ޖަޕާނުގެ ހުޅަނގު ދެކުނުގައި އޮންނަ ނަގަސާކީ ސިޓީ އަށް އެމެރިކާއިން އެޓޮމިކް ބޮން އެޅި ހާދިސާ އަށް 76 އަހަރު ފުރުން ފާހަގަކުރަން ބޭއްވި ހަފްލާއަށް އެއް މިނެޓު ގަޑި ޖެހިގެން ވަޑައިގެންނެވުމުން ބޮޑު ވަޒީރު ޔޮޝިހިޑޭ ސޫގާ މައާފަށް އެދިވަޑައިގެންފި އެވެ.
"އަޅުގަނޑު ގަޑި ޖެހުނީ ވަގުތު މެނޭޖު ކުރުމުގައި ދިމާވި މައްސަލައަކާ ހެދި. އެކަމަށް އަޅުގަނޑުގެ ހިތުގެ އެންމެ ފުން މިނުން މައާފަށް އެދެން ބޭނުން،" ޓޯކިޔޯގައި ބޮޑު ވަޒީރުގެ އޮފީހުގައި ހުންނަވައި ސޫގާ ނޫސްވެރިންނަށް ވިދާޅުވި އެވެ.
ސަރުކާރުން ބުނީ ހޯމަ ދުވަހު އޮތް ރަސްމިއްޔާތަށް ބޮޑު ވަޒީރު ލަހުން ވަޑައިގެންނެވީ މުވައްޒަފަކަށް ހެދުނު ކުށެއްގެ ސަބަބުން ކަމަށެވެ.
އެ ރަސްމިއްޔާތު ފެށީ ޖަޕާނު ގަޑިން ހޯމަ ދުވަހު ހެނދުނު 10:45 ގަ އެވެ. ސޫގާ އެ ތަނަށް ވަޑައިގެން، އެމަނިކުފާނަށް ހާއްސަ ގޮނޑީގައި އިށީންނެވީ 10:46 ގަ އެވެ.
ޗީފް ކެބިނެޓް ސެކެޓްރީ ކަޓްސުނޯބޫ ކާތޯ ވިދާޅުވީ ވަގުތު މެނޭޖު ކުރުމުގައި މައްސަލަ ޖެހުނު މުވައްޒަފަށް އިންޒާރު ދީފައިވާ ކަމަށެވެ.
"އެ ރަސްމިއްޔާތުގެ މުހިއްމުކަން އަޅުގަނޑުމެންނަށް ވިސްނޭ. ގަޑިޖެހުނު މައްސަލަ ސީރިއަސްކޮށް ނަގައި، އެފަދަ ކަމެއް ކުރިމަގުގައި ނުވާނެކަން ޔަގީން ކުރުމަށް އެކަށޭނަ ފިޔަވަޅު އަޅާނަން،" އޭނާ ވިދާޅުވި އެވެ.
