އިޒްރޭލުން ވެރިވެގަނެފައިވާ ފަލަސްތީނުގެ ހުޅަނގު އައްސޭރީގައި ޔަހޫދީން އާބާދު ކުރުމަށް އިތުރު 2،000 ގެ އަޅަން ނިންމައިފި އެވެ.
މިއީ އާ ބޮޑު ވަޒީރު ނަފްތާލީ ބެނެޓްގެ ސަރުކާރުން ހުއްދަ ދިން ފުރަތަމަ ގެތަކެވެ. ފަލަސްތީނުން ވަނީ އެ ނިންމުން ކުށްވެރިކޮށްފަ އެވެ.
ސެކިއުރިޓީ އޮފިޝަލަކު އޭއެފްޕީ އަށް ބުނީ ޔަހޫދީންގެ ގެތަށް އެޅުމަށް ހުއްދަ ދިނީ ހުޅަނގު އައްސޭރީގައި "އޭރިއާ ސީ" ގެ ނަން ދީފައިވާ ހިސާބުގައި ކަމަށެވެ.
އެ ސަރަހައްދަކީ އިޒްރޭލުގެ ބާރު ހިންގާ ސަރަހައްދެކެވެ. ޔަހޫދީންގެ ގެތަކުގެ އިތުރުން އެ ތަނުގައި ފަލަސްތީނު މީހުން ގެ އެޅުމުގެ ހުއްދަ ވެސް ދީފައި ވެ އެވެ.
"އޭރިއާ ސީ ގައި ފަލަސްތީނު މީހުންނަށް ހާއްސަ 1،000 ހައުސިން ޔުނިޓު އަޅަން އަންނަ ހަފްތާގައި ހުއްދަ ދޭނެ ކަމަށް ބެލެވޭ. ޔަހޫދީންނަށް ހުއްދަ ދޭނީ 2،000 ހައުސިން ޔުނިޓު އަޅަން،" އޮފިޝަލް ބުންޏެވެ.
ފަލަސްތީނުގެ ރައީސް މަހްމޫދު އައްބާސްގެ އޮފީހުން ވަނީ އެކަމާ ހިތްހަމަނުޖެހުން ފާޅުކޮށްފަ އެވެ. އެއީ މަހްމޫދު އައްބާސް އާއި އެމެރިކާގެ ރައީސް ޖޯ ބައިޑެންއާ ދެމެދު ފޯނުން ކުރެއްވި މަޝްވަރާތަކާ ހިލާފަށް އިޒްރޭލު ސަރުކާރުން ނިންމި ނިންމުމެއް ކަމަށް އެ އޮފީހުން ބުންޏެވެ.
ރިޕޯޓުތައް ބުނާ ގޮތުން ބައިޑެން އާއި ބެނެޓް ވަރަށް އަވަހަށް ބައްދަލުކުރައްވާނެ އެވެ. އެމެރިކާ އަކީ ބައިނަލްއަގްވާމީ މުޖުތަމައުގައި އިޒްރޭލުގެ އެންމެ ބޮޑު އެހީތެރިޔާ އެވެ.
ޔަހޫދީން އާބާދު ކުރަން އިތުރު ގެތައް އަޅަން ހުއްދަ ދިނުމުން ބެނެޓްގެ ކޯލިޝަން ސަރުކާރުގެ ތެރެއިން ވެސް ވަނީ ފާޑުކިޔުން އަމާޒުވެފަ އެވެ.
ހުޅަނގު އައްސޭރި އާއި އިރުމަތީ ގުދުސް އަށް އިޒްރޭލުން ވެރިވެގަތީ 1967 ގަ އެވެ. އޭގެ ފަހުން ގާތްގަނޑަކަށް 700،000 އަށް ވުރެ ގިނަ ޔަހޫދީން ވަނީ އެ ސަރަހައްދުގައި ގެތައް އަޅައިގެން ދިރިއުޅެން ފަށާފަ އެވެ.
ނަމަވެސް އެއީ ބައިނަލްއަގްވާމީ ގާނޫނާ ހިލާފަށް ހިންގާ އަމަލެކެވެ. ފަލަސްތީނުން އުއްމީދު ކުރަނީ އެ ގައުމުގެ މިނިވަން ދައުލަތެއްގެ ސަރަހައްދުތަކުގެ ގޮތުގައި އެ ސަރަހައްދުތައް ހިމެނުމަށެވެ.
