ފުރިފައި އެކި މީހުންގެ މެސެޖުތަކުން.. ލަންޗް ބޮކްސް ތައްޔާރުކުރި ގޮތް އަހާފައި ހުރި މީހުންނާއި، އިތުރު އިންސްޕިރޭޝަން ހޯދަންބޭނުންވާތީ އަދިވެސް ޝެއާ ކުރަން ބުނެފައި ހުރި މެސެޖުތަކުން،" ތޫތަ ކިޔައިދިނެވެ.
ތޫތަ އޭނާގެ ދަރިފުޅަށް ތައްޔާރުކޮށްފައިވާ ލަންޗް ބޮކްސް އެއް
ލިބުނު ބޮޑު ތަރުހީބާއި އެކު، ތޫތަވަނީ އޭނާގެ އިންސްޓަގްރާމްގައި ލަންޗްބޮކްސްއަށް ހާއްސަކޮށް "ލަންޗް ބޮކްސް ޓޭލްސް" ހައިލައިޓްވެސް ހަދާފަ އެވެ.
ތޫތަގެ ލަންޗްބޮކްސް މިހާ މަގްބޫލުވުމުގެ ސަބަބުތައް ގިނަ އެވެ. އެކި ކުލަތަކާއި ރަހަތަކުން ލަންޗްބޮކްސް ނުހަނު މުއްސަންޖެވެ. ތަށްޓަށް ފިޓުވާހެން އެކި ވަޒަންތަކުގެ ކާނާ އެމުނި އެކުލިފައިވާލެއް ފުރިހަމަ އެވެ. ކިތަންމެ ކާއެއްޗިއްސާއި ދުރުކުއްޖަކުވެސް ހަމަ ހިލާ ރަހަ ނުބަލާ ދޫކޮށް ނުލާނެކަން ޔަގީނެވެ.
ތޫތަގެ ދަރިފުޅުގެ އަތުކުރެހުމުން ބޭރު ޑިޒައިންކޮށް، ޖުމްލަ ހަ ބަޔަށް ބަހާލެވިފައިވާ މި ލަންޗްބޮކްސްގައި އެ ދުވަހަކު ބޭނުންނަމަ ތަފާތު ހަތް ބާވަތް ނުވަތަ އެއަށްވުރެ އިތުރަށްވެސް ބޭނުންކުރެވިދާނެ އެވެ. މިކަމުގައި އޮތީ އެމީހެއްގެ އުފެއްދުންތެރިކަމާއި ކުޅަދާނަކަމެވެ.
ތޫތަ އޭނާގެ ދެކުދިންނާއި ފިރިމީހާއާއި އެކުގައި --
ތޫތަ ބުނާގޮތުން އޭނާގެ ދެ ދަރިންނަކީ ކާންދޭން އެންމެ ފަސޭހަ ކުދިންނެއް ނޫނެވެ. އެހެންކަމުން އަބަދުވެސް އެކުދިންނަށް ކަމުދާނެ އެއްޗަކާއި އަދި ކަމުދާނެހެން ޔަގީންނުވާ ބާވަތެއްވެސް އޭނާ ހިމަނާލަ އެވެ. މިގޮތުން ތައްޔާރުކޮށްފައިވާ ބައެއް ބާވަތްތަކުގެ ތެރޭގައި އެކި ވައްތަރުތަކުގެ ތަރުކާރީ، މޭވާ، ކުކުޅު، ޔޯގަޓް، ޗީޒް އަދި ޕޮޕްކޯން ހިމެނެ އެވެ. ބައެއް ފަހަރު ޗިޕްސް އާއި ނާޗޯޒް ފަދަ ބާވަތްތައްވެސް ހިމަނަ އެވެ.
"ބޭނުމަކީ އަސްލު ސްކޫލްގައި ވިޔަސް، ބެލެންސްޑް މީލްއެއް ނަގަން ދަސްކޮށްދިނުން. އެއީ ކުދިން ކިޔަވާވެސް ކަމެއް. އެހެންވީމަ ކޮންމެ ފަހަރަކު ބުނެގެން ކުރެވުމަށްވުރެ، އެގޮތަށް ޕްރެކްޓިސްކުރުވުމުން އެ އާދަ ހަރުލައްވަން ފަސޭހަވާނެ ކަމަށް ގަބޫލުކުރެވެނީ،" ތޫތަ ބުންޏެެވެ.
ދަރިފުޅު ސްކޫލަށް ދާން ތައްޔާރުވާ ގަޑީގައި މަސައްކަތް ފަށައި ކޮންމެ ދުވަހުވެސް ގާތްގަނޑަކަށް 10 މިނިޓުތެރޭ އިންޓަވަލް ތައްޔާރުކޮށް ނިންމާލެވެނީ ތޫތަ ބުނާގޮތުން ދުރާލާ ރާވައި ތައްޔާރުވެގެންނެވެ. މިކަމުގައި އޭނާގެ ސިއްރަކީ ކޮންމެ ހަފްތާއަކުވެސް ކެއްކުމުގެ ސާމާނު ގަތުމުގެ ކުރިން އެކަމުގައި ދަރިންވެސް ބައިވެރި ކުރުވާ އެކުދިން ބޭނުންވާ ބާވަތްތައް ވެސް އަހައި، އެ ތަކެތިވެސް ހިމަނައިގެން އެއްޗެހި ހަމަކޮށް ތަރުކާރީ އާއި މޭވާ ފަދަ ބާވަތްތައް ދޮވެ ތައްޔާރުކޮށްފައި ބެހެއްޓުމެވެ.
މިކަމުގައި އޭނާއަށް ލިބޭ ހުރިހާވެސް އުފަލަކީ ދަރިފުޅުގެ ލޯބި ހިނިތުންވުން ކަމުގައިވާއިރު، އަބަދުވެސް ދަރިފުޅުގެ ހިޔާލާއި މަޝްވަރާއި ހޯދުމަކީ ތޫތަ ބުނާގޮތުން އެންމެ މުހިންމު އެއް ކަމެވެ.
ތޫތަ ތައްޔާރުކޮށްފައިވާ ލަންޗްބޮކްސް އެއް--
"މިގޮތަށް ލަންޗްބޮކްސް ތައްޔާރުކުރަން ބޭނުންނަމަ ރަނގަޅު ބޮކްސް އެއް ހޯދުން މުހިންމު. އެކަމަކު ލިބެން ނެތްނަމަ ކަޕްކޭކް ލައިނާސްވެސް ބޭނުންކުރެވިދާނެ. އަދި ކޮންމެ ފަހަރަކު ބޮއެފަ އުކާލާ ޕެކެޓްތަކުގެ ބަދަލުގައި ރީޔޫސަބަލް ޑްރިންކް ޕެކެޓެއް ބޭނުންކުރުން ބުއްދިވެރި،" ތޫތަ ލަފާދިނެވެ.
ތޫތަގެ ދެ ފިރިހެން ކުދިން ތިބޭއިރު އަދި މިހާތަނަށް އޭނާ އިންޓަވަލް ތައްޔާރުކުރަން ޖެހެނީ އުމުރުން 8 އަހަރުގެ ދަރިފުޅަަށް އެކަންޏެވެ. މެންދުރު އެކަކުން ފެށިގެން ވިހި މިނިޓުގެ ވަގުތުކޮޅެއް ކެއުމަށް ހާޢްސަކުރެވިފައިވާއިރު، ވީހާވެސް ހަށްޓަށް ލުއި، ރަހަމީރު ދުޅަހެޔޮ ގޮތަކަށް، ހަގު ދަރިފުޅުގެ ލަންޗް ބޮކްސް ތައްޔާރުކުރުމަށްވެސް ތޫތަ ހުރީ ކެތްމަދުވެފަ އެވެ.
