މެންޗެސްޓާ ސިޓީ ބަލިކޮށް ލެސްޓާ އިން ޗެރިޓީ ޝީލްޑް އުފުލާލައިފި

ލަންޑަން (އޮގަސްޓް 7) - އިނގިރޭސި ފުޓްބޯޅަ ސީޒަން ހުޅުވަން ކުޅޭ ޗެރިޓީ ޝީލްޑް މެޗުގައި މެންޗެސްޓާ ސިޓީ އަތުން 1-0 އިން ލެސްޓާ ސިޓީ މޮޅުވެއްޖެ އެވެ.

މިދިޔަ ސީޒަނުގައި ޗެލްސީ ބަލިކޮށް އެފްއޭ ކަޕް ޗެމްޕިއަންކަން ހޯދި ލެސްޓާ އިން މީގެ ކުރިން ޗެރިޓީ ޝީލްޑް އުފުލާލީ އެންމެ ފަހަރަކު އެވެ. އެއީ 1971 ވަނަ އަހަރު ލިވަޕޫލް ބަލިކޮށްފަ އެވެ. އާސެނަލް އަތުން 2014 ވަނަ އަހަރުގެ ޝީލްޑް މެޗުން ބަލިވި ފަހުން ސިޓީ ވަނީ ދެ ފަހަރެއްގެ މަތިން ޝީލްޑް އުފުލާލައިފަ އެވެ.

ވެމްބްލީ ސްޓޭޑިއަމްގައި ގިނަ އަދަދެއްގެ ސަޕޯޓަރުން ދަނޑަށް ވައްދައިގެން މިރޭ ކުޅުނު މެޗުގައި ސިޓީން ވަނީ ގިނަ އާ ކުޅުންތެރިންތަކަކަށް ފުރުސަތު ދީފަ އެވެ. ފުރަތަމަ ހާފުގައި ސިޓީގެ އިލްކާއި ގުންޑޮގާން ފޮނުވާލި ބޯޅައެއް ވަނީ ހުރަސްދަނޑިމަތިން ގޮސްފަ އެވެ.

ފުރަތަމަ ހާފުގައި ލެސްޓާ އިން ލީޑުނެގުމާ ގާތަށް ޖެހިލި އެވެ. އޭރިއާ ތެރެއިން ލެސްޓާގެ ފޯވާޑް ޖޭމީ ވާޑީ ޖެހި ބޯޅަ ސިޓީގެ ގޯލުގައި ހުރި ގޯލްކީޕަރު ޒެކް ސްޓެފެން ވަނީ މަތަކޮށްފަ އެވެ. ސިޓީން ދެ ވަަނަ ހާފުގައި ބަދަލު ކުޅުންތެރިއެއްގެ ގޮތުގައި ޖެކް ގްރީލިޝް ވަނީ ކުޅެން އަރުވައިފަ އެވެ. އިނގިރޭސި އެންމެ އަގުބޮޑު ޓްރާންސްފާގެ ގޮތުގައި ގްރީލިޝް ސިޓީ އަށް ބަދަލުވީ މިދިޔަ ހަފްތާގަ އެވެ.

މިރޭގެ މެޗުގެ ތެރެއިން ގްރީލިޝް ބޯޅަ ހިފައިގެން.-- ފޮޓޯ: އޭއެފްޕީ

މެޗު ނިމެން އެއް މިނިޓަށް ވެފައި ހުއްޓައި ސިޓީގެ އޭރިއާތެރެއިން އެ ޓީމުގެ ނޭތަން އަކޭ ވަނީ ލެސްޓާގެ ކެލެޗީ އިހެނާޗޯ އަށް ފައުލުކޮށްފަ އެެވެ. ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު ދިން ޕެނަލްޓީ އިހެނާޗޯ ވަނީ ކާމިޔާބުކޮށްފަ އެވެ.

ކުރިން ސިޓީ އަށް ކުޅުނު އިހެނާޗޯ އަކީ 2001 ވަނަ އަހަރަށް ފަހު ޗެރިޓީ ޝީލްޑްގެ ފުރިހަމަ ވަގުތު ތެރޭ ޕެނަލްޓީއެއް ޖެހި ފުރަތަމަ ކުޅުންތެރިޔާ އެވެ. އިތުރު ގޯލެއް ޖަހަން ކައުންޓަ އެޓޭކުގައި ލެސްޓާ އަށް ލިބުނު ފުރުސަތުގެ ބޭނުން އެ ޓީމުގެ ޕެޓްސަން ޑަކާ އަށް ނުކުރެވުނެވެ.

މިއީ ލެސްޓާގެ ތާރީހުގައި ލީގު ނޫން މެޗެއްގައި ސިޓީ އަތުން ހޯދި ތިން ވަނަ މޮޅެވެ. މީގެ ކުރިން މި ދެ ޓީމު ކުޅުނު ލީގު ނޫން މެޗުތަކުގައި ލެސްޓާ ދެ ފަހަރު ވެސް މޮޅުވީ އެފްއޭ ކަޕްގަ އެވެ. އެއީ 1920 އާއި 1968 ވަނަ އަހަރު އެވެ.

ކުރިން ސްވަންސީ ސިޓީ އާއި ލިވަޕޫލަށް ޕްރިމިއާ ލީގުގައި ކޯޗުކޮށްދިން ލެސްޓާގެ މިހާރުގެ ކޯޗު ބްރެންޑަން ރޮޖާސް ހަވާލުވި ފަހުން އެ ޓީމުން އަންނަނީ ބޮޑެތި ކުރިއެރުންތަކެއް ހޯދަމުންނެވެ.