ރައީސް އިބްރާހިމް މުހައްމަދު ސޯލިހަކީ މިހާރު އެމްޑީޕީގެ މެމްބަރެއް ކަމެއް ވެސް ޔަގީން ނުވާކަމަށް ވިލުފުށި ދާއިރާގެ މެމްބަރު ހަސަން އަފީފް ދެއްކެވި ވާހަކައެއް ބަލައި ދިނުމަށް އެމަނިކުފާނު އެދިވަޑައިގަތުމުން އެކަން އެމްޑީޕީގެ ޕާލިމަންޓަރީ ގުރޫޕަށް ހުށަހަޅުއްވާފައިވާ ކަމަށް ޕާޓީގެ ޗެއާޕާސަން ހަސަން ލަތީފް މިއަދު ވިދާޅުވެއްޖެ އެވެ.
ރައީސް ސޯލިހާއި އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ މެދުގައި އުފެދިފައިވާ ކޯޅުމުގެ ސަބަބުން ޕާޓީގެ ތެރޭގައި މިހާރު ވަނީ ދެ ފެކްޝަނެއް އުފެދިފަ އެވެ.
އެގޮތުން، އެމްޑީޕީގެ ފަލްސަފާތައް މުގުރާލައި ރައީސް ސޯލިހު މަސައްކަތް ކުރައްވަނީ ކޯލިޝަނުގައި ހިމެނޭ އެހެން ޕާޓީތައް ބޭނުންވާ ގޮތަށް ކަމުގެ ތުހުމަތުތައް ދަނީ އަމާޒުވަމުންނެވެ.
މިފަހުން އަމިއްލަ ޓީވީ ޗެނަލެއްގެ ޕްރޮގްރާމުގައި ވާހަކަ ދައްކަވަމުން އަފީފް ވެސް ވަނީ އެފަދަ ތުހުމަތުތެއް ރައީސް ސޯލިހަށް ކުރައްވައިފަ އެވެ.
އެގޮތުން، އަފީފް ވިދާޅުވީ ރައީސް ސޯލިހު މަސައްކަތްކުރައްވާ ގޮތުން އެމަނިކުފާނަކީ އަދާލަތު ޕާޓީގެ މެމްބަރެއްތޯ ވެސް ސުވާލު އުފެދޭ ކަމަށެވެ.
އެއާއެކު، އޭނާގެ މައްސަލަ ބަލަން ރައީސް ސޯލިހު އެދިވަޑައިގެންފައިވާކަމަށް އަފީފް ވަނީ ތުހުމަތު ކުރައްވައިފަ އެވެ.
ރައީސް އޮފީހުގައި އިއްޔެ ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން ރައީސް ސޯލިހު ވިދާޅުވީ އަފީފް ފަދަ އެމްޑީޕީގެ ސީނިއާ ބޭފުޅަކު އެފަދަ ވާހަކައެއް ދެއްކެވެމުން އެއީ ކިހިނެއް ހިނގާފައިވާ ކަމެއްތޯ ބަލަން ޕާޓީގެ ޗެއާޕާސަނު އަރިހުގައި ދެންނެވި ކަމަށެވެ.
އެއީ އެމްޑީޕީގެ އިސް ސަފުގައި ތިއްބެވި ބޭފުޅުން އެގޮތަށް އަމަލުކުރުމުން ޕާޓީގެ ތެރޭގައި ބައިބައިވުން އުފެދޭތީ ކަމަށް ވިދާޅުވެ އެކަން ރައީސް ދިފާއުކުރެއްވި އެވެ.
އެކަމާ ގުޅޭ ގޮތުން ހަސަން ލަތީފް މިއަދު "އަދަދު"އަށް ވިދާޅުވީ އަފީފް ދެއްކެވި ވާހަކައާ ގުޅިގެން ރައީސް ސޯލިހު ގުޅުއްވި ކަމަށެވެ. އަދި އެއީ ރަނގަޅުކަމެއް ނޫން ކަމަށާއި ޕާޓީގެ ތެރެއިން އަފީފަށް ފިޔަވަޅެއް ނާޅާނެތޯ ރައީސް އެއްސެވި ކަމަށް ހަސަން ވިދާޅުވި އެވެ.
ހަސަން ވިދާޅުވި ގޮތުގައި ރައީސްގެ ކޯލަށްފަހު އަފީފަށް ގުޅުއްވައި، އެމަނިކުފާނު ފާޅުކުރެއްވި ކަންބޮޑުވުން ހިއްސާކުރެއްވި އެވެ.
އަދި އަފީފްއަކީ ރައްޔިތުންގެ މަޖިލީހުގެ މެމްބަރެއް ކަމުން، މެމްބަރުންގެ މައްސަލަ ބެލުން ހަމަޖެހިފައި އޮންނަނީ ޕީޖީ ގުރޫޕުން ކަމުން އެ ގުރޫޕުގެ ލީޑަރު އަދި މެދު ހެންވޭރު ދާއިރާގެ މެމްބަރު އަލީ އާޒިމަށް ގުޅުއްވައި އެދިވަޑައިގެންނެވިކަމަށް އޭނާ ވިދާޅުވި އެވެ.
"ޗެއާޕާސަންގެ ހައިސިއްޔަތުން އަޅުގަނޑު ގާތު ރައީސް ނަޝީދު ވިޔަސް އަދި ރައީސް ސޯލިހު ވިޔަސް ކަމެއް އެދިވަޑައިގެންފިއްޔާ އިދާރީ ގޮތުން އަޅުގަނޑު ކުރާނަން،" ހަސަން ވިދާޅުވި އެވެ.
ހަސަން ވިދާޅުވި ގޮތަށް އަފީފްގެ މައްސަލަ ޕީޖީ ގުރޫޕުން ބަލާ ކަމެއް އާޒިމް ފޯނަށް ޖަވާބު ނުދެއްވާތީ އަދި ސާފުވާ ގޮތެއް ނުވެ އެވެ.
