ގުދުސް (އޯގަސްޓު 9) - އިޒްރޭލުގައި ކޮވިޑް ކޭސްތައް އިތުރުވަމުންދާ މި ދަނޑިވަޅުގައި އިތުރު ލޮކްޑައުނަކަށް ނުގޮސްވޭތޯ ބެލުމަށް 120 ރެޕިޑް ޓެސްޓު ސްޓޭޝަން ގާއިމްކޮށްފި އެވެ.
އިޒްރޭލުގެ ގައުމީ ސިއްހީ ހިދުމަތް ފޯރުކޮށްދޭ މޭގެން ޑޭވިޑް އެޑޮމް އެމެޖެންސީ ސާވިސް އިން ބުނީ އެ ސްޓޭޝަންތައް ހުޅުވީ ހެލްތު މިނިސްޓްރީގެ އެދުމުގެ މަތިން ކަމަށެވެ.
ޓެސްޓިން ސެންޓަރުތައް ހުޅުވީ ވެކްސިން ނުޖަހާ ތިބި މީހުންނަށެވެ. އެ ސްޓޭޝަންތަކުން ހަދާ ޓެސްޓުގެ ނަތީޖާ 15 މިނެޓު ތެރޭ ލިބޭނެ އެވެ.
އާދީއްތަ ދުވަހުން ފެށިގެން ވެކްސިން ނުޖަހާ މީހުންނާ ދެކޮޅަށް ގިނަ ފިޔަވަޅުތަކެއް ވަނީ އަޅާފަ އެވެ. ބައެއް ހިދުމަތްތައް ބޭނުން ކުރުމަށް 24 ގަޑިއިރު ނުވާ ނެގެޓިވް ނަތީޖާ ދައްކަން ޖެހެ އެވެ.
އޯގަސްޓު 20 ވަނަ ދުވަހުން ފެށިގެން އުމުރުން 12 އަހަރުން ދަށުގެ ކުޑަކުދިން ވެސް އާއްމު ބައެއް ތަންތަނަށް ވައްދާނީ 24 ގަޑިއިރު ހަމަނުވާ ނެގެޓިވް ނަތީޖާއަކާ އެކު އެވެ.
ފާއިތުވި ހަފްތާގައި ކޮންމެ ދުވަހަކު ވެސް އެވްރެޖުކޮށް 3،000 ކޭސް ދަނީ ފެންނަމުންނެވެ. މިއީ މިދިޔަ އޭޕްރިލް މަހަށް ފަހު އަދަދުތައް މިހާ މައްޗަށް ދިޔަ ފުރަތަމަ ފަހަރެވެ.
އެންމެ ކާމިޔާބުކަމާ އެކު ވެކްސިން ޕްރޮގްރާމް ހިންގަމުންދާ އިޒްރޭލުގައި ދުވާލަކު 10،000 ކޭސް އިން 100 އަށް ވުރެ މަދު ކޭސް އަށް މީގެ ކުރިން ދަށްކުރި އެވެ.
އަލަށް ގާއިމްކުރި ރެޕިޑް ޓެސްޓިން ސްޓޭޝަންތަކުގައި ޓެސްޓެއް ހަދައިދޭނީ 16 ޑޮލަރަށެވެ. ނެގެޓިން ނަތީޖާ ލިބޭ މީހުންނަށް 24 ގަޑިއިރުގެ "ހެލްތު ޕާސް" ލިބޭނެ އެވެ.
"ލޮކްޑައުން ކުރާނީ އެންމެ ފަހު ފިޔަވަޅެއްގެ ގޮތުން. އެ ހިސާބަށް ނުދިޔުމަށް ކުރެވެން ހުރި ހުރިހާ ކަމެއް ކުރާނަން،" ހެލްތު މިނިސްޓަރު ނިޓްޒާން ހޮރޮވިޓްޒް ވިދާޅުވި އެވެ.
ނުވަ މިލިއަން މީހުންގެ އާބާދީއެއް އޮތް އިޒްރޭލުން މިދިޔަ ޑިސެމްބަރު މަހު ވެކްސިން ޕްރޮގްރާމް ފެށީ ފައިޒާއާ އެކު އެކުލަވާލި އެއްބަސްވުމެއްގެ ދަށުންނެވެ.
އެ އެއްބަސްވުމުގެ ދަށުން އެންމެ ފުރަތަމަ ފައިޒާގެ އެތައް މިލިއަން ޑޯޒެއް ލިބުނު އެއް ގައުމަކީ އިޒްރޭލެވެ. ބަދަލުގައި އިޒްރޭލުން ވަނީ އެ ވެކްސިނުން ކުރާ އަސަރާ ގުޅޭ ބަޔޯމެޑިކަލް ޑޭޓާ ފައިޒާއަށް ފޯރުކޮށްދީފަ އެވެ.
ވެކްސިން ދޭން ފެށުމުން ކޭސްތައް މަދުވި ނަމަވެސް، ޑެލްޓާ ވޭރިއެންޓުގެ ސަބަބުން ވެކްސިން ނުޖަހާ ތިބި މީހުންގެ މެދުގައި ވަނީ ކޭސްތައް އިތުރުވެފަ އެވެ. އޭގެ އިތުރުން ހަ މަހަށް ވުރެ ކުރިން ވެކްސިން ޖެހި މީހުންގެ މެދުގައި ވެސް ބަލި ފެތުރެ އެވެ.
އިޒްރޭލުން މިހާރު އުޅެނީ ބޫސްޓާ ޝޮޓު ދިނުމުގެ ކެމްޕެއިން ފަށައިގެންނެވެ. އެއާއެކު ވެކްސިން ނުޖަހާ މީހުން ހެލްތު ޕާސް ވެސް ދައްކަން ޖެހޭނެ އެވެ.
ކޮވިޑާ ގުޅިގެން އެޅި ގިނަ ފިޔަވަޅުތައް މިދިޔަ ޖޫން މަހު އުވާލި ނަމަވެސް ކޭސްތައް އިތުރުވާން ފެށުމުން ޖުލައި މަހު އަނެއްކާ ބައެއް ފިޔަވަޅުތައް ތަންފީޒު ކުރަން ފެށި އެވެ.
މިހާރު އަމަލު ކުރާ އުސޫލުގެ ދަށުން 100 މީހުންނަށް ވުރެ ގިނަ މީހުން ތިބި ތަނަކަށް ވެކްސިން ނުޖަހާ ހުރި މީހަކަށް ވަދެވޭނީ 72 ގަޑިއިރު ހަމަނުވާ ނެގެޓިވް ނަތީޖާ ދައްކައިގެންނެވެ.
ފާއިތުވި 24 ގަޑިއިރު ތެރޭގައި އެ ގައުމުން 2،886 ކޭސް ފެނުނެވެ. މި ވަގުތު ހޮސްޕިޓަލުގައި ތިބި 602 މީހުންގެ ތެރެއިން 348 މީހުންގެ ހާލު ދެރަ އެވެ.
އިޒްރޭލުން ޖުމްލަ 900،000 ކޭސް މިހާތަނަށް ފެނިފައި ވާއިރު، މި ބަލީގައި މަރުވެފައި ވަނީ 6،500 މީހުންނެވެ.
