ސީލައިފް ފްލެޓްތަކުގެ މައްސަލާގައި ހިޔާނާތްތެރިވިކަމުގެ ދައުވާ އުފުލާފައިވާ އެ ކުންފުނީގެ މެނޭޖިން ޑިރެކްޓަރު އަހުމަދު މޫސާ މުހައްމަދު (އަންމަޓީ)ގެ މައްޗަށް އެހެން މީހަކު ޖާމިނުކޮށްފައި ނަމަވެސް ބަންދުން ދޫކޮށްލުމަށް ކުރިމިނަލް ކޯޓުގައި އެދިއްޖެ އެވެ.
އަންމަޓީ ބަންދުގައި ހުރީ އޭނާއަކީ ބަންދުގައި ހުންނަން ޖެހޭ މީހެއް ކަމަށް ކަނޑައަޅައި، ހައިކޯޓުން ހުކުމްކުރުމާ ގުޅިގެންނެވެ.
ތަހުގީގަށް އަންމަޓީ ރާއްޖެ ގެނައީ ލަންކާގައި އުޅެނިކޮށެވެ. އޭގެ ފަހުން އޭނާ ބަންދުގައި ހުރިއިރު ދައުވާ އުފުލުމަށް ފަހު ވެސް އޭނާގެ ބަންދަށް މުއްދަތު ޖަހަމުން ދިޔަ އެވެ. އަދި ފަހުން ޝަރީއަތް ނިމެންދެން އަންމަޓީ ބަންދުކުރި އެވެ. އެ އަމުރު އެހެން އޮއްވައި، އޭނާ ދޫކޮށްލުމަށް ކުރިމިނަލް ކޯޓުގައި މައްސަލަ ބައްލަވާ ގާޒީ ހަސަން ސައީދު އަމުރު ކުރެއްވި އެވެ.
އެ އަމުރު ހައިކޯޓުގައި ދައުލަތުން އިސްތިއުނާފުކުރުމުން އެ ކޯޓުން ނިންމީ އަންމަޓީގައި ބަންދުކޮށްފައި ބަހައްޓަން ޖެހޭ މީހެއް ކަމަށެވެ. އެހެންވެ، އޭނާ ހައްޔަރުކުރުމަށް ދައުލަތުގެ މައްޗަށް ހައިކޯޓުން އަމުރު ނެރުނެވެ.
އެ އަމުރުގެ ދަށުން ބަންދުގައި ހުރި އަންމަޓީގެ ބަންދު ރިވިއު ކުރުމަށް ޖިނާއީ އިޖުރާއަތުގެ ގާނޫނުގެ ދަށުން ލާޒިމްކުރާތީ، ދައުލަތުން މިއަދު ވަނީ އެކަމަށް ކުރިމިނަލް ކޯޓަށް ހުށަހަޅާފަ އެވެ.
ޕްރޮސިކިއުޓާ ޖެނަރަލްގެ އޮފީހުން އެދިފައިވަނީ އަންމަޓީ ބަންދުކުރުމަށް ނެރެފައިވާ އަމުރު ދެމެހެއްޓުމަށެވެ. އޭނާ ބަންދުގައި ބަހައްޓަން ޖެހޭ ސަބަބުތައް ދެމިއެބައޮތް ކަމަށް ޕްރޮސިކިއުޓާ ޖެނަރަލްގެ އޮފީހުގެ ވަކީލް ވިދާޅުވި އެވެ.
އޭގެ ސަބަބެއް ކަމަށް ވިދާޅުވީ، އަންމަޓީގެ މައްޗަށް ހެކި އެބަހުރި ކަމާއި އަދި އޭނާއަކީ ޝަރީއަތަށް ފިލައިގެން ގޮސްދާނެ މީހެއް ކަމަށެވެ. ވަކީލް ވިދާޅުވި ގޮތުގައި އަންމަޓީގެ ޕާސްޕޯޓް ހިފަހައްޓާފައި އޮތް ނަމަވެސް، އޭނާއަކީ ވަލުދޮރާށިން ވެސް ފިލައިގެން ގޮސްދާނެ މީހެއް ކަމަށެވެ. އެކަން އޭނާ ކުރިން އަމަލުކޮށްފައިވާ ގޮތުން އެނގޭ ކަމަށެވެ.
އަންމަޓީގެ ވަކީލް މުހުތާޒު މުހުސިން އެދިވަޑައިގެންފައިވަނީ އިތުރު ޝަރުތަކެއް މަތިކޮށްފައި ނަމަވެސް އަންމަޓީ ދޫކޮށްލުމަށެވެ. ޝަރުތުތައް ގިނަ ކުރުމަށްފަހު އަންމަޓީ ދޫކޮށްލެވިދާނެ ކަމަށް ހައިކޯޓުގެ ފަނޑިޔާރުން ވެސް ފާހަގަކުރައްވާފައިވާކަން އޭނާ ވިދާޅުވި އެވެ. އެގޮތުން ކޯޓަށް ނުވަތަ ދައުލަތުގެ އިދާރާއަކަށް ކޮންމެ ދުވަހަކު ހާޒިރުވާން ޖެހޭ ގޮތަށް ޝަރުތުކޮށް ނޫނީ ކަފާލާތުގެ ދަށުން މީހަކު ޖާމިނުވެގެން ދޫކޮށްދިނުމަށް ވެސް ވަކީލް އެދިވަޑައިގެންނެވި އެވެ.
ނަމަވެސް، އެކަމަށް ޕްރޮސިކިއުޓާ ޖެނަރަލްގެ ވަކީލް އިއުތިރާޒު ކުރެއްވި އެވެ.
އޭނާ ވިދާޅުވި ގޮތުގައި ޝަރުތުތަކެއްކޮށް އަންމަޓީ ދޫކޮށްލުމަށް ވެސް ދައުލަތުން އިއުތިރާޒު ކުރަނީ އޭނާ ފިލައިދާނެ ކަމުގެ އިހުތިމާލު ވަރަށް ބޮޑަށް އޮތުމުންނެވެ. އޭރަށް ގެއްލުން ލިބުނު މީހުންނަށް އިންސާފު ހޯދައިދިނުމަށް ދައުލަތުން ކުރަމުންދާ މަސައްކަތަށް ހުރަސްއެޅިގެން ދާނެ ކަމަށް ވިދާޅުވި އެވެ.
މައްސަލަ ބައްލަވާ ގާޒީ ހަސަން ސައީދު ވަނީ އަންމަޓީ ފިލައިގެން ގޮސްދާނެ ކަމުގެ އިހުތިމާލު އެހާ ބޮޑަށް އޮތީ ކީއްވެގެންތޯ އާއި ވަލުދޮރާށިން ފިލައިގެން ދެވިދާނެ ކަމުގެ ކިހާ ފުރުސަތުތަކެއް އެބައޮތްތޯ ވެސް ސުވާލު ކުރައްވައިފަ އެވެ. އެ ސުވާލަށް ޖަވާބު ދެއްވަމުން ދައުލަތުގެ ވަކީލް ވިދާޅުވީ އަންމަޓީއަކީ މީގެކުރިން ތަހުގީގަށް ފިލައިގެން އުޅުނު މީހެއް ކަމަށާއި އޭނާ ރާއްޖެ ގެނެވުނީ ވެސް ލަންކާއިން ޑީޕޯޓްކޮށްލުމުން އެ ނޫން ގޮތެއް އޭނާއަށް ނެތުމުން ކަމަށެވެ.
އެހެންކަމުން އަންމަޓީގެ ގަވައިދުތަކާއި އުސޫލުތަކުގެ ތެރެއިން އަމަލުތައް ބަހައްޓާ މީހެއް ނޫންކަން އޭނާގެ ކުރީގެ އަމަލުތަކުން އެނގޭ ކަމަށާއި އެކަމަށް ރިއާޔަތްކޮށް ވެސް އަންމަޓީ ދޫކޮށްލައިގެން ނުވާނެ ކަމަށް ވަކީލް ވިދާޅުވި އެވެ.
ގާޒީ ހަސަން ސައީދު ވިދާޅުވީ ދެ ފަރާތުން ދެއްކި ވާހަކަތަކުގެ މައްޗަށް ރިއާޔަތްކޮށް އަންމަޓީގެ ބަންދާމެދު މާދަމާ ގޮތެއް ނިންމަވައި، އިއުލާން ކުރައްވާނެ ކަމަށެވެ.
ސީލައިފް ހިޔާނާތުގެ މައްސަލާގެ ޝަރީއަތުގެ މިއަދުގެ އަޑުއެހުމުގައި އަންމަޓީގެ މައްޗަށް އުފުލާފައިވާ ހިޔާނާތުގެ 42 ދައުވާގެ ތެރެއިން ހަތަރު ދައުވާއެއް ދައުލަތުން ވަނީ އިއްވައިފަ އެވެ. އެ ހަތަރު ދައުވާއަށް ވެސް އަންމަޓީ އިންކާރު ކުރުމުން ދައުލަތުން ވަނީ ދައުވާތައް ސާބިތުކުރުމަށް ހެކި ހުށަހަޅާފަ އެވެ.
މި މައްސަލާގެ ޝަރީއަތް ކުރިއަށް ދަނީ 42 ދައުވާ ވަކިވަކިންނެވެ. އެއީ، އޭނާ ހިޔާނާތްތެރިވި ކޮންމެ މީހެއްގެ މައްސަލަ ވަކިންނެވެ.
އެޗްޑީސީ އާއި ސީލައިފް ގްލޯބަލް އިންކް ޕްރައިވެޓް ލިމިޓެޑާ ދެމެދު 2015ގައި ވެފައިވާ އެއްބަސްވުމެއްގެ ދަށުން ހުޅުމާލޭގައި 3000 ހައުސިން ޔުނިޓް އެޅުމަށް، ހަވާލުކުރި އެވެ. ނަމަވެސް، އެއްބަސްވުމުގައިވާ މުއްދަތުގައި ހައުސިން ޔުނިޓްތައް އެޅުމުގެ އަމަލީ މަސައްކަތް ފުރިހަމަނުކޮށް، އެކި މީހުން އަތުން ބޮޑެތި އަދަދުތަކުން ފައިސާ ނެގި އެވެ.
