ގްރީންވިލް، އެމެރިކާ (އޯގަސްޓު 9) - އެމެރިކާގެ ކެލިފޯނިއާ ސްޓޭޓުގެ އުތުރުގެ ޖަންގަލީގައި ރޯވެފައިވާ އަލިފާންގަނޑަކީ އެ ސްޓޭޓުގެ ތާރީހުގައި މިހާތަނަށް ދެ ވަނަ އަށް އެންމެ ބޮޑު އަލިފާންގަނޑު ކަމަށް ކަމާ ބެހޭ އިދާރާތަކުން ބުނެފި އެވެ.
އަލިފާންގަނޑު ކޮންޓްރޯލް ނުވެ ފެތުރެމުން ދާތީ އެތައް ހާސް ބަޔަކު ގެތައް ދޫކޮށް ރައްކާތެރި ހިސާބުތަކަށް ބަދަލުވެފައި ވާއިރު، މިހާތަނަށް ތިން މީހަކު ގެއްލިފައި ވެ އެވެ.
އާދީއްތަ ދުވަހު އެކަނިވެސް 463،477 އޭކަރު ބިން އެނދި އެވެ. އެއްކޮށް އަނދާފައިވާ ސަރަހައްދު ލޮސް އެންޖެލެސް އަށް ވުރެ ބޮޑެވެ.
ކެލިފޯނިއާގެ ޖަންގަލީގެ އެކި ހިސާބުތަކުގައި މި ވަގުތު 11 އަލިފާންގަނޑު ރޯވެފައި ވާއިރު، އޭގެ ތެރެއިން އެންމެ ބޮޑު އަލިފާންގަނޑަކީ "ޑިކްސީ" އެވެ.
އަލިފާންގަނޑުގައި ގްރީންވިލް އަވަށް އެއްކޮށް އަނދާފައި ވާއިރު، އެ ތަނުގައި ދިރިއުޅުނު މީހުން ވަނީ އެހެން ހިސާބެއްގައި ހުރި ވަގުތީ ހިޔާއަކަށް ބަދަލުވެފަ އެވެ.
ގްރީންވިލްގެ ގަވަރުނަރު ގެވިން ނިއުސަމް ވިދާޅުވީ އަލިފާން ނިއްވުމުގެ މަސައްކަތް ހަރުދަނާ ކުރުމަށް ފިޔަވަޅު އަޅުއްވާނެ ކަމަށެވެ. ނަމަވެސް މޫސުމީ ބަދަލުގެ ސަބަބުން ޖަންގަލީގައި ރޯވާ ހުޅުތައް ބޮޑުވެފައި ހަލުވިކަމާއެކު މާ ބޮޑު ސަރަހައްދަކަށް ފެތުރޭ ކަމަށް ފާހަގަކުރެއްވި އެވެ.
ދުނިޔެ ހޫނުވެ، ވާރޭ ނުވެހި ގިނަ ދުވަސްވުމުގެ ސަބަބުން ޖަންގަލިތަކުގައި ރޯވުމަށް އެންމެ އެކަށޭނަ މާހައުލު އުފެދެ އެވެ. ފަހަކަށް އައިސް އެފަދަ އަލިފާންގަނޑުތަކުގައި ލިބޭ ގެއްލުން ދަނީ ދުނިޔޭގެ ހުރިހާ ހިސާބެއްގައި ވެސް ބޮޑުވަމުންނެވެ.
"ޑިކްސީ" އަލިފާންގަނޑުގައި ތިން ފަޔާފައިޓަރުންނަށް އަނިޔާވެފައި ވާއިރު މިހާތަނަށް ކޮންޓްރޯލް ކުރެވުނީ އެންމެ 21 ޕަސެންޓެވެ. ޖުލައި 13 ވަނަ ދުވަހު ރޯވި އެ އަލިފާންގަނޑު ކުރިއަށް އޮތް ދެ ހަފްތާ ތެރޭ ވެސް ނިއްވާލެވޭނެ ކަމުގެ އުއްމީދެއް ނެތެވެ.
ވައި މަޑުވުމުގެ ސަބަބުން ހުޅުގަނޑު ފެތުރޭ ސްޕީޑް މަޑުވި ނަމަވެސް ކުރިއަށް އޮތް ދުވަސްތަކުގައި ހޫނުމިން 38 ޑިގްރީ ސެލްސިއަސްއަށް ވުރެ މަތިވާނެ ކަމަށް ބެލެވޭތީ އިތުރު އަލިފާންގަނޑުތައް ރޯވުމުގެ ފުރުސަތު އެބަ އޮތެވެ.
ކެލިފޯނިއާގެ އިތުރުން ތުރުކީ އާއި ގްރީސްގެ ޖަންގަލިތަކުގައި ވެސް މި ވަގުތު ދަނީ ރޯވެ އަނދަމުންނެވެ. އެ ދެ ގައުމުގައި ވެސް އެތައް ހާށް ބަޔަކު ރައްކާތެރި ހިސާބުތަކަށް ބަދަލުވެފައި ވާއިރު، ބޮޑެތި ގެއްލުންތައް ދަނީ ވަމުންނެވެ.
