ޕެރިސް (އޮގަސްޓް 9) - ބާސެލޯނާގެ ތަރި ލިއޮނަލް މެސީ ގެންނަން ޕީއެސްޖީން ކުރާ މަސައްކަތުގެ ތެރެއިން އެ ޓީމުގެ ގިނަ ކުޅުންތެރިންތަކެއް ދޫކޮށްލާނެ ކަމަށް މީޑިއާ ރިޕޯޓްތައް ބުނެފި އެވެ.
އިއްޔެ ބޭއްވި ބާސެލޯނާގައި އޭނާގެ ވަދާއީ ނޫސްވެރިންގެ ބައްދަލުވުމުގައި ވާހަކަ ދައްކަމުން މެސީ ވަނީ ޕީއެސްޖީ އަށް ބަދަލުވުމުގެ ފުރުސަތު އެބައޮތް ކަމަށް ބުނެފަ އެވެ. އެކަަމަކު، އެއްވެސް ކަމެއް ރަސްމީކޮށް ފައިނަލް ނުވާކަމަށް ވެސް މެސީ ބުނެފައިވެ އެވެ.
ފްރާންސްގެ މީޑިއާ ރިޕޯޓްތައް ބުނާގޮތުން މެސީ މިހާރު ވަނީ ޕީއެސްޖީއާ އެކު ދެ އަހަރުގެ އެއްބަސްވުމެއްގައި ސޮއިކުރަން ނިންމައިފަ އެވެ. އިނގިރޭސި ނޫހެއް ކަމަށްވާ ތި އެތުލެޓިކް އިން ރިޕޯޓްކުރާ ގޮތުގައި ކޮންޓްރެކްޓްގައި ސޮއިކުރާއިރު، މެސީ އަށް ބޯނަހެއްގެ ގޮތުގައި 21 މިލިއަން ޕައުންޑް (29 މިލިއަން ޑޮލަރު) ދޭނެ އެވެ.
ޔޫރަޕްގެ ގިނަ ގައުމުތަކެއްގެ އެކި މީޑިއާތަކުން އަންނަނީ ފައިނޭންޝިއަލް ފެއާޕްލޭ (އެފްއެފްޕީ) ގަވާއިދުގެ ތެރެއިން އަމަލުކުރާނަމަ ޕީއެސްޖީ އަށް މެސީ ލައްވައި ބޮޑު ކޮންޓްރެކްޓެއްގައި ސޮއިކުރެވޭނީ އެ ކްލަބްގެ ޖުމްލަ މުސާރައިގެ ތަފްސީލް އާންމުކުރުމަށް ފަހު ކަމަށް ބުނެފަ އެވެ.
މި ވަގުތު ވެސް ޕީއެސްޖީގައި ބޮޑު މުސާރަ ލިބޭ ގިނަ ކުޅުންތެރިން ތިބިއިރު އެ ކްލަބްގެ މާލީ ކަންތައްތައް ބަލަން ގިނަ ބަޔަކު އަންނަނީ ގޮވާލަމުންނެވެ. އަދި އެފްއެފްޕީ އަކީ ވަކި ކްލަބެއްގެ މަންފާ އަށް އަދި ބައެއް ކްލަބްތަކަށް އަދަބުދޭން އޮންނަ ކަމެއް ކަމަށް ބުނެ ޔުއެފާ އަށް އަމާޒުވާ ފާޑުކިޔުންތައް ވެސް އަންނަނީ އިތުރުވަމުންނެވެ. އަދި ވަރަށް އަަވަހަށް ރަސްމީކޮށް އެ މައްސަަލަ ޔުއެފާ އަށް ހުށަހަޅަން ވެސް ސްޕެއިނުގެ ގާނޫނީ ވަކީލުންގެ ޓީމަކުން އަންނަނީ މަސައްކަތް ކުރަމުންނެވެ.
ރިޕޯޓްތައް ބުނާގޮތުން މެސީގެ ޑީލް ރަޖިސްޓްރީކުރުމުގެ ކުރިން ޕީއެސްޖީން ވަނީ ގިނަ ކުޅުންތެރިންތަކެއް ދޫކޮށްލަން ނިންމައިފަ އެވެ.
އެ ގޮތުން މިހާތަނަށް ދޫކޮށްލަން ނިންމާފައިވާ ކުޅުންތެރިންނަށް ބަލާއިރު، އަބްދޫ ޑިއާލޯ، ތިލޯ ކެރާ، އިދްރީސާ ގޭއި އަދި ރަފީނިއާ އަލްކަންޓާރާ އަދި ސާޖިއޯ ރިކޯ ހިމެނެ އެވެ. އޭގެ އިތުރުން ވެސް މަޝްހޫރު ކުޅުންތެރިންތަކެއް ދޫކޮށްލުމުގެ ފުރުސަތު ބޮޑެެވެ. އެ ކުޅުންތެރިންގެ ތެރޭގައި މައުރޯ އިކާޑީ އާއި އެންޑަ ހެރޭރާ އަދި ކޭލޯ ނަވާސް ހިމެނެ އެވެ.
ޕީއެސްޖީން މަސައްކަތް ކުރަމުން އަންނަނީ ކީލިއަން އެމްބާޕޭ ދޫކޮށްނުލައި މެސީ ގެނެވޭނެ ގޮތެއް ހޯދުމަށެެވެ. އެމްބާޕޭ މި ވަގުތު ޕީއެސްޖީއާ އެކު ކޮންޓްރެކްޓްގައި ހުރީ އަންނަ އަހަރުގެ ޖޫން މަހުގެ ނިޔަލަށެވެ.
އެމްބާޕޭ، ރެއާލް މެޑްރިޑަށް ބަދަލުވާން އުޅޭ ކަމުގެ އަޑުތައް ގަދަވެފައިވާއިރު، ޕީއެސްޖީން އަންނަނީ އޭނާގެ އެއްބަސްވުން އާ ކުރަން މަސައްކަތް ކުރަމުންނެވެ. ޕީއެސްޖީއާ އެކު އެމްބާޕޭ ކޮންޓްރެކްޓް އާ ނުކޮށްފިނަމަ އަންނަ ޖެނުއަރީ މަހު އެމްބާޕޭ ބޭނުން ޓީމަކާ އެކު ޕްރީ އެގްރީމެންޓެއްގައި ސޮއިކުރެވޭނެ އެވެ. އެއީ އަންނަ ސީޒަނުގައި ހިލޭ ޓްރާންސްފާއެއްގައި އެ ޓީމަކާ ގުޅޭގޮތަށެވެ.
މެސީގެ ސޮއި ހޯދިއްޖެނަމަ މި ފަހަރުގެ ޓްރާންސްފާ މާކެޓްގައި ޕީއެސްޖީގެ ވިޔަފާރި ވަރަށް ފުރިހަމަވާނެ އެވެ. ޕީއެސްޖީން މި ފަހަރުގެ ޓްރާންސްފާ ބާޒާރު ފެށި ފަހުން ވަނީ ރެއާލް މެޑްރިޑްގެ ސާޖިއޯ ރާމޯސް އާއި އޭސީ މިލާންގެ ޖިއަންލުއީޖީ ޑޮންނަރުންމާ، ލިވަޕޫލްގެ ޖިއޮޖީނިއޯ ވައިނަލްޑަމް އަދި އިންޓަ މިލާނުގެ އަޝްރަފް ހަކީމީގެ ސޮއި ހޯދައިފަ އެވެ. މީގެ ތެރެއިން 70 މިލިއަން ޑޮލަރަށް ގަތް ހަކީމީ ފިޔަވައި ދެން ތިބި ކުޅުންތެރިންގެ ސޮއި ހޯދީ ހިލޭ ޓްރާންސްފާއެއްގަ އެވެ.
