ރޭ ހޭލާ ތިބެގެން ދަރިފުޅުގެ ފޮތްތަކުގައި ސެލޯފޭން ލެއްވީ ކިތައް ބެލެނިވެރިންބާ އެވެ؟ މިއަދު ދަރިފުޅުގެ ދަބަހަށް ލާނޭ ސެނިޓައިޒަރާއި، ލަންޗް ބޮކްސް އަށް އަޅާނޭ ކާނާ މިހާރު ހުންނާނީ ހޯދާފަ އެވެ. ޔުނިފޯމުތަކުން ތާން ކަނޑުވައި، އިސްތިރިކޮށް އެކުދިން ސްކޫލަށް ފޮނުވާލަން ތައްޔާރުވަމުންދާއިރު، ދަރިފުޅާ މެދު ކުރާ އުއްމީދުތަކުގެ ބުރަދަނާއި، އެ ދަރިފުޅުގެ ރައްކާތެރިކަމާމެދު ކުރެވޭ ފިކުރުން ދުވަހުގެ އެހެން ހުރިހާ ޚިޔާލެއް ފުސްކޮށްލާހާވެ އެވެ.
ދަރީންނާއި ދަރިވަރުންނަށް އުނގަންނައިދޭން މަންހަޖު ތައްޔާރުކޮށް، ރޭވުންތައް ރާވައި ތައްޔާރީތައް ފުރިހަމަކުރަމުންދާއިރު، ޚުދު އަހަރެމެން މިތިބީ ހުރިހާ ފިލާވަޅެއް ލިބި ދަސްވެނިވެފައިތޯ ސުވާލުއުފައްދަން ޖެހެ އެވެ. ތަޢުލީމީ މަންހަޖުތަކުގައި ސްކޫލްތަކާއި ކޮލެޖު ޔުނިވާސިޓީތަކުގައި އެ ކިޔަވައިދޭ އެއްޗަކުން ދިރިއުޅެން ދަސްވޭތޯ ވިސްނާލަންޖެހެ އެވެ.
ޤައުމާއެވެ! މި ފެށުނު ހިޖުރީ އަދި ދިރާސީ އާ އަހަރާއެކު، އަހަރެމެންނަށްވެސް ދަރުސްތަކެއް ދީބަލާށެވެ! ދުނިޔެ އެނބުރެނީ ތޮށަލި ދުޅައަށްކަމަށް ފޮތްފޮތުގައި އޮވެ އެވެ. އެހެންނަމަވެސް ދިރިއުޅުމުގެ އެކި ކަންކަން އެއްވަތުމަތީން އަނެއް ވަތު ދަށުން ދާންވީމާ، ކެތްތެރިވެ އެކަންކަމަށް ޝުކުރުކުރަން އަހަރެމެންނަށް އަދިވެސް ދަހެއް ނުވެ އެވެ. ކެތްތެރިކަން، އަހަރެމެންނަށް ކިޔަވައިދޭށެވެ!
މިނިވަންކަމުގެ ފުރިހަމަ ބޭނުން ހިފަމުންދާ މި ޒަމާނުގައި މިނިވަންކަމާއެކު ޚިޔާލު ފާޅުކުރުމަކީ ޙައްޤެއްކަން ނުދަންނަ ބޮޑުމީހަކު ދިވެހިންގެ ތެރޭ ހުރުމަކީ ނާދިރުކަމެކެވެ. އަހަރެމެންނަށް އަދިވެސް ދަސްނުވަނީ، އެފަދަ މިނިވަން ޚިޔާލު ތަހައްމަލުކުރުމުގެ މަސްއޫލިއްޔަތެވެ. މި އާ އަހަރާއެކު އަހަރެމެންނަށް ތަހައްމަލުކުރަން ދަސްކޮށްދޭށެވެ!
މި ޒަމާނަކީ، އެކަކު އަނެކެއްގެ ސިފަ އާއި ފެންވަރާއި، ކުޅެދުންތެރިކަމާއި، މިންތީގެ ތަފާތުތަކަކީ، ތިމާގެ ތަޢައްޞަބުތަކުގެ ތަރަހައަށް ހެދުމުގެ ޒަމާނެއް ނޫނެވެ. އިޖުތިމާޢީ އަދި ނަޞްލީ ސިންދަފާތަކީ ޤައުމު މުއްސަނދިކޮށްދޭ ޚަޒާނާއެއްކަމަށް ބަލައިގަންނަން މުޅި ދުނިޔެވެސް ނަޞީޙަތްތެރިވާ ޒަމާނެވެ. އެހެންނަމަވެސް ނުކުޅެދުންތެރި މީހާއަށް އޯގާވެރިވެ އެއީ ތިމާއެކޭ އެއްފަދަ މީހެއްކަމުގައި ބަލައިގަންނަން އަދިވެސް އަހަރެމެން ޖެހިލުންވަމު އެވެ. އަންހެނަކަށް ބޮތްކެއް ބަދަލުކުރެވިދާނެކަން، ފިރިހެނަކަށް ދަރިފުޅުގެ ޕުއްޕު ދޮއްވިދާނެކަން ބަލައިގަންނަށް އަދިވެސް ދަތިވެ އެވެ. މާލޭ މީހާ ރާއްޖެތެރޭމީހާގެ ބަހުސް އަދިވެސް ނިމުމަކަށް ނާދެ އެވެ. މިއަހަރު އަހަރެމެންނަށް ކުލުނާއި އޯގާތެރިކަން ކިޔަވައިދޭށެވެ.
ލޯތްބަކީ ލަދުވެތި އިހުސާސަކަށް ވަނީ އިޝްޤީ ލޯތްބަށް ނުވާ ޙާލަތްތަކުގައި ހެއްޔެވެ؟ ޤައުމީ ލޯތްބަށް މަލާމާތްކުރަނީ ކީއްވެގެންހެއްޔެވެ؟ މުސްކުޅި މައިންބަފައިންގެ ގާތު ލޯބިވެއޭ ބުނަން ނުކެރެނީ ކީއްވެގެންހެއްޔެވެ؟ މަންމައިންގެ ދުވަހާއި ބައްޕައިންގެ ދުވަހާއި މާމަކާފައިންގެ ދުވަސް އަހަރެމެން ފާހަގަކުރާ އިރު ސޯޝަލް މީޑިއާއަށް ފޮޓޯލާން އަހަރެމެން ލަދެއް ނުގަންނަމު އެވެ. އެހެންނަމަވެސް ހޮސްޕިޓާ އެނދުގައި ތިބޭ މައިންބަފައިންނަށް ހޭހަންކޮށްދެވޭ ވަރަށް ވުރެ އަހަރެމެންގެ ދިރުއުޅުމުގެ އަވަދިނެތިކަން ބޮޑެވެ. މާމަގެ ޕެންޝަން ލާރި އަތުލަން ވީމާ ވަގުތުވެ އެވެ. ކާފަގެ ގޭގައި ގެސްޓުހައުސް އަޅަންވީމާ، އޯގާތެރިވެވެ އެވެ. ދަރިންގެ އުފަންދުވަހު ސޯޝަލް މީޑިއާގައި ފޮޓޯލާން ލޯބިވެ އެވެ. ދަރީންނަށް ޚަރަދުކޮށް، އެކުދިންގެ ޒިންމާ ނަގަން ދަހެއް ނުވެ އެވެ. މި އަހަރު އަހަރެމެންނަށް ޙަޤީޤީ ލޯބިވެސް ދަސްކޮށްދީބަލާށެވެ.
ދިވެހިންނަކީ އެއްބައިވަންތަ ބައެއްކަމަށް ކިޔަވައިދީ އަހަރެމެންގެ ސިކުނޑީގައި އެ ވާހަކަ ވަނީ ކަނޑާނަގާފަ އެވެ. ދިވެހިން ގެންގުޅޭނީ އެއް ވިސްނުމެކެވެ. ވާހަކަ ދައްކާނީ އެއް ބަހަކުންނެވެ. ދީނަކީ އިސްލާމްދީނެވެ. ގެންގުޅެން ބުނަނީ އެއް ވިސްނުމެކެވެ. ފަހަކަށް އައިސް އެ ފިލާވަޅު ފަހުމުކުރަން ދަތިވެ އެވެ. ދިވެހިންނަކީ އެއް ބައެއް ނޫނެވެ. ދިވެހިންނަކީ ވެރިކަން ކުރާ ޕާޓީ އާއި އިދިކޮޅު ޕާޓީއެވެ. ދީނީ މީހުންނާއި ލާދީނީ މީހުންނެވެ. ދިވެހި ބަހަށް ލޯބިކުރާ މީހުންނާއި ބަސްދެކެ ފޫހިވާ މީހުންނެވެ. އެއްބައިވަންތަކަމުގެ އަސާސްތަކަކީ މިއީ ކަމުގައިވާނަމަ، އެ އަސާސްތަކަށް ބަރޯސާވެ، މިއަދުގެ ދިވެހި މުޖުތަމަޢުން އެއްބައިވަންތަކަން ހޯދާނީ ކިހިނެތްހެއްޔެވެ؟ އެގޮތެއްވެސް ދަސްކޮށްދީބަލާށެވެ!
ޤާނޫނުގެ ދިގުއަތޯލަ އެވެ. އެ ނުފޯރާ ހިސާބެއް ނޯވެޔޯލަ އެވެ. އެވެސް ކިޔަވައިދިން އެއްޗެކެވެ. ޤާނޫނާއި ޢަދުލު އިންސާފުގެ ބާރުގެ ވާހަކަ އެވެ. އިންސާފުގެ މަގުގައި ދަތިކަން ވިޔަސް، އިންސާފު ލިބޭނެ ކަމުގެ ވާހަކަ އެވެ. މި ފިލާވަޅު އޮޅިއްޖެ އެވެ. ވާނުވާއެއް ނޭނގޭ ހިސާބަށް ހިނގައްޖެ އެވެ. އިންސާފަށް ލޯބިކުރި، އިންސާފަށް ވަކާލާތު ކުރި އެކުވެރިންނަށް އިންސާފު ނުލިބި އެތަށް އަހަރެއް ވޭތުވެގެންދާއިރު، އިންސާފުގެ މާނަވެސް އޮޅިއްޖެ އެވެ. ތިޔަ ބުނާ މި ޒަމާނުގެ ނުލިބޭ އިންސާފުވެސް އަހަރެމެންނަށް ކިޔަވައިދީބަލާށެވެ!
އާ ފޮތެއް ހުޅުވާލައިފީމެވެ. ގަލަން އަތަށް ހެޔޮވަރުކޮށްލައިފީމެވެ. ދިރާސީ އާ އަހަރާއެކު އަހަރެމެންވެސް މިތިބީ ތައްޔާރަށެވެ. އަހަރެމެންނަށްވެސް ކިޔަވައިދޭށެވެ. މިތިބީ އަޑުއަހައި ދަސްކުރަން ހިތުލައިގެންނެވެ.
