ރިޝްވަތު ހިފި ކަމުގެ ތުހުމަތު ކޮށްފައިވާ ސްޕޯޓްސް މިނިސްޓަރު އަހުމަދު މަހުލޫފާ މެދު ތަފާތުކޮށް އަމަލު ކުރަން ޖެހޭ ސަބަބެއް ނެތް ކަމަށް ވިދާޅުވެ، މަހުލޫފް ދައްކަވާ ވާހަކަތަކަށް ޕްރޮސިކިއުޓާ ޖެނެރަލް (ޕީޖީ) އޮފީހުން މިއަދު ރައްދު ދީފި އެވެ.
އެމްއެމްޕީއާރްސީގެ މައްސަލައިގައި މަހުލޫފުގެ މައްޗަށް ކޮރަޕްޝަނުގެ ދައުވާކޮށްދިނުމަށް އެދި އޭސީސީން ޕްރޮސިކިއުޓާ ޖެނަރަލްގެ އޮފީހަށް ފޮނުވީ މިދިޔަ ޖޫން މަހުގެ ނުވަ ވަނަ ދުވަހު އެވެ. އަދި އެ ދުވަހުން ފެށިގެން ރައީސް ސޯލިހު ވަނީ މަހުލޫފު ވަޒީފާއިން ސަސްޕެންޑް ކުރައްވައިފަ އެވެ.
މައްސަލާގައި ގޮތެއް ނުނިމި ލަސްވެފައިވުމުން މަހުލޫފް ވެސް ދަނީ ކަންބޮޑުވުން ފާޅުކުރައްވަމުންނެވެ. އޭނާ ތުހުމަތު ކުރައްވާ ގޮތުގައި އެ މައްސަލައަށް ވަނީ ސިޔާސީ ނުފޫޒު ވަދެފަ އެވެ. ކެބިނެޓްގައި އިންނަވައި މަހުލޫފު ގެންދަވަނީ ދައުވަލުގެ މުއައްސަސާތަކުގެ މިނިވަންކަމާ މެދު ސުވާލު އުފައްދަވަމުންނެވެ.
އެ މައްސަލައާ މެދު ގޮތެއް ނުނިމި ލަސްވެފައިވާ ކަމަށް ރައީސް އިބްރާހިމް މުހައްމަދު ސޯލިހް ވެސް މިދިޔަ ބުދަ ދުވަހު ވަނީ ވިދާޅުވެފަ އެވެ.
ދައުވާއާ މެދު ގޮތެއް ނުނިންމާތީ ރުޅިގަދަ ވެފައިވާ މަހުލޫފް ރޭ ވިދާޅުވެފައިވަނީ އެމްއެމްޕީއާރްސީގެ ހިޔާނާތުގެ މައްސަލައިގައި އޭނާގެ މައްޗަށް ދޮގު ތުހުމަތުތަކެއް އުފުލާފައިވާ ކަމަށާއި އެ ދައުވާ އުފުލައިފި ނަމަ ދައުލަތުގެ މުއައްސަސާތަކުން "ހޭވި ހަޑި ހާމަވެ, އޮރިޔާންވާނެ" ކަމަށެވެ.
މަހުލޫފްގެ ތުހުމަތުތަކާ ގުޅޭގޮތުން ސުވާލު ކުރުމުން ޕީޖީ އޮފީހުގެ ތަރުޖަމާން އަދި ޕަބްލިކް ޕްރޮސިކިއުޓާ އަހުމަދު ޝަފީއު "އަދަދު" އަށް މިއަދު ވިދާޅުވީ އެ މައްސަލައާ މެދު އަދިވެސް ގޮތެއް ނުނިމޭ ކަމަށާއި އަދިވެސް ތަހުގީގީ އިދާރާތަކާއެކު މަސައްކަތް ކުރަމުން އަންނަ ކަމަށެވެ.
އޭނާގެ މައްޗަށް ދައުވާ ކުރާނެ ހެކި ނެތިގެން ދައުވާ ނުކުރަން ޕީޖީ ހުސައިން ޝަމީމް ނިންމި ކަމަށް މަހުލޫފް ދައްކަވާ ވާހަކަތައް ޝަފީއު ދޮގު ކުރައްވަ އެވެ. ޝަފީއު ވިދާޅުވީ އެ މައްސަލާގައި އަދި ވަކި ގޮތެއް މިހާތަނަށް ނިންމާފައި ނުވާ ކަމަށެވެ.
"ބައެއް ކޭސްތަކުގައި ކޭސް ބަލައިގެންފައި ދައުވާ ކުރުމާމެދު ގޮތެއް ނިންމާ މަރުހަލާގައި އިތުރު ކަންކަން ސާފު ކުރުމަށް މުއްދަތު ނަގާ. މިއީ އާ ކަމެއް ނޫން. ބޮޑެތި މައްސަލަތަކުގައި މިހެން ދިމާވޭ،" ޝަފީއު ވިދާޅުވި އެވެ.
މަހުލޫފާ މެދު ވަކި ތަފާތު ގޮތަކަށް އަމަލު ކުރަން ޖެހޭ ސަބަބެއް ނެތް
މަހުލޫފު ރޭ ވަނީ އެންޓި ކޮރަޕްޝަން ކޮމިޝަންގެ ރައީސް މަރިޔަމް ޝިއުނާ އާއި އެސެޓް ރިކަވަރީ ކޮމިޝަންގެ ރައީސް އަހްމަދު އައްސަދަށް ވަރަށް ބޮޑަށް ފާޑުވިދާޅުވެފަ އެވެ.
އޭނާ ވިދާޅުވީ މައްސަލަ ވަކި ގޮތަކަށް ގެންދަން ޝިއުނާ އާއި އައްސައަދު ވާހަކަ ދައްކަވާފައިވާ ޗެޓްލޮގްތަކެއް އެބަހުރި ކަމަށެވެ. އޭނާއާ ދެކޮޅަށް އެއްވެސް ހެއްކެއް ނެތް ކަމަށާއި އެ މައްސަލަ ކޯޓަށް ހުށަހަޅައިފި ނަމަ "ދައުލަތް އޮރިޔާންވާނެ" ކަމަށް ތުހުމަތު ކުރެއްވި އެވެ.
މަހްލޫފް ވިދާޅުވީ ތަހުގީގީ އިދާރާތަކުން މަސައްކަތް ކުރީ "ޖެހިޖެހީނުން އޭނާ ދުވާލަން" ކަަމަށެވެ. މުއައްސަސާތަކާ ދެކޮޅަށް މަސައްކަތް ކުރައްވަނީ އެހެންވެ ކަމަށް ވިދާޅުވި އެވެ.
މަހްލޫފް ތުހުމަތު ކުރެއްވި ގޮތުގައި އޭނާގެ މައްސަލައިގައި ދައުލަތުން އަމަލުކުރަން އުޅެނީ ފައިސާދީގެން ހެކި ބަސް ވެސް ނަގާށެވެ.
މަހްލޫފްގެ މައްޗަށް ދައުވާކޮށްދޭން އެދި ޕީޖީއަށް ފޮނުވުމަށް ފަހު އޭސީސީން ނެރުނު ބަޔާނުގައި ބުނީ އެމްއެމްޕީއާރުސީގެ ފައިސާ އިން މަނީ ލޯންޑްރިން ހިންގި ކުންފުނި އެސްއޯއެފުން މަހްލޫފަށް ޖަމާކޮށްދިން 33000 ޑޮލަރަކީ ސިޔާސީ ގޮތުން ބޭނުންވި ވަކި މަގްސަދުތަކެއް ހާސިލްކުރުމުގެ މުގާބިލްގައި ދީފައިވާ ފައިސާއެއްކަން ތަހުގީގަށް އެނގިފައިވާ ކަަމަށެވެ. އޭގެތެރޭގައި ރައްޔިތުންގެ މަޖިލީހުގެ މެމްބަރެއްގެ ގޮތުގައި ހުންނަވައި ސްޕްޝަލް އިކޮނޮމިކް ޒޯން (އެސްއީޒެޑް)ގެ ބިލަށް ވޯޓު ދިނުމާއި ޕީޕީއެމްގައި ދެމިހުރުމުގެ މުގާބިލްގައި ލިބިފައިިވާ ފައިސާ ކަމަށް ވަނީ ތުހުމަތުކޮށްފަ އެވެ.
މި ތުހުމަތު މަހްލޫފް ދޮގު ކުރެއްވި އެވެ.
އޭނާ ވިދާޅުވި ގޮތުގައި އެމްއެމްޕީއާރުސީ މައްސަލައިގައި ފެށުނީއްސުރެން އޭނާއާ މެދު އަމަލުކުރަމުން އައީ ޒާތީކޮށް ސިޔާސީ ގޮތުން ކަތިލާ ކަންބަޅިއެއްގެ ގޮތަށެވެ. އެކަން އެގޮތަށް ކުރަނީ ވެސް ސިޔާސީ ބަޔަކު އަޑީގައި ތިބެގެންކަން އެންމެ އިސްވެރިންނަށް އެނގިވަޑައިގަންނަވާ ކަމަށާއި ބޭނުމަކީ ހަމައެކަނި މަގާމުން ވަކިކުރުން ކަމަށް ވިދާޅުވި އެވެ.
