ބެއިރޫތު، ލުބްނާން (އޯގަސްޓު 7) - އިރާނުގެ ތާއީދާއެކު ހަރަކާތްތެރިވާ ހިޒްބުﷲ ގްރޫޕުން ހުކުރު ދުވަހު އިޒްރޭލަށް ރޮކެޓު ހަމަލާ ފޮނުވުމުން، އިޒްރޭލުން ރައްދުގައި ހަމަލާ ދީފި އެވެ.
މި ހަފްތާގައި ދެ ގައުމު ގުޅޭ ބޯޑަރު ސަރަހައްދުގައި ހަމަލާ ބަދަލު ކުރުމަށް ފަހު އިޒްރޭލުން ވަނީ ހަތް އަހަރުގެ ތެރޭގައި ފުރަތަމަ ފަހަރަށް ލުބްނާނަށް ވައިގެ ހަމަލާ ފޮނުވާފަ އެވެ.
ހިޒްބުﷲ އިން ވެސް ވަނީ 2019 ވަނަ އަހަރަށް ފަހު ފުރަތަމަ ފަހަރަށް އިޒްރޭލުގެ ސަރަހައްދަށް އަމާޒުކޮށް ސީދާ ރޮކެޓު ހަމަލާތައް ފޮނުވާފަ އެވެ.
މައްސަލަ ހޫނުވެފައި މި ވަނީ މިދިޔަ ހަފްތާގައި ގަލްފް އޮފް އޮމާންގައި އޮތް އިޒްރޭލް ބިލިއަނަރެއްގެ ބޯޓަށް ހަމަލާ ދިނީ އިރާނުން ކަމަށް ތުހުމަތުކޮށްފައިވާ ދަނޑިވަޅެއްގަ އެވެ.
ހުކުރު ދުވަހު ހަމަލާ ބަދަލު ކުރުމަށް ފަހު އިޒްރޭލުން ބުނީ "ހަނގުރާމައެއް ފަށަށް ބޭނުން ނުވާ" ކަމަށެވެ. އދ. ގެ ސުލްހަ ބަލަހައްޓާ ފައުޖުތަކުން ބުނީ ބޯޑަރު ސަރަހައްދު އޮތީ ނުރައްކާތެރި ހާލަތެއްގައި ކަމަށެވެ.
އެމެރިކާގެ ސްޓޭޓް ޑިޕާޓްމަންޓުން ލުބްނާނަށް ގޮވާލީ ހަމަލާތައް ހުއްޓުމަށް ފަހު ހާލަތު ކޮންޓްރޯލް ކުރުމަށެވެ. ހިޒްބުﷲ އަކީ ލުބްނާންގައި ސިޔާސީ ނުފޫޒު ވަރުގަދަ ބަޔެކެވެ. އެ ގައުމުގައި ވަގުތީ ސަރުކާރަކުން ވެރިކަން ކުރާތާ މިހާރު އަހަރަކަށް ވުރެ ގިނަ ދުވަސް ވެއްޖެ އެވެ.
އިޒްރޭލުގެ ޑިފެންސް މިނިސްޓަރު ބެނީ ގާންޓްޒް ވަނީ އެމެރިކާއިން ލުބްނާނަށް ޕްރެޝަރު ކުރުމަށް ގޮވާލާފަ އެވެ.
ހިޒްބުﷲ އިން ގިނަ އަދަދެއްގެ ރޮކެޓު ހަމަލާ ފޮނުވީ ދެ ގައުމުން ވެސް ދައުވާ ކުރާ ޝިބާ ފާމްސް ބޯޑަރު ޑިސްޓްރިކްޓުގައި އިޒްރޭލު ސިފައިން ތިބި ހުސް ބިމަކަށެވެ.
ހަމަލާ ދިނީ 2014 ވަނަ އަހަރަށް ފަހު ފުރަތަމަ ފަހަރަށް މިދިޔަ ބުރާސްފަތި ދުވަހު އިޒްރޭލުން ދެކުނު ލުބްނާނަށް ވައިގެ ހަމަލާތަކެއް ދިނުމުން އެކަމުގެ ބަދަލު ހިފުމުގެ ގޮތުން ކަމަށް އެ ގްރޫޕުން ބުންޏެވެ.
އިޒްރޭލުން ބުނީ ޝިބާ ފާމްސްއަށް 19 ރޮކެޓު ހަމަލާ ފޮނުވި ކަމަށެވެ. އޭގެ ތެރެއިން ހަ ރޮކެޓު ވެއްޓުނީ ބޯޑަރު ހުރަސްކޮށް އިޒްރޭލަށެވެ.
ލުބްނާނުން ގަބޫލު ކުރާ ގޮތުގައި ޝިބާ ފާމްސް ޑިސްޓްރިކްޓަކީ އެ ގައުމުގެ ބަޔެކެވެ. ނަމަވެސް އދ. އިން ދެކޭ ގޮތުގައި އެއީ ސީރިއާގެ ގޯލަން ހައިޓްސްގެ ބަޔެކެވެ.
ގޯލަން ހައިޓްސްއަކީ 1967 ވަނަ އަހަރު އިޒްރޭލުން ހިފުމަށް ފަހު 1981 ގައި ވެރިވެގަނެފައިވާ ބިމެކެވެ.
