ދިވެހިރާއްޖޭގެ އެންމެ މަތީ ކޯޓުގެ ހުރުމަތް ކަނޑައިގެން ދެ މަހަށް ޖަލަށްލުމަށް އިއްޔެ ހުކުމް ކުރި ކުރީގެ ޓުއަރިޒަމް މިނިސްޓަރު އަލީ ވަހީދު ހޯދައި ހައްޔަރަށް ގެންދިއުމަށް ފުލުހުންގެ އެހީތެރިކަމަށް އެދޭނެ ކަމަށް މޯލްޑިވްސް ކަރެކްޝަންސް ސާވިސް އިން މިއަދު ބުނެފި އެވެ.
ޓުއަރިޒަމް މިނިސްޓްރީގެ އަންހެން ގިނަ މުވައްޒަފުންތަކަކަށް ޖިންސީ ގޯނާ ކުރި ކަމުގެ ދައުވާ ލިބޭ އަލީ ވަހީދު ރާއްޖެއިން އިނގިރޭސިވިލާތަށް ފިއްލެވީ ބޭސް ފަރުވާ ކުރުމުގެ ހުއްދަ ކޯޓުން ހޯދައިގެނެވެ. އަލީ ވަހީދު ފުރުމުގެ ހުއްދަ ދިނީ އޭނާގެ ގާތް ރަހުމަތްތެރިވާ އަދި ޔޫތު މިނިސްޓްރީގެ ސްޓޭޓް މިނިސްޓަރު އަސްހަދު އަލީ ޒިންމާވާ ގޮތަށް ހަމަޖެއްސުމަށްފަހު އެވެ.
އެކަމަކު އަލީ ވަހީދު ރާއްޖެ އައުމަށް ކަނޑައަޅާފައި އޮތް މުއްދަތު ހަމަވުމުން ވެސް އޭނާ އަނބުރާ ގައުމަށް ވަޑައެއްނުގަންނަވަ އެވެ. އަދި ބޭނުންވީ އިނގިރޭސިވިލާތުގައި ހުންނަވައިގެން ޝަރީއަތް ކުރިއަށް ގެންދިއުމަށެވެ. އެ ހުއްދަ ކްރިމިނަލް ކޯޓުން އޭނާއަށް ދިނެވެ.
އަލީ ވަހީދު ދެ މަހަށް ޖަލަށްލާން އިއްޔެ ހުކުމްކޮށްފައި މި ވަނީ ކޯޓަށް ހާޒިރުނުވެ ޝަރީއަތް ކުރިއަށްގެންދަން ހުއްދަ ދިން މައްސަލަ ޕްރޮސެކިއުޓާ ޖެނެރަލް ހުސެއިން ޝަމީމް އިސްތިއުނާފް ކުރެއްވުމުން، އެ މައްސަލައިގެ އަޑުއެހުމަށް އޭނާ ސުޕްރީމް ކޯޓަށް ހާޒިރުނުވުމުންނެވެ.
އެކަމާ ގުޅިގެން ކަރެކްޝަންސްގެ މީޑިއާ އޮފިސަރު އައިމިނަތު ޔުސްރީން އަހުމަދު މި ނޫހަށް ވިދާޅުވީ އަލީ ވަހީދާމެދު އަމަލު ކުރަނީ އެހެން މީހުންނާ މެދު ވެސް އަމަލު ކުރާ ގޮތަށް "އާންމު އުސޫލުގެ ތެރެއިން" ކަމަށެވެ.
"އަލީ ވަހީދުގެ ހުކުމް ތަންފީޒު ކުރުމަށް ގެނެސްދިނުމަށް [ފުލުހުންގެ ކައިރި] އެދޭނަން،" އޭނާ ވިދާޅުވި އެވެ.
ކޯޓުގެ ހުރުމަތް ކަނޑައިގެން އަލީ ވަހީދުގެ މައްޗަށް އިއްޔެ ހުކުމް ކުރައްވަމުން ފަނޑިޔާރު ހުސްނުއްސުއޫދު ވިދާޅުވެފައި ވަނީ ގާނޫނާއި ޝަރީއަތުގެ ކުރިމަތީގައި "ވަކި މީހެއް ފަރަގު ނުވެ، އަދި ފަރަގު ކުރުމެއް ނެތި ހަމަހަމަކަމާ އެކު" މަސައްކަތްކުރަންޖެހޭ ކަމަށެވެ.
"އެ އިތުބާރު ގެއްލިއްޖެނަމަ ދައުލަތް ވުޖޫދުވެފައި އޮތުމުގެ މައިގަނޑު އެއް ރުކުން ނެތިގެންދާނެ. ވަކި މީހެއްގެ މައްޗަށް ޝަރީއަތް ނުހިންގޭނެ ކަމަށްވާ ނަމަ ނުވަތަ ވަކި މީހަކަށް ވީމާ ކޯޓުތަކުން ވަކި ގޮތަކަށް ކަންތައްތައް ކުރާ ކަމުގެ އިހުސާސް ރައްޔިތުންނަށް ކުރެވޭ ނަމަ ކޯޓުތައް ހުރުމާމެދު ސުވާލު އުފެދޭނެ،" ފަނޑިޔާރު ސުއޫދު ވިދާޅުވި އެވެ.
