ނިއު ޔޯކް، އެމެރިކާ (އޯގަސްޓު 11) - ޖިންސީ ފުރައްސާރައިގެ ގިނަ ތުހުމަތުތަކެއް ކުރެވިފައިވާ ނިއު ޔޯކްގެ ގަވަރުނަރު އެންޑްރޫ ކޫމޯ އަށް ޑިމޮކްރެޓިކް ޕާޓީން ޕްރެޝަރު ކުރިމަތިވެ، އިސްތިއުފާ ދެއްވައިފި އެވެ.
ކޫމޯއާ ދެކޮޅަށް ޖިންސީ ފުރައްސާރައިގެ ތުހުމަތުކޮށްފައި ވަނީ 11 އަންހެނުންނެވެ. އެ މައްސަލާގައި އުމުރުން 63 އަހަރުގެ ކޫމޯ މަގާމުން ދުރުކުރާނެ ކަމަށް ކުރިން އޮތީ ބެލެވިފަ އެވެ.
ޖިންސީ ފުރައްސާރައިގެ ތުހުމަތުގެ އިތުރުން ނިއު ޔޯކްގެ އުމުރުން ދުވަސްވީ މީހުން ތިބޭ ފެސިލިޓީތަކުގައި ކޮވިޑް ޖެހިގެން މަރުވި މީހުންގެ އަދަދުތައް އޮޅުވާލި ކަމަށް ވެސް އޭނާގެ މައްޗަށް ތުހުމަތު ކުރެވެ އެވެ.
ނަމަވެސް މީގެ އަހަރެއްހާ ކުރިން ނިއު ޔޯކްގެ ރައްޔިތުން ކޫމޯ އަށް ތައުރީފުކޮށްފައި ވަނީ ކޮވިޑް ބަލިމަޑުކަން ކޮންޓްރޯލް ކުރަން އެޅި ފިޔަވަޅުތަކުގެ ސަބަބުންނެވެ.
ކޫމޯ އަކީ ނިއު ޔޯކްގެ ބޮޑު ސިޔާސީ "ޝާހީ އާއިލާއަކަށް" ނިސްބަތްވާ ބޭފުޅެކެވެ. އޭނާގެ ބައްޕަ މާރިއޯ ވަނީ ތިން ފަހަރެއްގެ މަތިން އެ ސްޓޭޓުގެ ގަވަރުނަރުކަން ކުރައްވާފަ އެވެ. އޭގެ އިތުރުން އޭނާގެ ބޭބެ ކްރިސް އަކީ ސީއެންއެންގެ މަޝްހޫރު ޕްރެޒެންޓަރެކެވެ.
އެކަމަކު ޖިންސީ ފުރައްސާރައިގެ ތުހުމަތުތަކާއެކު ކޫމޯ ނިންމަވާފައި ވަނީ އިސްތިއުފާ ދެއްވުމަށެވެ.
"މިހާރު ކަންކަން ގޮސްފައި އޮތް ހިސާބަށް ބަލާއިރު ފެންނަ އެންމެ ރަނގަޅު ގޮތަކީ އަޅުގަނޑު އެއްފަރާތަކަށް ޖެހިފައި ސަރުކާރުގެ މަސައްކަތަށް ފުރުސަތު ދިނުން،" ޓީވީން ވަގުތުން ދެއްކި ބަޔާނެއްގައި އޭނާ ވިދާޅުވި އެވެ.
"އަޅުގަނޑުގެ އިސްތިއުފާ އަށް އަމަލު ކުރަން ފަށާނީ ކުރިއަށް އޮތް 14 ދުވަސް ފަހުން،"
ކޫމޯގެ ބަދަލުގައި ދެން ގަވަރުނަރުގެ މަގާމަށް ވަޑައިގަންނަވާނީ ލެފްޓިނެންޓް ގަވަރުނަރު ކެތީ ހޮޗުލް އެވެ. އޭނާ ވެގެން ދާނީ އެމެރިކާގެ ހަތަރު ވަނަ އަށް އެންމެ އާބާދީ ބޮޑު ސްޓޭޓުގެ އެންމެ ފުރަތަމަ އަންހެން ގަވަރުނަރަށެވެ.
ކޫމޯއާ ދެކޮޅަށް ކުރާ ޖިންސީ ފުރައްސާރައިގެ ތުހުމަތުތައް އާއްމުވީ ނިއު ޔޯކް ސްޓޭޓުގެ އެޓާނީ ޖެނެރަލް އޮފީހުން ނެރުނު ރިޕޯޓެއްގަ އެވެ. ކޫމޯ ވަނީ ތުހުމަތުތައް ދޮގުކުރައްވާފަ އެވެ.
ނަމަވެސް އޭނާގެ އަމަލުތަކުގެ ސަބަބުން އަސަރުކޮށްފައިވާ އަންހެނުންގެ ކިބައިން ވަރަށް ބޮޑަށް ކޫމޯ މައާފަށް އެދިވަޑައިގެންނެވި އެވެ.
އެމެރިކާގެ ރައީސް ޖޯ ބައިޑެން ވެސް މިދިޔަ ހަފްތާގައި ވަނީ ކޫމޯގެ އިސްތިއުފާ އަށް ގޮވާލައްވާފަ އެވެ.
ނިއު ޔޯކްގެ ގަވަރުނަރުގެ މަގާމަށް ކޫމޯ އިންތިހާބުވެވަޑައިގެންނެވީ 2010 ވަނަ އަހަރު އެވެ. އޭގެ ފަހުން 2014 އަދި 2018 ގައި ވެސް އަލުން އިންތިހާބުވެވަޑައިގެންނެވި އެވެ.
އޭގެ ކުރިން އޭނާ ވަނީ ނިއު ޔޯކްގެ އެޓާނީ ޖެނެރަލް ކަމާއި ރައީސް ބިލް ކްލިންޓަންގެ ސަރުކާރުގެ ސެކެޓްރީ އޮފް ހައުސިން އެންޑް އާބަން ޑެވެލޮޕްމަންޓްކަން ވެސް ކުރައްވާފަ އެވެ.
