ކުރިންވެސް މާލޭ ސިޓީގައި ކުނި ނަގަމުން އައިގޮތަށް، ގޭގެއަށް ގޮސްގެން ކުނި ނަގާގޮތަށް ހަމަޖައްސަވަން ހުށަހަޅުއްވާނެކަމަށް މާލޭ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެ އެވެ.
މާލޭގެ ކުނި މެނޭޖްކުރަން ހަވާލުކޮށްފައިވާ ވެމްކޯއިން މީގެ ކުރިން ގޭގެއަށް ގޮސްގެން ކުނި ނަގަމުން އައި ނަމަވެސް، ކޮވިޑާއެކު އެ ކުންފުނީގެ މުވައްޒަފުންގެ ރައްކާތެރިކަމަށްޓަކައި ގޭގެއަށް ނުވަންނަގޮތަށް ހަމަޖެއްސި އެވެ.
މާލޭ ސިޓީ ކައުންސިލްގެ ތަރައްގީގެ ޕްލޭނަށް ހިޔާލު ހޯދުމުގެ ރޭ ބޭއްވި މާފަންނު ބައްދަލުވުމުގައި މުއިއްޒު ވިދާޅުވީ މިހާރު ކޮވިޑުގެ ހާލަތު ރަނގަޅުވެފައިވާއިރު، ކުނި ނަގާ އިންތިޒާމަށް ބަދަލެއް އަންނަންޖެހޭ ކަމަށެވެ.
ކުނިނެގުން އެގޮތަށް ބަދަލުކުރަންޖެހޭ މައިގަނޑު ސަބަބެއް ކަމަށް މޭޔަރު ވިދާޅުވީ މާލޭ ސިޓީގެ މަގުތަކުގައި ކުނި ޖަމާވަމުންދާތީ ކަމަށެވެ.
އެގޮތުން، ވެމްކޯއާއެކު ބައްދަލުވުމެއް ބޭއްވިފައިވާ ކަމަށާއި ކައުންސިލް ބައްދަލުވުމުގައިވެސް މިކަން މިގޮތަށް ކުރުމަށް ނިންމާފައިވާކަމަށް ވިދާޅުވި އެވެ.
އަދި ކުނި ނެގުމުގެ ކަންތައް އެ ގޮތަށް ބަދަލުކުރާނީ އަންނަ މަހުގެ 21 ވަނަ ދުވަހު ކަމަށާއި، އެ ނިންމުމާބެހޭ ލިޔުން ވަރަށް އަވަހަށް ވެމްކޯއަށް ފޮނުވާނެ ކަން މުއިއްޒު ހާމަކުރެއްވި އެވެ.
ރޭ ތާޖުއްދީން ސްކޫލްގައި މާފަންނު ރައްޔިތުންނަށް ބޭއްވި ބައްދަލުވުމުގައި މާލޭ ސިޓީގެ ތަރައްގީގެ ޕްލޭނާއި، ފައިނޭންޝަލް ޕްލޭނާއި، އަންނަ އަހަރަށް ލަފާކުރާ ބަޖެޓާއި، އެކްޝަން ޕްލޭނަށް ހިޔާލު ހޯދުނެވެ.
އޭގެ އިތުރުން މޭޔަރު ވަނީ މިހާރު ހިނގަމުންދާ ބައެއް މަޝްރޫއުތަކާއި ޕްލޭންތަކުގެ ބައެއް މައުލޫމާތުތައް ދެއްވައިފަ އެވެ.
އެގޮތުން ބޮޑުގޭގައި އިސްމީ މަރުކަޒެއް ތަރައްގީކުރުމާއި، ގަޑިބުރުގެ ގަޑި އަލުން އިއާދަކުރުމުގެ އިތުރުން ކުރީގެ ރެންޓާލްސް ހުރި ތަނުގައި އޮތް ޕާކް ބުރިބުރިއަށް ނަގާފައިވާ ސައިކަލް ޕާކްކުރާތަނެއް ހެދުން ފަދަ ހިޔާލުތައް ހިއްސާ ކުރެއްވި އެވެ.
