ނިއު ޔޯކް، އެމެރިކާ (އޯގަސްޓު 10) - މޫސުމީ ބަދަލުގެ ސަބަބުން ކުރާ އަސަރުގެ ނުރައްކާ އެންމެ ބޮޑު ކުދި ޖަޒީރާ ގައުމުތަކުން އދ. އިން ހޯމަ ދުވަހު އާއްމު ކުރި ރިޕޯޓުގެ ހޯދުންތަކާ މެދު ކަންބޮޑުވުން ފާޅުކޮށް، އެ ގައުމުތަކުގެ "މުސްތަގްބަލް ސަލާމަތް ކުރުމަށް" ދުނިޔެއަށް ގޮވާލައިފި އެވެ.
އިންޓަގަވަމެންޓަލް ޕެނެލް އޮން ކްލައިމެޓް ޗޭންޖްގެ ވޯކިން ގްރޫޕުގެ ރިޕޯޓުގައި ބުނީ ކުރިން ހީކުރި ވަރަށް ވުރެ އަވަހަށް ދުނިޔެ ހޫނުވަމުންދާ ކަމަށާއި އޭގެ ސަބަބުން މި ގަރުނު ނިމޭއިރު ކަނޑުގެ ލޮނުގަނޑު އުފުލޭނެ ކަމަށެވެ. އަދި ކުރިން ކޮންމެ 100 އަހަރަކުން ދިމާވާ ތިމާވެށީގެ ކާރިސާތައް އަހަރަކު އެއް ފަހަރު ދިމާވެދާނެ ކަމަށެވެ.
އެންޓީގުއާ އާއި ބާބޭޑޯސްގެ ސަފީރު އަދި އެލަޔަންސް އޮފް ސްމޯލް އައިލެންޑް ސްޓޭޓް (އެއޯސިސް) ގެ ލީޑް ކްލައިމެޓް ނެގޯޝީއޭޓަރު ޑަޔޭން ބްލެކް ލައިން ވިދާޅުވީ ރިޕޯޓުގައި ލަފާކޮށްފައިވާ ކަންކަން ދިމާވިޔަ ނުދިނުމަށް ކުރެވެން ހުރި ހުރިހާ ކަމެއް ކުރަން ޖެހޭނެ ކަމަށެވެ.
"މިއަދު ފެންނަން އޮތް ހަގީގަތަކީ 1.5 ޑިގްރީ ސެލްސިއަސް އަށް ދުނިޔެ ހޫނުވަމުންދާ ކަން އަދި ކަނޑުގެ ލޮނުގަނޑު 0.5 މީޓަރަށް އުފުލެމުންދާ ކަން. އެކަމަކު ދުނިޔެ ހޫނުވުން ދެ ޑިގްރީ ސެލްސިއަސް އަށް އެރިޔަ ނުދީ ހިފަހައްޓައިފި ނަމަ ކުރިމަގުގައި ލޮނުގަނޑު ތިން މީޓަރަށް ނާރާ އޮވެދާނެ،" އޭނާ ވިދާޅުވި އެވެ.
ރާއްޖެ ހިމެނޭ ގޮތަށް އެއޯސިސްގައި 30 މެމްބަރު ގައުމު އޮވެ އެވެ. އެ ގައުމުތަކުގެ ތެރެއިން ދިވެހި ރާއްޖެ އަކީ އެންމެ ބިން ތިރި އަދި ކަނޑުގެ ލޮނުގަނޑު އުފުލުމުގެ ނުރައްކާ އެންމެ ބޮޑަށް އޮތް ގައުމެވެ.
އެއޯސިސް އިން ބުނީ ގައުމުތަކުން 2015 ވަނަ އަހަރު ސޮއިކުރި ޕެރިސް އެއްބަސްވުމާ އެއް ގޮތަށް ދުނިޔެ ހޫނުވުން 1.5 ޑިގްރީ ސެލްސިއަސް އަށް ވުރެ މަތިވިޔަ ނުދިނުމަށް ގައުމުތަކަށް މަސައްކަތް ކުރަން މަޖުބޫރުވެފައިވާ ކަން ރިޕޯޓުން އެނގޭ ކަމަށެވެ.
ރިޕޯޓުގައި ބުނެފައިވާ ގޮތުން ދުނިޔޭގެ ހޫނުމިން 1.5 ޑިގްރީ ސެލްސިއަސް އަށް އަރާނެ ކަމަށް ބެލެވެނީ 2030 ގަ އެވެ. އެއީ މީގެ ތިން އަހަރު ކުރިން އަންދާޒާ ކުރި ވަރަށް ވުރެ 10 އަހަރު އަވަހެވެ.
ރިޕޯޓުގައި ބުނެފައި ވަނީ އެ މިންވަރަށް ދުނިޔެ ހޫނުވުމުން އިންސާނުންނަށް ނުރައްކާ އެބަ އޮތް ކަމަށެވެ. އެގޮތުން އާދަޔާ ހިލާފު މޫސުމީ ކާރިސާތައް ދިމާވުން އިތުރުވާނެ ކަމަށާއި ގުދުރަތީ ގޮތުން އަލިފާން ރޯވުމާއި، ތޫފާންތަކާއި، ވާރޭނުވެހުން އަދި ފެންބޮޑުވުން ފަދަ ކަންކަން ގިނަ ވާނެ ކަމުގެ އިންޒާރު ދީފައި ވެ އެވެ.
