އަންނަ އަހަރުގެ ބަޖެޓުގައި ހިމަނައިގެން ޓީޗަރުންގެ މުސާރަ އާއި އިނާޔަތްތައް ބޮޑުކޮށްދެއްވަން މަސައްކަތް ކުރައްވަމުން އަންނަ ކަމަށް ރައީސް އިބްރާހިމް މުހައްމަދު ސޯލިހް މިއަދު ވިދާޅުވެއްޖެ އެވެ.
ދިރާސީ އާ އަހަރު ފެށުމުގެ ތަހުނިޔާ ދަރިވަރުންނާއި ޓީޗަރުން އަދި މުޅި ތައުލީމީ ދާއިރާ އަށް ފޮނުއްވައި ދެއްކެވި ވާހަކަފުޅުގައި, ކޮވިޑުގެ ދަތި ދޮޅު އަހަރުގެ ތެރޭގައި ދަރިވަރުންގެ ކިޔެވުމަށް ތައުލީމީ ދާއިރާ އިން ކޮށްދިން މަސައްކަތްތައް ފާހަގަކުރެއްވި އެވެ.
އެމަނިކުފާނު ވިދާޅުވީ ތައުލީމީ ނިޒާމަށް ކުރިމަތިވި ގޮންޖެހުންތަކާ އެކު ދަރިވަރުންގެ ކިޔެވުން މެދުނުކެނޑި ކުރިއަށް ގެންދެވުނީ ތައުލީމީ ދާއިރާގެ ބުރަ މަސައްކަތްތަކުން ކަމަށެވެ. އޭގެ ތެރޭގައި ޓީޗަރުން ކޮށްދެއްވި އަގު ނުކުރެވޭ މަސައްކަތާއި ދަރިވަރުންނަށްޓަކައި ހޭދަކުރައްވި ވަގުތު ރައީސް ފާހަގަކުރެއްވި އެވެ.
މި ވަގުތާއި މަސައްކަތްތަކާއި އެކަށީގެންވާ މުސާރަ އާއި އިނާޔަތްތަކެއް ހަމަޖައްސަން އަންނަ އަހަރުގެ ބަޖެޓުގައި ހިމަނުއްވާނެ ކަމަށް ވިދާޅުވި އެވެ.
ރަށްރަށުގައި ބައެއް މާއްދާތައް ކިޔަވައިދޭން ދިވެހި ޓީޗަރުން ނުލިބޭ މައްސަލަ ހައްލުކުރަން, ރައީސް ވިދާޅުވި ގޮތުގައި, އެލަވަންސެއް ހަމަޖައްސައިގެން ވެސް ފުރުސަތު ތަނަވަސްކޮށްދެއްވަން މަސައްކަތްތަކެއް އަންނަނީ ކުރަމުންނެވެ.
ރައީސް ވިދާޅުވި ގޮތުގައި ޓީޗަރުން ގެންދަވަނީ ސަރުކާރުގެ މުހިއްމު އަމާޒެއް ކަމަށްވާ މީހުން ބިނާކޮށްދިނުމުގެ އަމަލީ މަސައްކަތުގައި އިސް ދައުރެއް އަދާކުރައްވަމުންނެވެ. ރާއްޖެއަށް ދިމާވެފައިވާ އިޖުތިމާއީ މައްސަލަތައް ހައްލުކުރުމުގައި ވެސް މުހިއްމު ދައުރެއް އަދާކުރެވޭނެތީވެ ރަނގަޅު ގޮތްތަކެއް ހޯދައި ދިނުމަކީ ބޭނުންތެރި ކަމެއް ކަަމަށް ވިދާޅުވި އެވެ.
މިވަގުތު ދިމާވެފައިވާ ބޮޑު ދެ މައްސަލައިގެ ގޮތުގައި އޮތް ހަރުކަށި ފިކުރު ފެތުރުމާއި މަސްތުވާތަކެތީގެ މައްސަލަތައް ހައްލުކުރުމުގައި މުހިއްމު ދައުރެއް އަދާކުރެވޭނީ ތައުލީމީ ނިޒާމްގެ ތެރެއިން ކަން ފާހަގަކުރެއްވި އެވެ.
އެމަނިކުފާނު ވިދާޅުވި ގޮތުގައި ކޮވިޑުގެ ހާލަތު ރަނގަޅުވުމުން ދަރިވަރުން ސްކޫލަށް ގެންދިޔައަސް ކޮވިޑުން މުޅިން ފިލައިގެން ދިޔައީ ކަމަށް ނިންމައިގެން ނުވާނެ އެވެ. ދަރިވަރުންގެ ރައްކާތެރި ކަމަށް އިސްކަން ދެއްވަން އިލްތިމާސްކުރެއްވި އެވެ.
އެއާއެކު އާއްމު ހާލަތަށް ރުޖޫއަވެވޭނީ ކޮވިޑް ވެކްސިން ޖަހައިގެން ކަމަށްވާތީ އެއްބާރުލުންދީ އެންމެން ވެސް ވެކްސިންގެ ދެ ޑޯޒު ފުރިހަމަކުރަން އެދިވަޑައިގަތެވެ.
