ޕެރިސް، ފްރާންސް (އޯގަސްޓު 9) - މޫސުމީ ބަދަލުގެ ސަބަބުން ދުނިޔެއަށް ކުރިމަތިވެފައިވާ ހާލަތު ބަޔާންކޮށް އދ. އިން ހޯމަ ދުވަހު އާއްމު ކުރި ރިޕޯޓާ އެކު ދުނިޔޭގެ ލީޑަރުންނާއި ތިމާވެށި އެކްޓިވިސްޓުން ކަންބޮޑުވުމާއި ހިތާމަ ފާޅުކޮށްފި އެވެ.
ޔޫރަޕިއަން ޔޫނިއަންގެ ޑެޕިއުޓީ ކްލައިމެޓް ޗީފް، ފްރޭންސް ޓިމާމޭންސް ވިދާޅުވީ އިންޓަގަވަމެންޓަލް ޕެނެލް އޮން ކްލައިމެޓް ޗޭންޖްގެ ވޯކިން ގްރޫޕުގެ ރިޕޯޓުން އެނގުނީ "މޫސުމީ ބަދަލުގެ ނުރައްކާ ކުޑަ ކުރަން އަދި މާ ބޮޑަށް ވަގުތު ކުޑަތަން ނުވާ" ކަމަށެވެ.
ރިޕޯޓުގައިވާ ގޮތުން 2030 ވަނަ އަހަރު އަންނައިރު، ދުނިޔޭގެ ފިިނިހޫނުމިން 1.5 ޑިގްރީ ސެލްސިއަސް އަށް އިތުރުވާނެ އެވެ. އެއީ ކުރިން އަންދާޒާ ކުރި ވަރަށް ވުރެ އަވަސް މުއްދަތެކެވެ.
ހިފެހެއްޓުމެއް ނެތި ހޫނުވަމުން ދާ ނަމަ ގަނޑުފެން ވިރި ކަނޑުގެ ލޮނުގަނޑު އުފުލި ރާއްޖެ ފަދަ ކުދި ޖަޒީރާ ގައުމުތަކަށް އޮތް ނުރައްކާ އިތުރުވާނެ ކަމަށް ބުނެފައިވެ އެވެ. އެގޮތުން މޫސުމީ ކާރިސަތައް ދިމާވުން އަވަސްވެ، އޭގެ އަސަރު ވަރުގަދަވާނެ އެވެ. ކޮންމެ 100 އަހަރުން ދިމާވާ ކާރިސާތައް ގަރުނު ނިމޭއިރު އަހަރަކު އެއް ފަހަރު ދިމާވެދާނެ އެވެ.
ވިހަ ގޭސް ބޭރު ކުރުން މަދު ކުރި ނަމަވެސް ލޮނުގަނޑު އުފުލެމުން ދާނެ އެވެ. މިހާރު ކުރިއަށް ދާ ރޭޓުގައި ދާ ނަމަ ގަރުނު ނިމޭއިރު ދެ މީޓަރަށް އަދި 2150 ފަސް މީޓަރަށް ލޮނުގަނޑު އުފުލޭނެ އެވެ. އެންމެ ރަނގަޅު ހާލަތުގައި ވެސް 0.5 މީޓަރަށް އުފުލޭނެ ކަމަށް ރިޕޯޓުގައި ވެ އެވެ.
އިނގިރޭސި ވިލާތުގެ ބޮޑު ވަޒީރު ބޮރިސް ޖޯންސަން ވިދާޅުވީ ރިޕޯޓު ފެނިފައި "ހަމަ ބިމަށް ތިރިވެވިއްޖެ" ކަމަށެވެ. އދ. ގެ މޫސުމީ ބަދަލާ ގުޅޭ ކޮޕް26 ބައްދަލުވުން އަންނަ ނޮވެމްބަރު މަހު އޮންނާނީ އިނގިރޭސި ވިލާތުގަ އެވެ.
"އަޅުގަނޑު އުއްމީދު ކުރަނީ މިއަދު އައިޕީސީސީން ނެރުނު ރިޕޯޓަކީ ދުނިޔެއިން މިހާރުން މިހާރަށް އަވަސް ފިޔަވަޅު އެޅުމަށް ނިދިން ހޭލައްވާލި ރަނގަބީލެއް ކަމަށް،" އޭނާ ވިދާޅުވި އެވެ.
ރާއްޖޭގެ ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވީ 3،500 ސަފްހާގެ ރިޕޯޓުން ޔަގީން ވަނީ މޫސުމީ ބަދަލުގެ ނުރައްކާ އެންމެ ބޮޑު ގައުމުތައް އޮތީ ނެތިދިޔުމުގެ ތުންފަތް މަތީގައި ކަމަށެވެ.
ގްލޯބަލް ޖަސްޓިސް ނައުގެ ހެޑް އޮފް ޕޮލިސީ ޑޮރޮތީ ގެރޭރޯ ވިދާޅުވީ އެ ރިޕޯޓަކީ އަވަސް ފިޔަވަޅު ނާޅައިފި ނަމަ ދުނިޔޭގެ މުސްތަގްބަލް އޮންނާނެ ގޮތުގެ ބިރުވެރިކަން ބުނެދޭ އިންޒާރެއް ކަމަށެވެ.
ގިނަ ލީޑަރުންނާއި އެކްޓިވިސްޓުން ސިފަ ކުރި ގޮތުގައި އައިޕީސީސީގެ ރިޕޯޓަކީ ތެޔޮ ނުވަތަ ފޮސިލް ފިޔުލް އަށް ބަރޯސާވެފައިވާ ދުނިޔޭގެ އިގްތިސާދު މުޅިން ބަދަލު ކުރަން ޖެހޭ ކަން އަންގައިދޭ އެންގުމެކެވެ.
ޒުވާން އެކްޓިވިސްޓް ގްރެޓާ ތަންބާގް ވިދާޅުވީ އެ ރިޕޯޓަކީ "ދުނިޔޭގެ ހާލަތުގެ ކުޑަ ހުލާސާއެއް" ކަމަށެވެ.
"އޭގެން އަހަރުމެން ކުރަންވީ ކަމެއް ބުނެ ނުދޭ،" އޭނާ ޓްވިޓާގައި ލިޔުނެވެ.
"ހިތްވަރު ގަދަކޮށް މި ރިޕޯޓުތަކުގައިވާ ސައިންސްގެ ހެކީގެ އަލީގައި އަމަލު ކުރުން އޮތީ އަހަރުމެންގެ އަތް މަތީގައި،" ފަސްދޮޅަސް ހަ ގައުމަކުން 234 ސައިންސްވެރިން ބައިވެރިވެގެން ކުރި މަސައްކަތާ ގުޅޭ ގޮތުން ގްރެޓާ ވިދާޅުވި އެވެ.
އަންނަ ނޮވެމްބަރު މަހު އިނގިރޭސި ވިލާތުގައި އޮންނަ ކޮޕް26 ސަމިޓުގެ ބޭނުމަކީ ވެސް ދުނިޔެ ހޫނުވުން 1.5 ޑިގްރީ ސެލްސިއަސް އަށް ވުރެ ތިރީގައި ހިފެހެއްޓުމަށް ގައުމުތަކުން ކުރާނެ ކަންކަން ކަނޑައެޅުމެވެ. ދެހާސް ފަނަރަ ވަނަ އަހަރު ސޮއިކުރި ޕެރސް އެގްރީމެންޓުގެ ދަށުން 196 ގައުމަކުން ވަނީ އެ ލަނޑުދަނޑިއަށް މަސައްކަތް ކުރަން އެއްބަސްވެފަ އެވެ. ނަމަވެސް މިއަދާ ހަމައަށް އަމަލީ ސިފައެއް ނުފެނެ އެވެ.
