ވޮޝިންޓަން، އެމެރިކާ (އޯގަސްޓު 14) - "ސެޕްޓެމްބަރު އެގާރަ"އިގެ ހަމަލާއަށް 20 އަހަރު ފުރުމާ ދިމާކޮށް ޓެރަރިޒަމްގެ އަމަލުތަކެއް ހިންގަފާނެ ކަމަށް ބެލެވޭތީ ޑިޕާޓްމަންޓް އޮފް ހޯމްލޭންޑް ސެކިއުރިޓީން އެޑްވައިޒަރީ ނެރެފި އެވެ.
މީގެ 20 އަހަރު ކުރިން ސެޕްޓެމްބަރު 11، 2001 ވަނަ ދުވަހު، އެމެރިކާގެ ވޯލްޑް ޓްރޭޑް ސެންޓަރާއި ދިފާއީ މައި މަރުކަޒު ޕެންޓެގަން އަށް ހަމަލާ ދިނީ އެމެރިކާގެ ކޮމާޝަލް ހަތަރު ފްލައިޓެއް ހައިޖެކްކޮށްގެންނެވެ. މި ހަމަލާގައި، ފަހުރެއްގެ ގޮތުގައި ބަލަމުން ދިޔަ ވޯލްޑް ޓްރޭޑް ސެންޓަރުގެ އުސް ދެ ޓަވަރު ގޮއްވާލުމުން ބިމާކޮށްލި އެވެ.
މި ހަމަލާތަކުގައި 2،900 އަށް ވުރެ ގިނަ މީހުން މަރުވެ، ގާތްގަނޑަކަށް 6،000 މީހުން ޒަހަމްވި އެވެ.
މި ހަމަލާ ދިންތާ 20 އަހަރު ފުރޭއިރު، ނޭޝަނަލް ޓެރަރިޒަމް އެޑްވައިޒަރީ ސިސްޓަމް ބުލެޓިން އިން ބުނީ އެމެރިކާ އަށް ކުރިމަތިވެފައިވާ އޮތީ "ނުރައްކާގެ މިންވަރު އިތުރު މާހައުލެއް" ކަމަށާއި އެމެރިކާގެ އެތެރޭގައި އުޅޭ ޓެރަރިސްޓުންނާއި އެހެން ގައުމުތަކުގެ ޓެރަރިސްޓުންގެ ފަރާތުން ވެސް ނުރައްކާ އެބަ އޮތް ކަމަށެވެ.
އެގޮތަށް ބުނެފައި ވަނީ ހަރުކަށި ފިކުރު ފެތުރުމަށާއި ނުރައްކާތެރި އަމަލުތައް ހިންގުމަށް އޮންލައިން ފޯރަމްތައް ބޭނުން ކުރުން މި ދަނޑިވަޅުގައި އިތުރުވެފައިވާ ކަމަށް ފާހަގަވެފައި ވާތީ އެވެ.
ޑިޕާޓްމަންޓް އޮފް ހޯމްލޭންޑް ސެކިއުރިޓީން އެންމެ ފަހުން މިފަދަ އިންޒާރެއް ނެރުނީ ޕާލިމެންޓުގެ ޖަލްސާތައް ބާއްވާ ކެޕިޓަލް އިމާރާތަށް އޭރުގެ ރައީސް ޑޮނަލްޑް ޓްރަމްޕްގެ ސަޕޯޓަރުން ވަދެގަނެ ހިންގި ހަމަނުޖެހުންތަކާ ގުޅިގެންނެވެ.
އެ ފަހަރު އެ ޑިޕާޓްމަންޓުން ބުނީ ނުރައްކާ އޮތީ ސަރުކާރާ ދެކޮޅު، ނަސްލީ ތަފާތު ކުރުން ގެންގުޅޭ "ހައްދުފަހަނަ އެޅި ހަރުކަށި ފިކުރުގެ" މީހުންގެ ފަރާތުން ކަމަށެވެ.
އޭގެ ފަހުން މިދިޔަ މޭ މަހު ޑިޕާޓްމަންޓް އޮފް ހޯމްލޭންޑް ސެކިއުރިޓީން ބުނީ ކޮވިޑާ ގުޅިގެން އުފެދިފައިވާ ހާލަތުގެ ނާޖައިޒު ބޭނުންކޮށްގެން ހަމަލާއެއް ދީފާނެ ކަމަށެވެ.
ސެޕްޓެމްބަރު 11 އާ ދިމާކޮށް ހަމަލާއެއް ދީފާނެ ކަމަށް ބެލެވޭތީ މިދިޔަ ހުކުރު ދުވަހު ނެރުނު އެޑްވައިޒަރީގައި ބުނީ ޔަމަނުގައި ހިންގާ އަލް ގައިދާގެ ބްރާންޗުގެ ޕްރޮޕެގެންޑާ ފެތުރުމަށް ގެންގުޅޭ އިނގިރޭސި މަޖައްލާ "އިންސްޕަޔާ" ގެ އާ އަދަދެއް ހަތަރު އަހަރަށް ފަހު އަލުން ނެރެފައިވާ ކަމަށެވެ.
މިއަދާ ހަމައަށް އެމެރިކާއިން އަންނަނީ އަލް ގައިދާގެ ޔަމަން ބްރާންޗާ ދެކޮޅަށް ވައިގެ ހަމަލާތައް ދެމުންނެވެ.
ޑިޕާޓްމަންޓް އޮފް ހޯމްލޭންޑް ސެކިއުރިޓީއަކީ ސެޕްޓެމްބަރު 11 ގެ ހަމަލާތަކަށް ފަހު އުފެއްދި އިދާރާ އެކެވެ. އެ އިދާރާގެ ޒިންމާއަކީ ޓެރަރިޒަމްގެ ނުރައްކާ އޮތް މިންވަރު ގަވާއިދުން ދެނެގަނެ، އެއާ ގުޅޭ އިންޒާރުތައް ނެރުމެވެ.
