ޕެރިސް (އޮގަސްޓް 10) - ދުނިޔޭގެ މޮޅު ކުޅުންތެރިޔާގެ މަގާމު ހަ ފަހަރެއްގެ މަތިން ހޯދާފައިވާ ލިއޮނަލް މެސީގެ ސޮއި ހޯދިކަން ޕީއެސްޖީން ރަސްމީކޮށް އިއުލާނު ކުރުމުގެ ކުރިން ޕީއެސްޖީ ބްރެޒިލްގެ ތަރި ނޭމާ އޭނާ އެކުވެރިޔާ މެސީ އަށް މަރުހަބާ ކިޔައިފި އެވެ.
އުމުރުން 34 އަހަރުގެ މެސީ ޕީއެސްޖީ އަށް ބަދަލުވިކަން ރަސްމީކޮށް އެ ޓީމުން ވަނީ މިރޭ މީޑިއާ އަށް އާންމުކޮށްފަ އެވެ. އެކާވީސް އަހަރަށް ފަހު ބާސެލޯނާ ދޫކޮށް މެސީ ޕީއެސްޖީ އަށް ބަދަލުވިއިރު، ބޯނަހެއްގެ ގޮތުގައި އޭނާ އަށް 25 މިލިއަން ޕައުންޑް (34 މިލިއަން ޑޮލަރު) ލިބޭނެ އެވެ.
ކުރިއަށް އޮތް ވަގުތުތަކުގެ ތެރޭގައި މެސީ ޕީއެސްޖީއާ އެކު ދެ އަހަރުގެ ކޮންޓްރެކްޓެއްގައި ސޮއިކުރާއިރު، އެ ޓީމަށް ކުޅޭ ކޮންމެ އަހަރަކަށް ވެސް 25 މިލިއަން ޕައުންޑް (34 މިިލިއަން ޑޮލަރު) ދޭނެ އެވެ. މިއީ ޓެކްސްގެ ބައި ފުރިހަަމަ ކުރުމަށް ފަހު މެސީ އަށް ލިބޭނެ މުސާރަ އެވެ.
މިދިޔަ ހަފްތާ އިން ފެށިގެން ނޭމާ އަންނަނީ ޕީއެސްޖީގެ ކުޅުންތެރިންނާއި ބްރެޒިލްގައި ދިރިއުޅޭ އޭނާގެ ގާތް މީހުންގެ ގާތުގައި މެސީ ޕީއެސްޖީ އަށް ސޮއިކުރާނެ ކަމަށް ބުނަމުންނެވެ. ލަލީގާ ގަވާއިދުތަކުގެ ސަބަބުން ބާސެލޯނާއާ އެކު މެސީ އަށް އާ ކޮންޓްރެކްޓެއްގައި ސޮއި ނުކުރެވޭނެކަން ޔަގީންވި ހިސާބުން ނޭމާ ވަނީ މެސީ އަށް މެސެޖްކޮށް ޕީއެސްޖީ އަށް އަންނަން ދައުވަތު ދީފަ އެވެ. މެސީ މިހާރު ޕީއެސްޖީ އަށް ބަދަލުވެފައިވާއިރު، ނޭމާ ވަނީ މެސީއާ އެއް ޓީމަކަށް އަލުން ކުޅެލަން ލިބުމުން އެކަމާ ވަރަށް ބޮޑަށް އުފާފާޅުކޮށްފަ އެވެ. އެހެންވެ، އެ އުފަލުގައި ޕީއެސްޖީ އަށް ވުރެ ކުރިން ނޭމާ ވަނީ އެ ޑީލް ނިމިފައިވާކަން ކަށަވަރުކޮށްދީފަ އެވެ.
ބާސެލޯނާގެ މެޗެއްގެ ތެރެއިން ނޭމާ (ކ) އާއި މެސީ.-- ފޮޓޯ: އޭއެފްޕީ
މެސީ އާއި ނޭމާ ވަނީ މީގެ ކުރިން ބާސެލޯނާ އަށް އެއްކޮށް ކުޅުނުއިރު، ގިނަ ކާމިޔާބީތަކެއް ހޯދައިފަ އެވެ. އެ ގޮތުން މި ދެ ކުޅުންތެރިން އެންމެ ފަހުން ޗެމްޕިއަންސް ލީގުގެ ތަށްޓެއް އުފުލާލީ ވެސް އެކުގައި ބާސެލޯނާ އަށް ކުޅުނުއިރު އެވެ. އެއީ 2015 ވަނަ އަހަރު އެވެ.
ނޭމާ ވަނީ 2017 ވަނަ އަހަރު ދުނިޔޭގެ އެންމެ އަގުބޮޑު ކުޅުންތެރިޔާގެ ގޮތުގައި ޕީއެސްޖީ އަށް ބަދަލުވެފަ އެވެ. އޭގެ ފަހުން މެސީއާ އެއް ޓީމަށް އަލުން ކުޅެން ބޭނުންވާތީ އަލުން ބާސެލޯނާ އަށް ދާން ވެސް ނޭމާ މަސައްކަތްކުރި އެވެ. އަލުން ބާސެލޯނާ އަށް ނޭމާ ވިއްކާލަން ޕީއެސްޖީން ކިޔާ ފީ އަގުބޮޑުވުމުން އެ ޓްރާންސްފާ ކުރިއަށް ނުދިޔަ އެވެ. އެންމެ ފަހުން މެސީއާ އެއް ޓީމަށް ކުޅެން ނޭމާ ކުރަމުންދިޔަ އުއްމީދުތައް ހާސިލްމިވީ ޕީއެސްޖީގަ އެވެ.
ހިލޭ ޓްރާންސްފާއެއްގެ ދަށުން މެސީ ޕީއެސްޖީ އަށް ބަދަލުވިއިރު، އެ ޓީމުގައި މެސީ ބޭނުންކުރާނީ ބާސެލޯނާ އާއި އާޖެންޓީނާގައި އޭނާ ކުރިން ބޭނުންކުރި 19 ނަމްބަރު ޖޯޒީ އެވެ. މީގެ ކުރިން ބްރެޒިލްގެ މީޑިއާގައި ރިޕޯޓްކުރި ގޮތުގައި ނޭމާ ވަނީ މެސީ ބޭނުންނަމަ ޕީއެސްޖީގެ 10 ނަމްބަރު ޖޯޒީ ދޭން ހުށަހަޅައިފަ އެވެ. އެކަމަކު، މެސީ އެ ގޮތް ބޭނުމެއްނުވި އެވެ.
މެސީ ޕެރިހުގެ އެއާޕޯޓްގައި: އޭނާ ޕީއެސްޖީއާ ގުޅޭނެކަން ވަނީ ކަށަވަރުވެފައި.-- ފޮޓޯ: އޭއެފްޕީ
ޕެރިސް އެއާޕޯޓަށް މެސީގެ ޖެޓް ޖެއްސި ހިސާބުން ދުނިޔޭގެ ހުރިހާ ބޮޑެތި މީޑިއާތަކުގައި މެސީގެ ފޮޓޯތައް ދައުރުވާން ފެށި އެވެ. އޭރު، ޕެރިހުގެ އެއާޕޯޓްގައި ތިބި ޕީއެސްޖީ ސަޕޯޓަރުންނާއި ޕީއެސްޖީގެ ސްޓޭޑިއަމް ބޭރުގައި ތިބި ސަޕޯޓަރުން ވަރަށް ބޮޑަށް އުފާފާޅުކުރަމުން ދިޔަ އެވެ. އިއްޔެ އިން ފެށިގެން އެކި ވަގުތުތަކުގައި ޕީއެސްޖީ ސަޕޯޓަރުން ތިބީ މެސީގެ އިންތިޒާރުގައި އެއާޕޯޓާއި ސްޓޭޑިއަމް ބޭރަށް ގޮސް ގޮހެވެ.
ޕެރިހުގެ އެއާޕޯޓްގައި ހުރެ ފްރާންސްގެ ނޫސްތަކަށް މެސީގެ އޭޖެންޓް އަދި ބައްޕަ ޖޯޖް މެސީ ދިން އިންޓަވިއުއެއްގައި ބުނީ މެސީ ޕީއެސްޖީ އަށް ސޮއިކުރުމުގެ ހުރިހާ ކަމެއް ނިމިފައިވާ ކަމަށެވެ.
މެސީ ޕީއެސްޖީގެ ކުޅުންތެރިއެއްގެ ގޮތުގައި މީޑިއާ އަށް ތައާރަފްކުރުން ޝެޑިއުލްކޮށްފައިވަނީ މާދަމާ އެވެ. މެސީގެ ޓްރާންސްފާ އިއުލާނުކުރަން އެއިފިލް ޓަވަރު ދިއްލާލުމުގެ އިންތިޒާމް ވެސް ޕީއެސްޖީން ވަނީ ހަަމަޖައްސައިފަ އެވެ.
ފްރާންސާއި އަރަބި ގައުމުތަކުގެ މީޑިއާ ރިޕޯޓްތައް ބުނާގޮތުން މެސީ ޕީއެސްޖީ އަށް ބަދަލުވާނެކަން ރަސްމީވުމާ އެކު ކުރިއަށް އޮތް ސީޒަނުގެ ޕީއެސްޖީގެ ޖޯޒީގެ ޑިމާންޑް ވަނީ ވަރަށް ބޮޑަށް އުފުލިފަ އެެވެ.
