ބާސެލޯނާ (އޮގަސްޓް 9) - ލިއޮނަލް މެސީ ފަދަ އާދަޔާހިލާފު ކުޅުންތެރިއަކު ނުލައި ކުރިއަށްދާން އުނދަގޫވާނެ ކަމަށާއި އެކަމަކު އޭނާ ނެތި ކުރިއަށް ދިއުން ނޫން ގޮތެއް މިހާރު ނެތް ކަމަށް ބާސެލޯނާގެ ކޯޗު ރޮނާލްޑް ކޫމަން ވަނީ ބުނެފަ އެވެ.
މެސީ ކްލަބް ދޫކޮށްލާނެކަން ރަސްމީކޮށް އިއުލާނުކުރިތާ މާގިނައިރެއް ނުވެ ބާސެލޯނާ އިން ވަނީ ރޭ ގެމްޕާ ޓްރޮފީ މެޗުގައި ޔުވެންޓަސްއާ ދެކޮޅަށް ކުޅެފަ އެވެ. ބާސެލޯނާ އިން ވަނީ އެ މެޗުގައި ސާޖިއޯ ބުސްކެޓްސްގެ ކެޕްޓަން ކަމުގައި 3-0 އިން މޮޅުވެފަ އެވެ.
ޔުވެންޓަސް ކޮޅަށް ބާސެލޯނާގެ ލަނޑުތައް ޖެހީ މެމްފިސް ޑިޕާއި އާއި މާޓިން ބްރައިތުވެއިޓް އަދި ރިކުއީ ޕުއީގް އެެވެ. މި މެޗުގެ 10 ވަނަ މިނިޓްގައި ބާސެލޯނާގެ ސަޕޯޓަރުން ވަނީ މެސީ އަށް ސަޕޯޓް އޮތްކަން ދައްކުވައިދީ ޝުއޫރުފާޅުކޮށްފަ އެވެ.
މެޗަށް ފަހު އޮތް ނޫސްވެރިންގެ ބައްދަލުވުމުގައި ކޫމަން ބުނީ މެސީ ކްލަބް ދޫކޮށްލުމަކީ ކްލަބާ ގުޅޭ އެންމެނަށް ވެސް ގަބޫލުކުރަން އުނދަގޫ ކަމެއް ކަމަށެވެ.
"އެކަމަކު އަހަރެމެންނަށް އުނދަގޫވިޔަސް މީގެ މިހާރު ކުރިއަށް ދިއުން ނޫން ގޮތެއް ނެތް. ހާލަތު ބަދަލުކުރެވެން ނެތީމަ އަހަރެމެން ކުރިއަށް ވިސްނައިގެން މި ދަނީ،" ކޫމަން ބުންޏެވެ.
މެސީ ފަދަ ކުޅުންތެރިއަކު ނެތްތަން ފޫބެއްދޭނެ އިތުރު ކުޅުންތެރިއަކު ނުހޯދޭނެ ކަމަށް ކޫމަން ވަނީ ބުނެފަ އެވެ. އަދި މިގެ އެންމެ އެދެވިގެންވާ ގޮތަކީ ބާސެލޯނާ ޓީމެއްގެ ގޮތުގައި މޮޅަށް ކުޅެގެން ސަޕޯޓަރުން ހިތްހަމަޖައްސައިދިނުން ކަމަށް ކޫމަން ވަނީ ބުނެފަ އެވެ.
ޔުވެންޓަސް ކޮޅަށް ގޯލު ޖެހުމަށް ފަހު ޑިޕާއި އުފާފާޅުކުރަނީ.-- ފޮޓޯ: އޭއެފްޕީ
ކޫމަން ވަނީ އެ ޓީމުގެ އެޓޭކްގައި ހިމެނޭ ކުޅުންތެރިންގެ ތެރެއިން ކްލަބްގައި ކުރިން ތިބި ބައެއް ކުޅުންތެރިންނާއި އެހެން ބައެއް މަގާމުތަކުގައި ތިބި ކުޅުންތެރިންތަކެއް ޓީމާ ވަކިވުމުގެ ފުރުސަތު އެބައޮތް ކަމަށް ބުނެފަ އެވެ. ބާސެލޯނާ އިން ދޫކޮށްލަން މަސައްކަތް ކުރަމުން އަންނަ ކުޅުންތެރިންގެ ތެރޭގައި ބްރައިތުވެއިޓާއި މިރަލެމް ޕިޔަނިޗް އަދި ސެމިއުލް އުމްޓީޓީ ހިމެނެ އެވެ.
ކުރިއަށް އޮތް ސީޒަނުގައި ބާސެލޯނާގެ އެޓޭކް އެންމެ ބޮޑަށް ބަރޯސާވާނެ ދެ ކުޅުންތެރިއަކީ މި ފަހަރުގެ ޓްރާންސްފާގައި އެ ޓީމާ ގުޅުނު ޑިޕާއިގެ އިތުރުން ސާޖިއޯ އަގުއޭރޯ އަށެވެ. ކޫމަން ހުރީ އެ ދެ ކުޅުންތެރިންގެ ފަރާތުން ތަފާތު ފެންނާނެ ކަމުގެ އުއްމީދުގަ އެވެ.
"ޕްރީ ސީޒަނުގައި މެމްފިސްގެ ފަރާތުން ފެންނަ ތަފާތު ސީޒަނުގައި ވެސް ތަކުރާރުވާނެ ކަމަށް މި ބަލަނީ. އަގުއޭރޯ ވެސް އެއްކޮށް ފިޓްވުމުން ރަނގަޅުވާނެ،" ކޫމަން ބުންޏެވެ.
އޮޮލިމްޕިކްސްގައި ވާދަކުރި ސްޕެއިން ޓީމުގައި ހިމެނޭ ބާސެލޯނާގެ ޕެޑްރީ އާއި އެރިކް ގާސިއާ އަލުން ޓީމާ ގުޅޭނީ ކުރު ޗުއްޓީއެއް ހޭދަކުރުމަށް ފަހު ކަމަށް ކޫމަން ވަނީ ބުނެފަ އެވެ. ޕެޑްރީ ވަނީ މިދިޔަ ސީޒަން ހިމެނޭ ގޮތަށް ބާސެލޯނާ އާއި ސްޕެއިނަށް ޖުމްލަ އެކު 70 އަށް ވުރެ ގިނަ މެޗު ކުޅެފަ އެވެ. މި ފަހަރުގެ ޔޫރޯގައި ކުޅުނު ޕެޑްރީ އޮލިމްޕިކް ޓީމަށް ނެގުމުން ކޫމަން ވަނީ އެކަމާ ހިތްހަމަނުޖެހުން ފާޅުކޮށްފަ އެވެ.
