ބެނޫގެ ނަން ދީފައިވާ ގިނިހިލަ 2135 ވަނަ އަހަރު ދުނިޔެއާ ވަރަށް ކައިރިން ދަތުރު ކުރާނެ ކަމަށާއި އެ ގިނިހިލަ ދުނިޔެއަށް ވެއްޓުމުގެ ކުޑަ ފުރުސަތެއް އެބަ އޮތް ކަމަށް ސައިންޓިސްޓުން ބުނެފި އެވެ.
ބެލެވޭ ގޮތުގައި ހަނދާއި ދުނިޔެއާ ދެމެދުގައިވާ ދުރުމިނަށް ވުރެ ކައިރިން އެ ގިނިހިލަ ދަތުރު ކުރާނެ އެވެ. އެއީ 1650 ފޫޓު ފުޅާ ގިނިހިލަ އެކެވެ.
"އޮސިރިސް-ރެކްސް" ގެ ނަން ދީފައިވާ ނާސާގެ ޖައްވީ އުޅަނދު ވަނީ އެ ގިނިހިލަ ކައިރީ ދެ އަހަރުން ހޭދަކޮށް، އެއާ ގުޅޭ ގިނަ މައުލޫމާތުތަކެއް އެއްކޮށްފަ އެވެ.
އޮސިރިސް ރެކްސްގައިވާ ރޮބޮޓު އަތެއްގެ އެހީގައި ވަނީ ގިނިހިލައިގެ ފަށަލައިން ސާމްޕަލް ނަގާފަ އެވެ. ސާމްޕަލްގެ ގޮތުގައި ނެގި ހިލަކޮޅުތައް ދުނިޔެ އަށް އަނބުރާ ގެނައުމަށް ރާވާފައި ވަނީ ސެޕްޓެމްބަރު 24، 2023 ގަ އެވެ.
ބެނޫ އަކީ 1999 ވަނަ އަހަރު ފެނުނު ގިނިހިލަ އެކެވެ. އެ ގިނިހިލަ ހިމަނާފައި ވަނީ ނުރައްކަލެއް ކުރިމަތި ކުރުވަފާނެ ކަމަށް ބެލެވޭ ގިނިހިލަތަކުގެ ކެޓެގަރީގަ އެވެ.
އެ ގިނިހިލަ ސެޕްޓެމްބަރު 2135 ގައި ދުނިޔެ ކައިރިން ދަތުރު ކުރާނެ އެވެ.
ސައިންޓިސްޓުން މަސައްކަތް ކުރަމުން ދަނީ ގިނިހިލަ ދަތުރު ކުރާނެ ކަމަށް ބެލޭ ގޮތަށް ދުނިޔޭގެ ގްރެވިޓީ އާއި އެހެނިހެން ގުދުރަތީ ކަންކަމުން ކުރާނެ އަސަރު ހޯދުމަށެވެ.
ކެލިފޯނިއާގައި ހުންނަ ނާސާގެ ޖެޓް ޕްރޮޕަލްޝަން ލެބޯޓަރީގެ ސެންޓާ ފޯ ނިއާ އާތު އޮބްޖެކްޓް ސްޓަޑީޒްގެ ސައިންޓިސްޓު ޑޭވިޑް ފާނޯޗިއާ ވިދާޅުވީ އޮސިރިސް ރެކްސްގެ އެހީގައި ލިބޭ މައުލޫމާތު ވަރަށް މުހިއްމު ކަމަށެވެ.
ނާސާގެ އޮސިރިސް ރެކްސް ޖައްވީ އުޅަނދު.
"މީގެ ކުރިން ދުވަހަކު ވެސް ގިނިހިލަ ދަތުރު ކުރާނެ ކަމަށް ބެލެވޭ ގޮތް މިހާ ޔަގީންކަމާ އެކު ދެނެގަނެވިފައެއް ނުވޭ،" އޭނާ ވިދާޅުވި އެވެ.
އޭނާ ވިދާޅުވީ ބެނޫ ގިނިހިލަ ދުނިޔެއަށް ވެއްޓުމުގެ ކުޑަ ފުރުސަތެއް އެބަ އޮތް ކަމަށެވެ. ނަމަވެސް އެއީ "ވަރަށް ކުޑަ" ފުރުސަތެއްކަން ފާހަގަކޮށް، އެކަމާ ވިސްނަން ނުޖެހޭނެ ކަމަށް ވިދާޅުވި އެވެ.
ސައިންޓިސްޓުންގެ ހޯދުންތަކުން މިހާތަނަށް ބެލެވޭ ގޮތުގައި 2021 ވަނަ އަހަރާއި 2300 ވަނަ އަހަރާ ދެމެދުގެ އަހަރެއްގައި އެ ގިނިހިލަ ދުނިޔެއަށް ވެއްޓުމަށް އޮތް ފުރުސަތަކީ އެންމެ 0.057 ޕަސެންޓުގެ ފުރުސަތެކެވެ.
