ޕެފްކޮފްޔިޓޯ، ގްރީސް (އޯގަސްޓު 7) - ގްރީސްގެ ޖަންގަލިތަކުގައި ރޯވެފައިވާ އަލިފާންގަނޑު މީހުން ދިރިއުޅޭ ހިސާބަށް ފޯރައި، ގިނަ އަދަދެއްގެ ގެތަކުގައި ރޯވެ އެތައް ސަތޭކަ އާއިލާއެއްގެ ގެދޮރު ގެއްލިއްޖެ އެވެ.
އަލިފާންގަނޑުތައް ކޮންޓްރޯލް ކުރަން 1،450 ފަޔާފައިޓަރުންނާއި 15 ވައިގެ އުޅަނދު ދަނީ މަސައްކަތް ކުރަމުންނެވެ. އެހެން ގައުމުތަކުގެ ފަޔާފައިޓަރުންނާއި އުޅަނދުތައް ވެސް ދަނީ އެހީވަމުންނެވެ.
"ގްރީސްގެ ފަޔާފައިޓަރުންނަށް އެހީވުމަށް ތަޖުރިބާކާރު ޓީމެއް އަޅުގަނޑުމެން ފޮނުވާނަން،" އިނގިރޭސި ވިލާތުގެ ހޯމް ސެކެޓްރީ ޕްރިޓީ ޕަޓޭލް ހޮނިހިރު ދުވަހު ކުރެއްވި ޓްވީޓެއްގައި ވިދާޅުވި އެވެ.
މިސްރުން ދެ ހެލިކޮޕްޓަރާއި ސްޕެއިނުން ފަޔާފައިޓިން ޖެޓެއް ފޮނުވަން ވަނީ ނިންމާފަ އެވެ.
ގަދަ ވަޔާއެކު ބައެއް ހިސާބުތަކުގެ ފިނިހޫނުމިން 38 ޑިގްރީ ސެލްސިއަސް އަށް އަރާފައި ވާއިރު، އަލިފާންގަނޑު އަދިވެސް އިތުރަށް ފެތުރޭނެ ކަމަށް ބެލެވެ އެވެ.
ޔޫރޮޕިއަން ފޮރެސްޓް ފަޔާ އިންފޮމޭޝަން ސިސްޓަމުން ބުނި ގޮތުގައި ފާއިތުވި 10 ދުވަހުގެ ތެރޭގައި 56،655 ހެކްޓަރުގެ ސަރަހައްދެއް ވަނީ އަނދާފަ އެވެ. ނަމަވެސް 2008 އިން ފެށިގެން ނިމިގެން ދިޔަ އަހަރާ ހަމައަށް އެވްރެޖު ގޮތެއްގައި އަހަރަކު އެނދީ އެންމެ 1،700 ހެކްޓަރުގެ ސަރަހައްދެވެ.
ގްރީސްގެ އިތުރުން ކައިރީގައި އޮންނަ ތުރުކީގެ ޖަންގަލިތަކުގައި ވެސް ރޯވެ ދަނީ އަނދަމުންނެވެ. ތަޖުރިބާކާރުން ބުނާ ގޮތުގައި ފަހުގެ ތާރީހެއްގައި ކުރިމަތިނުވާ ވަރުގެ ހޫނުގަދަ "ހީޓްވޭވް" އެއް އެ ސަރަހައްދަށް އައިސް، އަލިފާން ރޯވުމަށް އެންމެ އެކަށޭނަ މާހައުލު ޖަންގަލިތަކުގައި އުފެދުނެވެ. އެހެން އަހަރުތަކަށް ވުރެ މި އަހަރުގެ ލިބެމުންދާ ގެއްލުން އިތުރުވެފައި ވަނީ މޫސުމީ ބަދަލުގެ ސަބަބުން ކަމަށް ތަޖުރިބާކާރުން ބުނެ އެވެ.
ޖަންގަލީގައި އަލިފާން ރޯވުމުގެ ސަބަބުން މިހާތަނަށް ގްރީސް އިން ދެ މީހުން އަދި ތުރުކީން އަށް މީހަކު މަރުވެފައި ވެ އެވެ.
އަލިފާން ރޯވެ އަނދަމުންދާއިރު، ގިނަ ދުވަސްތަކަކަށް ފަހު ހޮނިހިރު ދުވަހު ތުރުކީއަށް ވާރޭ ވެހުމުނެވެ. އެހެންވެ، އަލިފާން ނިއްވަން މަސައްކަތް ކުރާ މީހުންނަށް ވަނީ ކޮންމެވެސް ވަރެއްގެ ފަސޭހަ ކަމެއް ލިބިފަ އެވެ.
އައްސޭރިފަށުގައި އޮންނަ އަންތަލްޔާ ސިޓީގެ އޮފިޝަލުން ބުނީ ވާރޭ ވެހުމާ ގުޅިގެން އެ ތަނުގައި ފެތުރިފައި އޮތް އަލިފާންގަނޑު ކޮންޓްރޯލް ކުރެވިފައިވާ ކަމަށެވެ.
އިތުރު ސަރަހައްދުތަކަށް ވާރޭ ވެހޭނެ ކަމަށް ލަފާކޮށްފައި ވާއިރު، އަދިވެސް ހާލަތު ގޯސްވެދާނެތީ ބައެއް ހިސާބުތަކުން މީހުން ދިޔުމަށް ދަނީ އަންގަމުންނެވެ.
އެގްރިކަލްޗާ އެންޑް ފޮރެސްޓްރީ މިނިސްޓަރު ބެކިރް ޕަކްޑެމިރްލީ ކުރެއްވި ޓްވީޓެއްގައި ވިދާޅުވީ ތުރުކީގެ 81 ޕްރޮވިންސްގެ ތެރެއިން 47 ޕްރޮސްވިންސްގައި 200 އަށް ވުރެ ގިނަ އަލިފާންގަނޑު ރޯވި ކަމަށެވެ. އޭގެ ތެރެއިން ފަސް ޕްރޮވިންސެއްގައި 13 އަލިފާންގަނޑު އަދިވެސް ދަނީ ފެތުރެމުންނެވެ.
