ގުދުސް (އޯގަސްޓު 10) - އިރާނާއި ހުޅަނގުގެ ގައުމުތަކާ ދެމެދު ނުތަނަވަސްކަން އިތުރުވެފައި ވާތީ ނިއުކްލިއާ އެއްބަސްވުން އަލުން އިއާދަކުރެވޭނެ ކަމުގެ އުއްމީދު ކުޑަވެފައި ވަނިކޮށް އެމެރިކާގެ ސެންޓްރަލް އިންޓެލިޖެންސް އޭޖެންސީ (ސީއައިއޭ) ގެ ވެރިޔާ ވިލިއަމް ބާންސް އިޒްރޭލަށް ވަޑައިގެންފި އެވެ.
ބޮޑު ވަޒީރު ނަފްތާލީ ބެނެޓްގެ ތަރުޖަމާނަކު ވަނީ ސީއައިއޭގެ ވެރިޔާ އާއި އިޒްރޭލާ ދެމެދު ކުރާ މަޝްވަރާތަކުގެ ތަފްސީލް ދޭން ދެކޮޅު ހައްދަވާފަ އެވެ.
ނަމަވެސް ވައްލާ ނިއުސް ވެބްސައިޓުން ބުނީ މަޝްވަރާތަކުގެ ތެރޭގައި ހިމެނެނީ އިރާނުގެ ނިއުކްލިއާ ޕްރޮގްރާމާއި، އެ ސަރަހައްދުގެ އިރާނުން ހިންގާ ހަރަކާތްތައް ކަމަށެވެ. ބެނެޓް އާއި އިޒްރޭލުގެ ޖާސޫސީ ވެރިޔާ ޑޭވިޑް ބާނިއާ އާއެކު މަޝްވަރާ ކުރައްވާނެ އެވެ.
އޭގެ އިތުރުން އިޒްރޭލުން ވެރިވެގަނެފައިވާ ހުޅަނގު އައްސޭރިއަށް ބާންސް ވަޑައިގެން ފަލަސްތީނުގެ ރައީސް މަހްމޫދް އައްބާސް އާއި ފަލަސްތީނުގެ ޖާސޫސީ ވެރިޔާ މާޖިދް ފަރަޖް އާއެކު ވެސް މަޝްވަރާ ކުރައްވާނެ ކަމަށް އެ ނޫހުން ބުނެ އެވެ.
ބާންސްގެ މިފަދަ ދަތުރެއް ކުރައްވަމުން ދާއިރު ތަޖުރިބާކާރުން ބުނަނީ އިރާނާއި އިޒްރޭލާ ދެމެދު "ހިޔަނި ހަނގުރާމައެއް" ފަށާފައިވާ ކަމަށެވެ. އެގޮތުން އެއް ގައުމުން އަނެއް ގައުމުގެ ބޯޓު ފަހަރަށް ސިއްރުގައި ހަމަލާދެމުންދާ ކަމަށް ބެލެވިފައި ވެ އެވެ.
މިދިޔަ މަހު އޮމާންގެ އައްސޭރިފަށާ ކައިރީގައި އޮތް އިޒްރޭލް ބިލިއަނަރެއްގެ ބޯޓު އެމްޓީ މާސާ ސްޓްރީޓަށް ޑްރޯން ހަމަލާއެއް ދިނުމުގެ ސަބަބުން ދެ ކްރޫ މެމްބަރުން މަރުވި އެވެ.
މިދިޔަ ހުކުރު ދުވަހު ޖީ7 ގައުމުތަކުގެ ފޮރިން މިނިސްޓަރުން ތުހުމަތު ކުރެއްވި ގޮތުގައި ހަމަލާގެ ފަހަތުގައި ވަނީ އިޒްރޭލް އެވެ. އެމެރިކާ ސިފައިން ވަނީ އެ ހަމަލާގައި ބޭނުން ކުރި ޑްރޯންތައް އުފެއްދީ އިރާނުގައި ކަން ހާމަވާ ލިޔުންތަކެއް އާއްމުކޮށްފަ އެވެ. ނަމަވެސް އިރާނުން އެ ތުހުމަތު ދޮގުކުރެ އެވެ.
